Yakuniga etgan oliy liganing ushbu mavsumida muxlislar yangi chempion nomini bilib olishdi. Toshkentning «Lokomotiv» klubi o'z tarixida birinchi marta O'zbekiston chempioni degan nomga sazovor bo'ldi.
Chempionlikni qo'lga kiritgan «Lokomotiv» oliy ligada jami 74 ochko to'pladi. Qizig'i shundaki, «temiryo'lchilar» o'tgan yil ham aynan shuncha ochko jamg'argan, biroq chempion bo'la olishmagandi. Jamoa o'tgan yil «Paxtakor»dan atigi bir ochko ortda qolib, ikkinchi o'rin bilan kifoyalangandi.
Ammo bu mavsumda 74 ochko yig'ish chempionlik uchun etarli bo'ldi. Statistikaga e'tibor qaratadigan bo'lsak, juda qiziq va deyarli bir xil raqamlarga duch kelamiz. E'tibor bering, «Lokomotiv» bu mavsum oliy liganing 30 o'yinidan 23tasida g'alaba qozondi, 5 marta durang o'ynab, ikki bor mag'lub bo'ldi. Jamoa o'tgan yil ham xuddi shunday ko'rsatkichni qayd etgan: ya'ni, 23 g'alaba, 5 durang va 2 mag'lubiyat.
Faqat to'plar nisbatida biroz farqni ko'ramiz. Bu borada bu yilgi ko'rsatkich: 77-24. O'tgan yilgisi esa 66-22. Demak, jamoaning gol urishida sermahsullik oshgan, chunki «Loko» bu yil o'tgan yilga nisbatan 11ta ko'p gol urdi.
Yana bir qiziq ma'lumot shuki, «Lokomotiv» uy va safar uchrashuvlarida ham o'tgan yilgi bilan bir xil ko'rsatkichga ega bo'ldi. Jamoa uy bahslarida 13 bor zafar quchib, 2 marta durang o'ynadi va umuman yutqazmadi. O'tgan yil ham xuddi shu holat ro'y bergandi. Safarda esa 10ta g'alaba, 3 durang va 2 mag'lubiyat. Qizig'i, bu borada ham o'tgan yilgi raqamlar ayni. Faqat to'plar nisbatida o'zgarish bor: bu yil uyda 44-8, safarda 33-16. O'tgan yil esa uyda 37-7 va safarda 29-15.
Ko'ryapsizmi, futbolda bir xil natijani takrorlab ham chempion bo'lish mumkin. Faqat buning uchun jamoadan harakat va raqiblarning o'zaro o'yinlarda qoqilishi talab etiladi.
— deya xabar beradi uff.uz nashri.