Joriy mavsum boshlanmasidan avval so'nggi turning markaziy uchrashuvi autsayderlar o'rtasida kechishini taxmin qilishganida, bunga  ishonarmidingiz? Mazkur bahsda vodiyning ikki klubi o'zaro kuch sinashishi aytilganida-chi? Buni qarangki, 2016 yilgi chempionatda «jon» saqlash missiyasini bajarish aynan «Andijon» va «Navbahor» klublari chekiga tushdi. Debyutant - «Obod»ga esa faqat «o'tish o'yini» xavf solishi mumkin. Umuman olganda, mazkur holatning jamoalar uchun o'ziga xos afzalliklari bor. «Yo'g'-e, autsayderlikning ham yaxshi tomoni bo'ladimi?» - deb o'ylayotgandirsiz, balki. Aytmoqchimizki, chempionatni so'nggi o'rinlarda yakunlash keyingi mavsumga o'zgacha, jiddiyroq tayyorgarlik ko'rish uchun turtki vazifasini o'taydi. Qarang, o'tgan yili elitada qolish uchun kurashgan klublar joriy mavsum qanday o'yin ko'rsatishdi? Oliy liga-2015da tanqidlarga uchragan Davron Fayziev «So'g'diyona»ni mutlaqo boshqacha jamoaga aylantirdi. «Buxoro» haqida esa, yanada ko'proq ijobiy fikrlar bildirish mumkin. Jamshid Saidov shogirdlari medallar uchun kurash olib borishdi. Bundan ko'rinadiki, chempionatni quyi pog'onalarda yakunlagan jamoada o'ziga yarasha motivatsiya paydo bo'ladi: keyingi mavsumda bu kabi qiyinchiliklarga yo'liqmaslikka intiladi. Shu nuqtai nazardan olib qaralganda, «Andijon» va «Navbahor» klublarining hozirgi holatlari o'zlari uchun faqat saboq bo'lib xizmat qilishi turgan gap. Albatta, buning uchun avvalo, elitada qolish vazifasini uddalash lozim. Xo'sh, bu borada qaysi jamoaning imkoniyati yuqoriroq? Albatta, «burgutlar»ning zimmalaridagi yuk og'ir. Ular so'nggi turda kamida 2ta gol urishlari lozim. Albatta, bu o'rinda o'z darvozalari daxlsizligini saqlab qolishlari ham kerak. Shunda ham «Obod»ning «Paxtakor» maydonidan ochko olib qaytishini kutishadi. Chunki Ja'far Irismetov shogirdlari mag'lubiyatni tan olishsa, 3ta jamoa - «Andijon», «Navbahor» hamda «Obod»ning o'zaro o'yinlardagi natijalari hisobga olinadi. Bu o'rinda andijonliklarning so'nggi pog'onada qolishlari aniq bo'lib qoladi. 3ta klubning o'zaro o'yinlarda qayd etgan natijasi JAMOA                    O'YIN            OChKO «Obod»                    4                     7 «Navbahor»           3                     6 «Andijon»             3                     1 Ko'rinib turibdiki, vaziyat o'zaro o'yinlardagi ko'rsatkichlarni hisoblab chiqishni taqozo etsa, «Andijon» so'nggi turda yirik hisobda g'alaba qozongan taqdirida ham, 4 ochko bilan oxirida qoladi. Bu esa oliy ligada qolish imkoniyatini bermaydi. Nima ham derdik, reglamentning beshafqat qoidasi shunga undamoqda. Dilshod Jabborov va A'zam Aliev birinchi davraning oxirgi bahsi- (2:0)da «Andijon» darvozasini ish­g'ol qilishar ekan, «Navbahor» uchun o'ta muhim gollarni urishayotganidan bexabar bo'lishgan, hoynahoy. Yoki 29-turda «Bunyodkor» posbonini ranjitgan Abdumalik Abdullaevni qahramon sifatida ko'rsatish kerakmikan? Axir aynan «qaldirg'ochlar» maydonida erishilgan durang so'nggi turdagi chalkashliklarga zamin hozirladi. Aks holda, hozir hisob-kitob qilmay, «lochinlar»ning murakkab ahvoli haqida gaplashayotgan bo'lardik... Yo'q, o'ylashimizcha, haqiqiy qahramon bugun, ya'ni 2016 yilning 22 noyabr kuni o'tkaziladigan o'yindan so'ng aniqlanadi. Keling, shu o'rinda «Andijon»-«Nav­bahor» bahsining avvalgi mavsumlarda qanday natijalar bilan yakunlanganiga to'xtalsak. So'nggi 5ta chempionatda (2013 yili «Andijon» birinchi ligada qatnashgani tufayli ushbu mavsum inobatga olinmagan) andijonliklar o'z maydonlarida «Navbahor»ni ikki marta taslim etishgan va bir bora mag'lubiyatga uchrashgan. Yana bitta uchrashuvda tomonlar durangga imzo chekishgan. Bevosita 2015 yili «Sog'lom avlod» stadionida o'tkazilgan bahs haqida gapiradigan bo'lsak, unda «Andijon»ning qo'li baland kelgandi - 3:2. Ravshan Ermatov boshqarib borgan o'yinda maydon egalarining shijoati mehmonlarni engishda asqotgandi. «Navbahor» uchun esa mazkur uchrashuv Shahboz Erkinovning maydon markazidan urgan goli bilan yodda qolgan, xolos. Davomi interfutbol.uz saytida.
— deya xabar beradi uff.uz nashri.