Avgustda EChL jiddiy o'zgarishlar arafasida turgani haqida xabarlar tarqaldi: endi guruh bosqichidagi 32ta o'rindan naq 16tasi Evropaning to'rtta kuchli chempionatlari - La Liga, APL, bundesliga va «A» seriyasi vakillariga kafolatlanadi. Mazkur qaror ko'plab noroziliklarni keltirib chiqardi, boylar qashshoqlarni kamsitishgani etmagandek, o'rtahollarni ham ko'z ochirgani qo'yishmayotgandek edi. UEFA qiyin holatga tushib qoldi. Bir tomondan, tashkilot Platini prezidentligi davrida kvalifikatsion bosqichni isloh qilish orqali (futboldagi kichik mamlakatlarning etakchi klublarini saralash maqsadida «Chempionlar yo'li»ga asos solingandi) barcha qit'ada futbolni rivojlantirishga qo'l urilayotganini ta'kidlagandi. Darhaqiqat, ko'plab jamoalar o'z tarixlarida ilk marotaba EChLda o'ynash imkoniyatiga ega bo'lishdi. «Astana»ning omadli debyutini eslash kifoya, BATEning guruh bosqichida qatnashishi esa hozirda hech kimni ajablantirmay qo'ygan. Biroq katta klublarga bunday yo'nalish yoqmasligi tayin. Shu bois, aksariyat grandlar daromaddan ulush olishni xohlab qolishdi. Mabodo UEFA bunga rad javobini bersa, top-jamoalar EChLni boykot qilishga bel bog'lashdi - hattoki, UEFAga bo'ysunmaydigan alohida superliga tashkil etishlari mumkinligini ta'kidlashdi. UEFA esa ayni vaziyatdan maksimal foyda keltiradigan o'ziga xos kelishuv orqali chiqishga urinmoqda. Albatta, jarayonga faol tarzda aralashgan aksariyat klublar o'z nomlarini yashirishga urindilar. Zero, ziqnalikda ayblanishni hech kim xohlamaydi. Bunday o'zgarishlar uchun mas'uliyatni o'z zimmasiga oladiganlarni topish amrimahol. Balki bu o'zgarishning foydali jihatlari bordir, biroq ishqibozlar orasida tanlanganlar elitasini xush ko'rmaydiganlar ham borligi ayni haqiqat. «Yuventus» prezidenti Andrea Anellining bu boradagi qarashlari esa biroz boshqacha. Ushbu mutasaddi va o'zgarishlar haqida nima deb o'ylashingizdan qat'iy nazar, maxfiylikda Anellini ayblab bo'lmaydi. U o'z fikrini ochiq-oydin oshkor etdi. Andrea uchun futbol - qiziqarli shou, biznes. Foyda «hamfikrlik»dan ustun. Nima ham derdik, rahbar nimani o'ylayotganini shartta gapirdi-qo'ydi. Uning aktsiyadorlari bor (xususan, Anellilar oilasi «Yuventus»ning 63,8 foiz aktsiyasiga egalik qiladi), shu bois foyda olishni ta'minlashi darkor. Bu erkin bozor, kapital. Ushbu mutasaddi shunday ishlashni xush ko'radi. Anellining fikricha, bu qaror to'g'ri. Boshqalarning nuqtai nazari esa boshqacharoq. Misol uchun, futbol - shunchaki, o'yin-kulgu vositasi emas, balki ijtimoiy fenomen, madaniyatning yuksak ko'rinishi, sportning bu turi faqat bozor qonunlari evaziga rivojlanmaydi. Shuningdek, ayni vaziyatda geografiya ham muhim ahamiyat kasb etishini inobatga olmoq darkor. Masalan, «Byornli»ning teletranslyatsiyalardan oladigan puli butun boshli Belgiya chempionatining shu yo'nalishdagi daromadi bilan teng. Davomi interfutbol.uz saytida.
— deya xabar beradi uff.uz nashri.