Ochig'ini aytish lozim, terma jamoamizning safarda Janubiy Koreyaga 1:2 hisobida mag'lub bo'lishi hamon futbol gurunglarida bosh mavzu bo'lib turibdi. Agarda bu o'yin­ning so'nggi 5 daqiqasi ham biz uchun ko'ngildagidek o'tib, Lobanov darvozasi ikkinchi bor ishg'ol qilinmaganida edi... O'shanda terma jamoamizning eng ashaddiy tan­qidchilari ham uchrashuvga «yaxshi» deb baho berishlari tayin edi. Afsuski, yigitlarimiz durang natijani ham ushlab qololmay, hamma umidlarni puchga chiqarishdi. Buning oqibatida esa muxlislar muhabbati qandaydir 5 daqiqa ichida nafratga aylandi. Nima uchun? Quyida shu haqda fikr yuritamiz...
Rus tilida shunday bir ajoyib maqol bor: «Buyuklik va sharmandalik orasi bir qadam». Biz ana shu «bir qadam» jumlasini «5 daqiqa» shakliga o'zgartiramiz. O'ylaymizki, bunda gap o'zgaradiyu, ammo ma'noga putur etmaydi. Xullas, biz bugun sizlar bilan «Feysbuk» ijtimoiy tarmog'ida anchagina muhokamalarga sabab bo'lgan bir vaziyat - koreyaliklarning birinchi goli urilgan vaqtda Lobanov tomonidan amalga oshirilgan hatti-harakatlarni tahlil qilib chiqmoqchimiz. Buning uchun esa bizga o'sha holatning bir nechta tarafdan olingan turli suratlari lozim bo'ladi.
I. Ikki surat
Ko'rib turganingizdek, 1-surat o'yindagi videolavhadan olingan bo'lib, u xiraroq chiqqan. Shundoq bo'lishi ham tabiiy, chunki o'yin dinamikasi, ya'ni, tezligi mazkur holatda ancha yuqori bo'lgani aniq. Bu o'rinda telekamera tasvirchining ko'kragi balandligida bo'lib, «mo'ljal» uzoq emasdi. Qolaversa, tasvirchi yon chiziq yaqinida turgandi. Zamonaviy telekameralarning ob'ektivi tasvirga olinayotgan «nishon»ni bir necha marta yaqinlashtirishga qodirligini ham unutmang (odatda bunday masofalar 10 dan 20 martagacha yaqinlashtiriladi, biz nazarda tutayotgan holatda esa taxminan 10 marta yaqinlashtirilgan). Umuman olganda, bu nuqtadan tasvirchi adashishi mumkin emas. Mazkur rakursda ko'rib turganingizdek, to'p har qanday holatda ham, darvoza to'sini yuqorisidan uchib o'tmoqda. Lobanov esa yaqin burchakni yopib turibdi. Shuningdek, uning qanchalik baland sakragani ham ko'rinib turibdi. Endi hammasini qo'shib, hisoblab chiqamiz.
Lobanovning bo'yi 190 sm.ga teng. Agar u qo'llarini yuqoriga ko'tarsa, bo'yiga yana kamida yarim metr qo'shiladi. Suratga qarang: u to'pga intilgan vaqtda kamida yarim metr, deylik, 40 sm. sakragan bo'lsin. Demak, 190+50+40+280 sm. Bu - Lobanov sakragan vaqtdagi umumiy balandlikni bildiradi. Qolaversa, u hali eng yuqori balandlikka sakrab ulgurmagan, to'p esa Sashaning ustidan oshib ketib bo'lgandi. Shu o'rinda bir omilni qo'shib o'tish lozim, Lobanov chap qanotdan hujum uyushtirilayotgan vaqtda yaqin burchakni yopa turib, sal egilgan holatda turgandi. Zero u zarbaga tayyorgarlik ko'rayotgandi. To'p jarima maydoniga havolatib uzatilganidan keyin esa u birdan sakrashga majbur bo'ldi va vaziyatni qo'ldan boy berdi. Suratga sinchiklab qarasangiz, to'p va darvozabon barmoqlari orasida 5 sm. borligini ko'rasiz.
Ikkinchi surat
Eng avvalo, shuni ta'kidlab o'tishni istardimki, ikkinchi va uchinchi suratlarni kim olganini, qanday tayyorlaganini bilmayman. Menga ularni ijtimoiy tarmoqlar orqali havola qilishdi. Ikkinchi suratga e'tibor bering - u stadiondagi «o'rgimchak» tizimli videokamera orqali olingan tasvir. Bu holatda kamera maydondan kamida 15 metr yuqorida bo'lgan. Aynan shu holat esa barchaning adashishiga zamin yaratmoqda. Chunki bu tasvirdan ko'rinishicha, to'p darvoza to'sini baland­ligida uchib o'tayotgandek. Eng muhimi, tasvir yuqoridan olingan va tepadan qaralganda, narsa-buyumlarning balandligi aslidek ko'rinmaydi. Bu - geometriyadagi oddiy aksioma. Misol uchun, siz divanda o'tiribsiz, qarshingizda balandligi 40 sm.cha keladigan stul bor. Endi o'rningizdan turib, yana o'sha stulga boqing... Nazaringizda u kichrayib qolgandek, to'g'rimi?! Aslida esa stul o'sha-o'sha - 40 sm.ligicha turibdi (aslida, shunchalik oddiy narsalar haqida gapirish shart emas. Biroq bizga Lobanovning haddan ortiq semirib ketganini isbotlamoqchi bo'layotgan insonlar shunday «dalil»lardan foydalanishyaptiki, asti qo'yaverasiz. Bu tasvirlar «dalil» bo'lolmaydi, axir...).
