Oliy Liga 29-turidan o'rin olgan “So'g'diyona” – “Nasaf” (0:3) o'yinidan so'ng bo'lib o'tgan matbuot anjumanining dastlabki qismida “Nasaf” bosh murabbiyi Ro'ziqul Sa'dullaevich ishtirok etdi va o'yin haqida quyidagi fikrlarni bildirib o'tdi. – Bugungi g'alaba bilan va muddatidan avval bronza sovrinini qo'lga kiritganimiz bilan barcha futbolchilarimizni, muxlislarimizni va klubimizdagilarni samimiy tabriklayman. Bunday yutuqni qo'lga kiritish albatta yoqimli. O'yin haqida to'xtaladigan bo'lsam, bugun futbolchilarimiz o'z darajasida va saviyasida o'ynashdi. Ular bugun o'zlaridagi mahoratni namoyish qilishdi. Albatta bu g'alabaning asosiy omili bo'ldi.  “So'g'diyona” jamoasi haqida gapiradigan bo'lsam, shuni e'tirof etish kerakki, jamoa o'tgan yillarga nisbatan bu yil ancha barqaror o'yin ko'rsatdi va natijani ham o'zlaringiz ko'rib turibsizlar. Bu jamoadagi o'yinchilarda g'alabaga bo'lgan ishtiyoq va iroda katta. Men bu erda faqat bugungi o'yin haqida gapirayotganim yo'q. Futbolchilar mavsum davomida ana shunday kayfiyatda o'yinlar namoyish etishdi. Buni biz ham kuzatib kelayapmiz. Bugungi qo'lga kiritgan g'alabamiz ham oson bo'lmadi. Jamoa murabbiylarining olib borayotgan ishlari ham maqtovga sazovor. Ular o'yinchilarning saviyasini ko'tarishga erishishdi ham, eng asosiysi jamoa futbolchilarida yuqoriga intilishga hohish bor. Endi jamoadagi kamchiliklarni aytib o'tirmayman, chunki buni jamoa murabbiylari juda yaxshi bilishadi. Agar jamoaning xuddi Muzaffar Muzaffarovdek, Ixtiyor Toshpo'latovlardek yana himoya va markazda o'ynaydigan o'yinchilari bo'lsa, jamoaning o'yini bundan ham kuchayar edi. Ishonamanki, jamoa murabbiylari bu borada ishlar olib borishmoqda. “So'g'diyona” jamoasining kelgusida bundan ham kuchli o'yin namoyish etishiga ishonaman.  Jamoamizdagi Jizzaxlik yosh futbolchilar? Ha, ularda iste'dod bor.  Biz ularga ishonch ham bildirayapmiz. Ammo futbolda bitta iste'dodning o'zi etarli emas. Agar ular doimo o'z ustida ishlab, mahoratini oshirish bo'yicha ko'proq mehnat qilishsa, intilsalar, kelgusida mamlakatimizning etakchi o'yinchilar qatoridan joy egallashadi. Ularning kelajagi o'z qo'lida, – deydi "Nasaf" ustozi. 
— deya xabar beradi uff.uz nashri.