«O'zbekiston» telekanalida o'tgan yakshanba kuni «Bern mo''jizasi» nomli badiiy film namoyish etildi. Ta'kidlash joiz, mazkur kartina namoyishi telekanal mutasaddilari tomonidan 15 kun avval rejalashtirilgan ekan. Boshqacha aytganda, ularda Janubiy Koreya va O'zbekiston terma jamoalari o'rtasidagi iztirobga to'la uchrashuv bo'lib o'tmasidan avval shu g'oya tug'ilgan. Mag'lubiyat olovida jiz­g'anak yonayotgan qancha-qancha muxlislar shu film tomoshasidan so'ng yana milliy jamoa mavzusiga qaytishdi: «Telekanaldagilar ham nimanidir sezishganki, shu filmni oldindan dasturga kiritishgan. Mag'lubiyat xavfini faqat Samvel Babayan sezmagan, xolos. Sezgan bo'lsa hamki, uning oldini olish uchun chora topolmadi. Kartina syujetida esa Germaniya terma jamoasi bosh murabbiyi muxlislarning dashnomlaridan to'g'ri xulosa chiqaradi. U o'ziga yo'llangan alamli so'zlarga to'la maktublarni futbolchilarga o'qib berishdan cho'chimaydi. «Bu kuningdan o'lganing yaxshi!» qabilidagi jumlani na murabbiylar va na futbolchilar yuziga ayta olamiz. Aytmaslik - bizning madaniyatimiz. Ammo «Andishaning oti qo'rqoqlik», deb o'ylaydiganlar o'z bilganlaridan qolishmayapti. Ular xalq kayfiyatining tub mohiyatini ang­lashmayapti. Anglashganida, termamiz 15 noyabrdagi og'riqli bahsda loaqal  durangga erishardi.  «Bern mo''jizasi»da muxlislar murabbiyga «O'zingni bos! Germaniyadan yo'qol!» kabi tahdidli maktublar yo'llashadi. Oxir-oqibat, murabbiy qaysar Xelmut Ranni maydonga tushiradi. Samvel Babayan esa, ayni holati bilan terma jamoamizga munosib emasligi necha martalab isbotlansa hamki, Igor Sergeevga ishonch bildiraveryapti. Milliy jamoamiz mag'lubiyatga uchrasa ham, muxlislar qalbi iztirobga to'lsa ham mayli, muhimi, Temurxo'ja Abduxoliqov maydonda sinab ko'rilmasa, bas! Xuddiki, bu futbolchi amalda sinovdan o'tkazilsa, nimadir bo'ladigandek...». Ochig'i, muxlislarning shu mazmundagi mulohazalariga o'rin berilsa, ancha-muncha qog'oz qoralashga to'g'ri keladi. Biz alam bilan aytilgan gap-so'zlarni anchagina tarashlab yozdik, lekin filmda bu jihatlarga e'tibor qaratilmagan. Eng asosiysi, unda Germaniya futboli ravnaqi va yutug'i mamlakatdagi iqtisodiy mo''jiza asoslaridan biri sifatida ko'rsatilgan. «O'zbekiston» telekanaliga yana bir karra rahmat. Arxivdagi mazkur filmni eslash va o'z vaqtida dasturga kiritish yuksak kasb mahoratidan dalolat. Aslida bu galgi maqolamiz uchun shu film taassurotlari etarli, deb hisoblagandik. Biroq vaziyat birdan o'zgardi. Biroz tin olish uchun tash­qariga chiqsak, ikki tanish futbol muxlisi avj pardada bahslashyapti. Bahs mavzusi bizni ham qiziqtirib qo'ydi. - «Navbahor» futbolchilariga ham «Tilim qursin»dagi Murod akaning rost so'zlatadigan choyidan ichirib qo'yish kerak, - kuyib derdi ulardan biri istehzo bilan kulib. Rosa sayrashdi azamatlar: «Murabbiylar va futbolchilarning keldi-kettisi tugamas ekan, «Navbahor» o'nglanmaydi...». - «Navbahor»ku, bir amallab oliy ligada qolar, agar buni eplolmasa, «Dinamo»ga o'xshab birinchi ligada hordiq chiqarar. Ana «Yuventus»dek jamoa ham moliyaviy mashmashalar tufayli «V» seriyasida bir yil o'ynadi. Oliy ligada bunday muammolar oz emas. Bu masalalarni mavridi bilan hal etish mumkin. Lekin terma jamoamizning taqdiri nima bo'ladi? Yo'llanma masalasi yana xavf ostida. O'sha choydan, avvalo, milliy jamoamiz vakillari ichishgani ma'qul. Deylik, Odil Ahmedov sardor sifatida o'sha choydan ho'plasa, qaysi muammolarni to'kib sochardi? Hozir u Rossiya futbol muhitidagi etuk murabbiylarga tanqidiy munosabat bildirish darajasida. Kamolot pallasidagi futbolchi ongu-shuuridan qanday o'y-xayollar kechadi? U JCh-2022 haqida o'ylashni ham istamaydi. Zero, yagona orzusi - JCh-2018da ishtirok etish. Uh! Odilning orzulari haqida o'ylasam, g'alati bo'lib ketaman...  Futbol muxlislari fantaziyasiga qoyil! Axir «Tilim qursin-2» yaqindagina teleekran orqali namoyish etildi. Filmni tasavvur va tafakkurga ta'sirini qarang. Shunisiga ham shukr. Fikrlashyapti, mulohaza yuritishyapti, haq so'zni yotig'i bilan aytishga o'rganishyapti. Turli jargonlardan, varvar so'zlardan O'zi saqlasin! Umuman olganda, muxlislardagi kayfiyat tushunarli. Ular tomonidan bildirilayotgan mulohazalarning barchasi o'rinli. Shu bois,  biz yuqorida bu kayfiyatni qisqacha ifodalashga intildik. Endi navbat o'zimizning xulosalarga: Davomi interfutbol.uz saytida.
— deya xabar beradi uff.uz nashri.