Turkiyaning Istambul shahrida boks bo'yicha 1997-1998 yillarda tavallud topgan sportchilar o'rtasida o'tkazilgan xalqaro turnir nihoyasiga etdi.
Dunyoning 17 davlatidan kelgan yosh charm qo'lqop ustalari ishtirokida o'tgan mazkur musobaqada mamlakatimiz vakillari 2 ta oltin va 1 ta bronza medalini qo'lga kiritishdi.
Terma jamoamiz hisobiga oltin medallarni Otabek Xolmatov (-49 kg) va Obidjon Tohirov (-91 kg) keltirishgan bo'lsa, Shunqor Abduraimov (-56 kg) bronza medali sovrindori bo'ldi.
Otabek Xolmatov saralash bahslarida Ruslan Rustamov (Ozarbayjon) va Nodar Darbaidze (Gruziya)ni mag'lub etib, hal qiluvchi final uchrashuvida qozog'istonlik Rustam Xamtol ustidan zafar quchdi.
Obidjon Tohirov esa finalga qadar kechgan janglarda Qozog'iston, Turkiya va Ozarbayjon vakillaridan ustun kelib, oltin medal uchun kechgan bahsda Gruziya terma jamoasi a'zosini mag'lub etdi.
Va nihoyat, Shunqor Abduraimov nimchorak finalda Alen Raximich (Germaniya)ni, chorak finalda esa Furkan Pank (Turkiya)ni engib, yarim finalda Turkiya terma jamoasining yana bir a'zosiga imkoniyatni boy berdi.
Shu tariqa, 2 ta oltin va 1 ta bronza medaliga sazovor bo'lgan O'zbekiston yoshlar terma jamoasi umumjamoa hisobida uchinchi o'rinni egalladi. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.