Mana, shu kunlarda FIFA taqvimiga ko'ra, butun dunyo milliy jamoalari JCh-2018 saralashidan o'rin olgan nav-batdagi bahslarda maydonga tushishmoqda.  Bilasiz, murabbiylar futbolning yozilmagan mezonlariga ko'ra, qaysidir o'yinchini milliy terma jamoaga taklif etish masalasida avvalo, uning klubdagi faoliyatiga e'tibor beradilar. Harqalay, klub futbolida samarali to'p surayotgan futbolchi ko'pincha mamlakat bosh jamoasi tarkibida ham ishonchni oqlaydi. Lekin «Bu - futbol, unda har qanday, hattoki, mantiqqa zid voqealar ham uchrab turadi» qabilidagi aqida bejiz paydo bo'lmagan. Quyidagi maqola (manba - championat.com) bilan tanishib chiqqach, bunga o'zingiz ishonch hosil qilasiz. Orelen JOAKIM Klubi: «Lers» Milliy jamoasi: Lyuksemburg JCh-2018 saralash bosqichini Frantsiya termasidan ochko tortib olish bilan boshlagan Belarus milliy jamoasi barchani hayratga solgandi. Biroq Aleksandr Xatskevich shogirdlari oradan atigi bir oy o'tgach, Gollandiya termasiga qarshi bahsni o'ta omadsiz yakunlashdi, ke-yin  esa o'z maydonlarida yaqqol autsayder - Lyuksemburg jamoasini ham engish uddasidan chiqisholmadi - final hushtagi yangrashiga 5 daqiqacha qolgan vaqtda kamtarin «Lers» klubining faxriy hujumchisi Orelen Joakim mezbonlar darvozasini ishg'ol etib, ularni o'ta qimmatli 2 ochkodan mahrum etdi. 30 yoshli futbolchi Belgiya chempionati 2-ligasida to'p suradi, boz ustiga, asosan zaxiradan maydonga tushish bilan cheklanyapti. Lekin milliy jamoasida hamon muntazam ravishda va asosiysi, samarali o'ynamoqda. Qarang, Joakim saralash doirasidagi  dast­labki 3ta uchrashuvda 3ta gol urdi. Jumladan, Bolgariya termasi bilan o'yinda «dubl»ga erishdi. To'g'ri, uning 2ta gol urishi ham lyuksemburgliklarni mag'lubiyatdan qutqarolmadi. Ammo jamoa hisobidagi ilk 4ta golning 3tasi aynan Orelen nomiga yozilgani diqqatga sazovor. Emir SPAXICh Klubi: «Gamburg» Milliy jamoasi: Bosniya va Gertsegovina Emir ushbu maqola uchun tanlangan aksariyat qahramonlardan farqli o'laroq, o'z klubida ham, terma jamoasida ham muntazam maydonga tushmoqda. Lekin ko'rsatkich-natijalari mutlaqo farqlanadi. Xullas, Spaxich terma jamoada - himoyaning ishonchli qo'rg'oni. Qolaversa, raqiblar darvozasiga yo'l topishni ham uddalaydi. Deylik, JCh-2018 saralashining dastlabki turida Estoniya termasiga 2ta gol «tortiq» etgandi. Bosniyalik himoyachi «Gamburg» safida ham asosiy ijrochilardan biri sanaladi. Biroq uning ishtiroki, ya'ni statistikasi uyqudagi yirtqichni eslatadi. Oddiy fakt: Spaxich maydonga tushgan ilk 5ta uchrashuvda «Gamburg» birorta ochko ololmadi va bor-yo'g'i bitta gol urib, o'z darvozasidan 11 marta to'p olib chiqdi. Shunday ekan, Emirga nisbatan «Terma jamoa uchun tug'ilgan futbolchi» ta'rifini bersak bo'laverar... Filip KOSTICh Klubi: «Gamburg» Milliy jamoasi: Serbiya Filip Kostichning hozirgi holati Spaxichnikidan aslo farq qilmaydi. Serbiya futbolining kelajagi porloq umidlari sirasiga kiruvchi yarim himoyachi saralashning ilk turlarida Irlandiya va Moldova terma jamoalari darvozasini ishg'ol etdi. Umuman, Kostichning faolligiga gap yo'q. Lekin u samarali harakatlarini hozircha faqat milliy jamoasi o'yinlarida ko'rsatyapti, xolos. Har holda, bundesligadagi faoliyatiga havas qilib bo'lmaydi - «Gamburg»ning dastlabki 5ta uchrashuvida qanot yarim himoyachisi sifatida to'p surib, atigi bitta samarali uzatmani amalga oshirdi. Klubi esa ayni paytgacha 4tagina gol urgan holda, turnir jadvalining so'nggi qatorida turibdi. Dushan TADICh Klubi: «Sautgempton» Milliy jamoasi: Serbiya Bu futbolchi Mitrovich hamda Kostich bilan birgalikda Serbiya termasining jangovar uchligini tashkil qilyapti. E'tibor bering, serblar JCh saralashining dastlabki 3ta uchrashuvida 8ta gol urishdi va ulardan naq 7tasi mazkur trio hisobiga to'g'ri keldi. Dushan ana shu «shayka»ning etakchisidir. U ayniqsa, avstriyaliklarga qarshi kechgan bahsda faollik ko'rsatib, gol urishdan tashqari, 2ta samarali «pas»ga mualliflik qildi. Diqqatga sazovor yana bir fakt shuki, Tadich serbiyaliklar urgan 8ta golda ham bevosita ishtirok etdi. Ya'ni 3tasini o'z nomiga rasmiylashtirib, 5tasiga hammuallif bo'ldi. Xullas, u «Gol+pas» tizimi bo'yicha saralash bosqichining eng yaxshilari qatorida bormoqda. Lekin masalaning ikkinchi tomoni shuki, ushbu ajoyib hujumkor yarim himoyachi APLda shunday samarani ko'rsatolmayapti. U «avliyolar» safidagi dastlabki 7ta o'yinida bor-yo'g'i bitta gol urdi. Qolaversa, Tadich  «Lester»ga qarshi kechgan bahsda shunchalik sust harakatlandiki, murabbiy ikkinchi bo'limda uning o'rniga boshqa futbolchini maydonga tushirdi. Davomi interfutbol.uz saytida.
— deya xabar beradi uff.uz nashri.