Evropa grandlarining «Rostov» klubi hamda Eron terma jamoasi iqtidorli hujumchisi Cardor Azmunga nisbatan qiziqishlari tobora ortyapti. Uning «Visente Kalderon»da urgan goli har qancha hayratlanarli bo'lmasin, qiziqishning asosiy sababi bu emas, albatta. Zero, chaqmoq kabi ahyon-ahyonda kuzatiladigan yorqin lavha nomdor jamoalarni chalg'itolmaydi sira. Boshqacha aytsak, katta klublar qaysidir transferni amalga oshirishda avvalo, nomzod futbolchining barcha fazilatlari va qobiliyatini sinchkovlik bilan o'rganib chiqishadi va shundan keyingina bir to'xtamga kelishlari mumkin. Ha, Madridda namoyish etilgan individual mahorat eronlik yigitning bahosini oshishiga xizmat qilishi tayin. Lekin alohida ta'kidlash kerak, o'sha, «Atletiko»-«Rostov» bellashuvidan oldin ham Sardor Azmunning xaridorlari ro'yxati ancha uzun edi. Qiziqish mohiyati Jumladan, «Liverpul» vakillari fors o'g'lonining professional va insoniy xususiyatlarini ancha avvalroq o'rganishga kirishgandilar, lekin matbuot bundan bexabar qolgandi. Deylik, The Guardiandek nufuzli manba tarqatgan ma'lumot eronlik iqtidor sohibining «Rostov», ehtimolki, Rossiya PLda so'nggi mavsumini o'tkazayotganligini tasdiqlaydigan ishonchli hujjatdir. To'g'ri, agarda Rossiya grandlari Sardorni o'z tarkiblariga qo'shib olsalar, uning  evrofutbol markazi tomon yurishi yarim yo'lda to'xtab qolishi ehtimoldan xoli emas. Xullas, Azmun hozirda evropalik xaridorlar uchun rus ligasining eng sifatli «mahsuloti»dek ko'rinmoqda. Ha, bu fikrga quyidagi iddao bilan e'tiroz bildirish mumkin: «Xo'sh, Promes yoki Julianochi?» Birinchidan, bu futbolchilar ChLda ishtirok etishmayapti. Ikkinchidan, «Rostov» etakchisini xarid qilish «Spartak» yoki «Zenit» yulduzlarini sotib olishga qaraganda, ancha osonroq. Endi eronlik qahramonimizning ijobiy fazilatlarini sanab o'tsak bo'laverar... Tezlik «O'z ixtiyori bilan sevib qoldi» filmidagi keksa oshiq yodingizdami? U ma'shuqasini shunday erkalaydi: «Siz keng iste'mol mahsuloti emassiz, aksincha, alohida buyurtmaga binoan yaratilgansiz!» «Liverpul»ni ravon yo'lga boshlayotgan Yurgen Klopp mazmunan xuddi shunday e'tirofni Sardor Azmunga nisbatan takrorlashi mumkin. Ishqiy ehtiroslarga yo'g'rilgan ohang emas, balki ustozning shogirdga samimiy murojaati ko'rinishida, albatta. Qiziq, o'ta past sur'atga moslashib qolgan Rossiya futbolida bunday tezkor, shiddatli hujumchi qay tariqa bosh ko'tardi? Azmun - uchqur toychoq. Bu uni boshqa ampluadoshlaridan yaqqol ajratib turadigan asosiy jihatdir. To'g'ri, Sardor chidamli va jismonan baquvvat ijrochi emas. Misol uchun, ko'rinishi jihatidan eronlikka yaqin bo'lgan jamoadoshi - Dmitriy Poloz har bir uchrashuvda undan  ko'proq yuguradi. Lekin kerakli payt yuqori tezlik namoyish etish bobida Azmunga etadigani yo'q. Ispaniyada urilgan gol - «Rostov» sprinteri uchun odatiy yumush. Tan olish kerak, butun uchrashuv davomida 2-3ta samarali reydni amalga oshirish uchun qolgan vaqtni «sayr» qilib o'tkazish - Lionel Messidek dahoga xos usul. Harqalay, qolgan barcha futbolchilar oldiga tezlik borasida tobora qat'iyroq talablar qo'yilmoqda. Sardor ham ularning biri sifatida o'z vazifasini a'lo darajada uddalamoqda. Taktik saviya Texnik salohiyat bobida tug'ma iqtidor sohibi sanalgan futbolchi ham agarda taktik jihatdan uquvsiz bo'lsa, Qurbon Berdiev jamoasida o'ynay olmaydi. Zero, o'yin tartibi va taktik intizomga qat'iy amal qilish - turkman metri jamoalariga xos jihat. Azmun taniqli murabbiydan saboq olishni Qozonda boshlab, Rostovda maromiga etkazdi. Natija chakki emas: umuman notanish yigitcha qandaydir 2-3 yil ichida zamonaviy futbol talablariga to'liq javob beradigan saviyali hujumchi darajasiga ko'tarildi. Undagi arzimas kamchiliklarni faqat malakali mutaxassislar ko'ra olishadi. Xullas, tajribali Qurbon og'a «javohir»ga sayqal berib, uni «brilliant»ga aylantirdi. Davomi interfutbol.uz saytida.
— deya xabar beradi uff.uz nashri.