Oliy Liga 29-turidan o'rin olgan “So'g'diyona” – “Nasaf” (0:3) o'yinidan keyingi matbuot anjumanining navbatdagi qismida “So'g'diyona” jamoasi bosh murabbiyi Davron Fayziev ishtirok etdi va bugungi o'yin haqida fikrlarini bildirib o'tdi. – So'zimni boshida muxlislarimizdan maydonimizdagi mavsumning so'nggi o'yinida mag'lubiyatga uchraganimiz uchun uzr so'rayman. To'g'risi, maydonimizdagi mavsumning so'nggi o'yinda muxlislarimizni xursand qila olmaganimiz, alamli bo'ldi. Balki futbolchilarimiz mavsumdagi vazifani bajardik deb, loqaydlikka yo'l qo'yishdimi? Futbolchilarimiz bugun qoniqarli o'yin namoyish eta olishmadi. Kelgusidagi rejalar? Hozircha klubimiz rahbariyati bilan bu haqda muzokara qilganimiz yo'q. Mavsumning so'nggi o'yini bor. Futbolchilarni ham, o'zimni ham shartnomam 31 dekabrga nihoyasiga etadi. Hali nima bo'lishi ma'lum emas. Biz 18 dekabrlarda yig'ilamiz va jamoada kim qoladi va kim ketadi – shunga aniqlik kiritib olamiz va yangi yildan mashg'ulotlarga kirishamiz. Bizni oldimizda “Nasaf”dagidek tiziq grafik yo'q. Oldimizda kelasi mavsum boshlanishigacha ancha vaqt bor. Ko'pchilik o'yinchilarimizga boshqa jamoalardan takliflar bor. Xullas, hozircha kelgusida jamoa qanday bo'ladi aniq emas. Biz bugun g'alaba qozonganimizda hozirgi egallab turgan o'rnimizdan ham yuqori o'ringa sazovor bo'lar edik, afsuski bu rejamiz amalga oshmadi. Ammo biz qolgan o'yinda ham buning uchun harakat qilamiz. Muxlislarimizni mehmonda o'ynab bo'lsada, xursand qilishga urinib ko'ramiz, – deya izoh berdi Davron Fayziev. 
— deya xabar beradi uff.uz nashri.