 Ikkkinchi suratning muallifi yana bir xatoga yo'l qo'ygan: chiziqning pastki nuqtasi darvozabon maydonchasi o'rtasiga o'rnatilgan. Darvozaning pastki chizig'i ustiga emas. Agar muallif bu bilan darvozaning balandligini ko'rsatmoqchi bo'lgan bo'lsa, adashgan. Chunki standart darvozaning balandligi 8 fut, ya'ni 2,44 sm. bo'lishini hamma biladi. Agar muallif boshqa maqsadda, deylik, Lobanov hatto darvoza to'sini balandligida ham sakray olmagan demoqchi bo'lsa, unda suratning yuqoridan olinganini va bu o'lchamlar tasvirga to'g'ri kelmasligini inobatga olishi lozim edi.
II. Yana bir foto-misol
Quyida ko'rib turganingiz - tepadan olingan tasvir naqadar aldamchi bo'lishiga yana bir misol. Bu surat ham menga ijtimoiy tarmoqlar orqali yo'llangan va u ham xato tasavvur uyg'otadi.
Qizig'i shundaki, bu suratga qarab «to'p darvoza to'sini balandligida o'tayapti» degan xulosaga kelish mumkin. Lekin endi mantiqan o'ylab ko'raylik, Lobanov shu qadar mitti inson emaski, havodagi to'pni qaytarish uchun deyarli yarim metr sakrab, shunda ham koptokka etolmasa?! O'z o'rnida aytib o'tish kerak, Sasha darvoza to'sinini sakramay, shundoq qo'llarini ko'tarib ushlab qo'yishini bir necha marta kuzatganmiz. Umid qilamizki, endi xatolar nimadaligini tushungandirsiz?..
BU MAQOLANI YoZIShDAN MAQSAD BITTA - ma'lum BIR VAZIYaTDA ALDAMChI TAASSUROTLARGA BERILIShNING VA NOO'RIN AYBLOVLARNING OLDINI OLISh!
 Yuqoridagi shuncha so'zlar orqali isbotlamoqchi bo'layotgan haqiqatim mana shu. Terma jamoamiz vakillariga salbiy munosabatda bo'layotgan kishilar real o'lchamlarda xatoga yo'l qo'yishyapti. O'zbekiston milliy terma jamoasidagi futbolchi yigitlar esa ularda faqat dushmanlar yoki tanqidchilar emas, do'stlari ham borligini bilib qo'yishsin! Afsuski, futbolda do'stlar ham, dushmanlar ham etarlicha uchraydi. Ammo muxlislar orasida terma jamoaga chin dildan mehr qo'ygan, uni har qanday holatda ham qo'llab-quvvatlaydigan haqiqiy ishqibozlar bor. Shunday ekan, yigitlar, aslo tushkunlikka tushmang, ortiqcha gap-so'zlarga e'tibor qaratmang! Kimdir sizlarga chin yurakdan muxlislik qiladi va bundaylar hech qachon sizlarni yolg'izlatib qo'ymaydi. Bu kabi haqiqiy muxlislar oddiy ishqibozlar orasida ham, mutaxassislar, jurnalistlar orasidan ham topiladi.
III. Ruhiy holat
Men so'nggi vaqtlarda quyidagi gaplarni ko'p bor eshitishga majbur bo'ldim: «u Lobanov, Babayan, Sergeev va boshqalarning «advokati»... Bularning bariga sabab shuki, kamina terma jamoa o'yinlarida boshqalar ko'rmayotgan yoxud ko'rishni istamayotgan ijobiy jihatlarga ko'proq e'tibor qarataman. Shu bilan birga, albatta, «minus» lardan ham aslo ko'z yummayman. Avvalgi maqolamda aytganimdek, Janubiy Koreyaga qarshi o'yinda vakillarimiz ikkitagina xato qilib, ikkita gol o'tkazib yuborishdi. Raqib esa atigi bitta xato qildi...
Yana bir qiziq jihat: men milliy terma jamoa o'yinlarini Mirjalol Qosimov murabbiylik qilgan davrlarda ham xuddi shunday tahlil qilganman va o'shanda ham kaminaga «advokat» maqomini yopishtirishgandi. Hattoki, meni Qosimov bilan birga tushlik qilib, «buyurtma maqola» yozishda ham ayblashgan! Sog'lom fikrli muxlislar auditoriyasi esa terma jamoani kim boshqarishidan qat'iy nazar, o'z qarashlaridan chekinmasligimni, tahlillarim doim birdek davom etishini yaxshi bilishadi. Agar o'sha koreyslarning ikkinchi goli bo'lmaganida, shuncha gap-so'zlarga o'rin qolmasdi. Ikkinchi xato - so'nggi 5 daqiqadagi mash'um xato mag'lubiyatga, mana shuncha tortishuvlarga sabab bo'ldi. Maqolaga nega bu sarlavha tanlanganini tushungandirsiz endi?.. Davomi interfutbol.uz saytida.
— deya xabar beradi uff.uz nashri.