«Real»ning  portugaliyalik hujumchisi Krishtianu Ronaldu «Oltin butsa»ni 4-marta qo'lga kiritgan tarixdagi ilk futbolchiga aylandi. Eslatma: bu sovrin Evropa sport nashrlari assotsiatsiyasi (ESM) tomonidan qit'a milliy chempionatlarining eng yaxshi to'purariga topshiriladi. Aslida «Oltin butsa»ga Evropaning barcha milliy birinchiliklarida to'p suruvchi futbolchilar da'vogarlik qilishadi, ammo u faqat ispan La-ligasi vakillariga nasib etadi. Gari Lineker tomonidan nemislarning terma jamoalar miqyosidagi g'alabalari haqida aytilgan mashhur iborani sal boshqacha talqin etsak, klub futboli, xususan, «Oltin butsa» tanlovidagi ayni holat xuddi shunday. Qarang, o'tgan hafta Ispaniya futboli ketma-ket 8 marta (!) «Oltin butsa» taqdimotini uyushtirdi. Bu oraliqda Krishtianu Ronaldu va Lionel Messi 3 martadan Evropa chempionatlarining eng yaxshi to'purariga atalgan sovrin sohibi bo'lishdi. Ularning «gegemon»ligi boshlanmasidan oldin primeroda gollarni qalashtirib tashlagan Diego Forlan ham laureatlik zavqini tuygandi. Luis Suares esa, garchi «Liverpul»dagi gollari tufayli sovrin sohibiga aylangan bo'lsada, «butsa»ni «Barselona» futbolchisi sifatida qabul qilib oldi. Ya'ni uni taqdirlash marosimi Kataloniya poytaxtida o'tkazildi...
* * *
Ispaniya chempionatida emas, boshqa birinchilikda o'ynab, «Oltin butsa» yutgan oxirgi futbolchi aynan Krishtianu Ronaldudir. U 2008 yili «MYu» tarkibida ham laureat bo'lgandi. Xullas, portugaliyalik goleador Evropaning eng yaxshi to'purariga atalgan sovrinni 4 marta qo'lga olgan ilk futbolchiga aylandi. Uning bu natijasi shunisi bilan ahamiyatliki, yaqindagina, ya'ni 2013 yili futbol olami «Oltin butsa»ning 3 karra sohibi - Lionel Messi bilan tanishgandi. Biroq Ronalduning abadiy raqibidan o'zib ketishiga 2 yil kifoya qildi. Mavsum-2013|2014da 31ta gol urgan portugaliyalik sovrinni Suares bilan birga qo'lga kiritdi. O'tgan mavsum esa, unga munosib raqobatchi topilmadi - 48ta gol! Bu 1968 yili asos solingan sovrin tarixidagi 2-yaxshi natijadir. Xullas, bitta chempionat doirasida ko'proq gol urish birgina Messiga nasib etgan. U mavsum-2011|2012da raqiblarini naq 50 marta ranjitish uddasidan chiqqandi.
***
Madridda «Real»ning 7-raqamli, ya'ni «Ronaldu» yozuvli futbolkalari har qadamda ko'zga tashlanadi. Lekin «Barsa»ning Messiga, «Atletiko»ning Torresga tegishli formalari soni ham taxminan Ronalduniki bilan teng. Bu futbolkalar sport do'konlari peshtaxtalarida uncha ushlanib turmaydi. Shuningdek, ko'chada savdo qiluvchi qora tanli va tegishli ruxsatnomasi yo'q behisob  tijoratchilar uchun eng xaridorgir mahsulotlardan hisoblanadi. Lekin Madriddagi bosh maydon - Solda Ronalduning futbolkalari ko'p, baribir. «Real»ning klub do'koni portugaliyalikning ulkan suratlari bilan bezatilgan. Eng katta foto ostiga esa, mitti butsachalar yordamida «5», «0» va «0» raqamlari yozib qo'yilgan. Bu CR7ning butun faoliyatida urgan gollari miqdoriga nishona.
***
Portugaliyalik yulduzga 4-«Oltin butsa» Madriddagi WestinPalase mehmonxonasida topshirildi. Ushbu dabdabali otel atrofi doimo gavjum. Muxlislar har kuni olomon bo'lib, mehmonxonaga joylashishgan mashhur qo'shiqchilar, kinoaktyorlar va boshqa yulduzlarning tashqariga chiqishlarini kutishadi. To'g'ri, otel «realchilar»ga ozgina noqulay sanalgan Neptun favvorasi ro'parasida joylashgan. Noqulaylik tomoni shuki, «Atletiko» muxlislari yirik g'alabalarni aynan shu erda nishonlashadi. Deylik, «matraschilar» fanatlari oxirgi marta shunday katta bayramni fevral oyida uyushtirishgandi. O'shanda Diego Simeone jamoasi Krishtianu Ronalduning tug'ilgan kunida «Real»ni chinakamiga «do'pposlagandi» - 4:0. Esingizda bo'lsa, portugaliyalik o'sha o'yinni jarohat sabab, o'tkazib yuborgan, ammo 30 yillik yubileyini maromiga etkazib nishonlagandi. Xullas, «Real» muxlislariga jamoa a'zolarining 0:4 ko'rinishidagi sharmandalikdan so'ng ham, binoyidek ko'ngilxushlik qilishgani sira yoqmagan va kattagina janjal yuzaga kelgandi.
Davomi InterFUTBOL gazetasi blogida.
— deya xabar beradi uff.uz nashri.