14 noyabr kuni futzal bo'yicha XXI O'zbekiston milliy chempionatiga start berildi. Musobaqa boshlanishi arafasida yurtimizda faoliyat yuritadigan taniqli sport jurnalisti Dmitriy Popov futzal mavzusiga qaytgan holda, yangi mavsumda milliy chempionatimizda ishtirok etadigan jamoalar bilan o'quvchilarni yaqindan tanishtirib o'tdi. Qo'shimcha ma'lumot Aytib o'tganimizdek, kirib kelgan mavsum futzal bo'yicha yurtimizda o'tkaziladigan milliy chempionatning 21-mavsumi bo'ladi. O'zbekiston chempionati kuz-bahor tizimida o'tkaziladi va musobaqa g'olibi Osiyoda klublar o'rtasida o'tkaziladigan eng nufuzli musobaqa - Chempionlar Ligasiga yo'l oladi. Yangi mavsumda jami 11ta jamoa ishtirok etadi. Barcha jamoalar bir-birlari bilan ikki martadan o'ynab chiqishganidan so'ng, chempionatda 1-8-o'rinlarda joylashgan jamoalar «pley-off» bosqichida kuch sinashadilar. O'tgan yili barcha bosqichni muvaffaqiyatli yakunlagan «Olmaliq» hozirgi kunda O'zbekistonning amaldagi chempioni hisoblanadi. «Olmaliq» jamoasi a'zosi Jamoliddin Sharipov esa, 38ta golga mualliflik qilgan holda, XX O'zbekiston chempionatining to'purari bo'lgan. O'zbekiston chempioni nomini qo'lgan kiritgan jamoalar ro'yxati: «Ardus» (Toshkent) - 6 karra, «Turon-S» (Andijon) - 4, «Lokomotiv» (Toshkent) va «Olmaliq» (Olmaliq) - 2, «Stroitel-Zarafshon» (Zarafshon), «Ro'zmat Madaminov» (Xiva), «Jizzax-S» (Jizzax), DJKA «Yunusobod» (Toshkent), «Nafis» (Samarqand), «Uchquduq« (Uchquduq) - 1. XXI milliy chempionat 1. «Olmaliq» (Olmaliq) Ikki karra O'zbekiston chempioni. Jamoa bosh murabbiyi Aleksandr Petrov «Olmaliq» safiga O'zbekiston milliy terma jamoasi tarkibida to'p suradigan ko'plab mashhur futzalchilarni jalb etgan. «Olmaliq» doimiy ravishda o'z tarkibini mustahkamlaydi, xususan, kirib kelayotgan mavsumda klub sharafini «Ardus» va O'zbekiston terma jamoasi tarkibida yorqin o'yin namoyish etgan Artur Yunusov himoya qiladi. «Olmaliq» futzal klublari orasida eng yosh jamoalardan biri hisoblanadi va hali o'z tarbiyalanuvchilarini tayyorlashga ulgurmagan. Albatta, buning uchun biroz vaqt talab etiladi. «Olmaliq» kelajakda qanday kuchga ega bo'lishi klub rahbariyatining siyosatiga bog'liq, albatta. O'z tarbiyalanuvchilariga ega bo'lish uchun esa klubga o'z futzal maktabiga asos solish, unga bolalar va o'smirlarni jalb etish talab etiladi. Bundan tashqari, «Olmaliq» futbol klubida omadi yurishmagan yoshlarni ham sinab ko'rsa bo'ladi. 2. «Ardus» (Toshkent) Yangi mavsum klubda milliy terma jamoamizni jahon chempionatiga olib chiqqan ispan mutaxassisi Xose Mariya Mendez ishlaydi. Aytib o'tish joizki, butun dunyo bo'ylab FIFAning «PRO» litsenziyasiga ega bo'lgan futzal murabbiylari soni o'n kishidan ortiqroqdir. Ular qatoriga Mendez ham kiradi. Jamoa o'z oldiga doimo eng yuqori maqsadlarni qo'yadi. Bugungi kunga kelib, «Ardus» mamlakatimizning eng ko'p unvonga ega jamoasi hisoblanadi. Bundan tashqari, o'zbek klublari orasida faqatgina «Ardus» Chempionlar Ligasining finaliga qadar etib borgan. Ushbu natijani poytaxt klubi 2012 yilda qayd etgandi. «Ardus» klubiga e'tibor qaratsangiz, uning safi doimiy tarzda yosh futzalchilar bilan boyitib borilishiga guvoh bo'lishingiz mumkin. «Ardus» tarkibidagi futzalchilar ham doimiy tarzda milliy terma jamoaga chaqirilishadi. Yana bir qiziq holat: «Ardus»ning byudjeti o'rtamiyona klublarnikidan ham kam, ammo jamoa doimiy ravishda chempionat sovrindorlari qatorida bo'ladi. Buni «Ardus» fenomini deb atasa ham bo'ladi. Joriy yildan e'tiboran futzalchilik faoliyatini yakunlagan Nodir Eliboev «Ardus»ning katta murabbiyi sifatida ishlaydi. Bu erda yana byudjet mavzusiga qaytib, bir narsani ta'kidlab o'tsak. «Ardus»dagi maosh va turli xil bonuslar katta miqdorga ega bo'lmasa-da, klub nafaqat O'zbekistonda, balki butun Osiyoda ham eng stabil va uzilishlarsiz maosh to'laydigan jamoalar qatoriga kiradi. Shu sababli ham, ba'zi futzalchilar katta, ammo 100 foiz aniq bo'lmagan maosh o'rniga, «Ardus»dagi o'rtacha, lekin stabil maosh olishni tanlaydilar. Albatta, bu to'g'ri yoki noto'g'riligini har bir insonning o'zi hal qiladi. 3. «Do'stlik-AIN» (Qarshi) Maqtovga arzigulik jamoa. Oliy ligadagi debyut mavsumida «Do'stlik-AIN» kuchli uchlikdan joy egalladi. Jamoa tarkibi asosan mahalliy futzalchilardan tuzilgan. Yoshlarning doimiy ravishda qo'shilib kelishi esa, albatta, juda ham to'g'ri va samarali ishdir. qizig'i, «Do'stlik-AIN»ning byudjeti deyarli jamoa rahbarining mablag'i hisobiga qoplanadi. Albatta, qashqadaryo viloyati rahbariyati klubga yordam ko'rsatadi, lekin asosiy og'irlik baribir, klub rahbariga tushadi. Bu kabi jonbozlikni bugungi kunda juda kam kuzatish mumkin. 4. «Bunyodkor» (Toshkent) Yaqin o'tmishda O'zbekistonning eng zo'r to'purarlaridan biri bo'lgan Abdulla Bo'riev hozirda «qaldirg'ochlar» murabbiyidir. Uning to'purarlik qobiliyati «Bunyodkor»ning o'yin uslubida ham aks etadi. Ushbu jamoa hujumda juda chiroyli va mazmunli o'yin namoyish etadi. Ammo «Bunyodkor» o'z himoyasiga ko'proq e'tibor qaratishi lozim. Aynan mudofaa chizig'idagi xatolar o'tgan yili jamoaga ancha noqulayliklar olib keldi. Davomi interfutbol.uz saytida.
— deya xabar beradi uff.uz nashri.