Bugun “Nasaf” futbol maktabining 2000 yilda tug'ilgan bitiruvchilariga diplomlar topshirish tantanali marosimi bo'lib o'tdi. O'zingizga ma'lum, “Nasaf” futbol maktabi 2009 yildan buyon faoliyat yuritadi. Shu vaqt mobaynida futbol maktabimiz, mamlakatimizdagi mavjud futbol maktablari orasida etakchi o'rinlar qatoriga qo'shildi. Har yili futbol maktabimizni ko'plab yosh futbolchilar bitirib chiqishmoqda. Ular nafaqat “Nasaf” jamoasida balki yurtimizdagi ko'plab jamolarda to'p tepishmoqda. Shuni alohida ta'kidlash joizki, endilikda ular orasida mamlakatimizning turli yoshdagi terma jamoalari safida ham yurtimiz sharafini munosib himoya qilayotgan futbolchilar bor. Futbol maktabimiz tarbiyalanuvchilarining qo'lga kiritayotgan yutuqlari salmoqlidir. Misol tariqasida, bugungi bitiruvchilarimizdan iborat jamoamiz, oliy va birinchi liga tayyorlov guruhlari o'rtasida yaqinda o'tkazilgan Respublika birinchiligida yuqori birinchi o'rinni egallashdi. Ushbu bitiruvchilarimiz shuningdek bu yili Qashqadaryo ligasida birinchilikni hamda Qashqadaryo kubogi sohibi ham bo'lishganlarini aytish mumkin. “Nasaf” futbol maktabida Sergey Petrovich Kucherenko boshchiligdagi ustoz va murabbiylarimiz yosh futbolchilarimizga dastlabki futbol sirlarini o'rgatish bilan birga, ularga yaxshi tarbiya ham berib kelishmoqda. Ularning mehnati va sa'y-harakatlari ham maqtovga loyiq. Bugungi tanatanali yig'ilishda “Nasaf” PFK bosh menedjeri Sh.S. Yarulin, “Nasaf” PFK sport direktori V.N.Ni hamda “Nasaf” jamoasi bosh murabbiyi R.S.Berdievlar ishtirok etishdi. Ular  bitiruvchilarimizni bugungi quvonchli kun bilan tabriklab, ularga diplomlar, faxriy yorliqlar va esdalik sovg'alari topshirishdi. Shuningdek bitiruv kechasida ota-onalar, futbol maktabimiz murabbiylari va tarbiyalanuvchilari ham hozir bo'lishdi. Kechada bitiruvchilarimizning ota-onalari nomidan, mehnat faxriysi Sabohat Jo'raevna Mirova so'zga chiqib, yosh futbolchilarimizga oq fotiha berdi va klubimiz hamda futbol maktabimiz rahbariyatiga, murabbiylarimizga tashakkurlar izhor qildi. Tantanali kecha chiroyli va mazmunli o'tdi.
— deya xabar beradi uff.uz nashri.