Ishonchimiz komil, «Milan»-«Yuventus» o'yinini tomosha qilgan aksariyat muxlislar «rossonerlar» tarkibidagi 18 yoshli yigitcha - Manuel Lokatelli raqibning mohir yarim himoyachilaridan qanday o'tib ketganini huzurlanib kuzatishgan. Shuningdek, uning Buffon qo'riqlayotgan darvozani qay tariqa nishonga olganini ham... Avvalo Lokatelli futbolga Italiyadagi eng mashhur akademiyalardan biri - «Atalanta» maktabi orqali qadam qo'ydi. Klub skautlari 8 yoshli bolakayni Komo daryosi bo'yidagi  Lekko shaharchasidan «topib olishgan». Manuel 10 yoshga to'lganidayoq Italiya bolalar futbolida ishlovchi barcha mutaxassislarga tanilib ulgurgandi. «Milan» esa uni 11 yoshida bir amallab, o'z akademiyasiga «og'dirdi». Shu tariqa Lokatelli keyingi 6 yillik davrda «rossonerlar» maktabining barcha yosh toifasidagi jamoalarida to'p surdi va 16 yoshida  primaverada debyut qildi. Yana 2 yildan keyin esa bosh jamoa tarkibiga kiritildi. Ya'ni Kristian Brokki joriy yil aprelida «Karpi»ga qarshi kechgan o'yin tugashi arafasida yigitchaga 2 daqiqacha o'ynash imkonini berdi. Mana, oradan yarim yil o'tib, Lokatelli jamoaning asosiy tarkibidan o'rin oldi. Kuchli jihatlari Lokatelli taktik tomondan juda yaxshi «qurollangan» - chinakam ital­yan yarim himoyachisiga xos zamonaviy futbolning deyarli barcha sir-asrorlarini puxta o'zlashtirgan. Xususan, qaysi vaziyatda maydonning qaerida bo'lishi lozimligini yaxshi biladi. Aynan shuning uchun ham italiyalik muxlislar hozirdanoq Manuelga o'zgacha mehr bilan qaray boshlashdi. Zero, etarli aqliy salohiyatga ega yigitcha maydonda tez va samarali harakatlanib, jamoasiga naf keltirmoqda. Aytish lozim, undagi bu xususiyatni ayrim futbolchilar faoliyatlari oxirigacha ham o'zlashtirolmaydilar. Endigina 18 yoshni qarshilagan futbolchi yakkakurashlarda ham chakki emas. Deylik, hozirgacha o'tgan o'yinlarda raqiblar bilan ko'p marta elkama-elka kurash olib bordi va e'tiborlisi, bunday olishuvlarda 100 foizli ustunlikni qayd etdi. Bu tabiiyki, «A» seriyasida kamol topayotgan o'spirin uchun g'oyat yaxshi natija. Lokatelli shuningdek, raqibdan to'pni olib qo'-yishda ham uncha-muncha tajribali hamkasblariga «dars berish»ga qodir - 67 foizlik aniq harakat. Manuelning zarbalari qanchalik kuchga egaligini ortiqcha ta'riflash shart emas. Negaki, ko'pchilik bunga yaqindagina guvoh bo'ldi. Amplua jihatidan olib qarasak, Lokatelli raqib darvozasidan uzoqroq hududda to'p surishga majbur. Ammo dastlabki 7ta uchrashuvda 2ta golni rasmiylashtirishga ulgurdi. Ahamiyatli tomoni, ularning ikkisi ham uzoq masofadan kuch bilan yo'llangan zarba mahsulidir. Qarang, uning zarbasini hattoki, Buffon ham bartaraf etolmadi. Shuning o'zi yigitcha etakchilik xususiyatidan ham bebahra qolmaganidan darak. Ishonchlilik Lokatelli kamdan-kam holatlardagina to'pni o'zidan uzoqlashtirib yuboradi. Uning qisqa masofalarga uzatadigan to'plari juda aniq, gavdasidan foydalanish xususiyati ham chakki emas. Shu bois, Italiya termasi kelajagidan xavotirlana boshlagan ko'pchilik muxlislar ko'ngli salgina taskin topdi. Ular buni ochiq-oydin aytishmoqda. Chunonchi, to'pni o'zida saqlab turishni biladigan, istalgan payt o'yin haroratini pasaytirishni uddalaydigan o'rta chiziq vakili har qanday jamoa uchun xazinaning o'zginasi. Davomi interfutbol.uz saytida.
— deya xabar beradi uff.uz nashri.