O'zbeksiton kubogi-2016 final uchrashuvi oldidan har ikkala jamoa vakillari ishtirokida matbuot anjumani bo'lib o'tdi. Matbuot anjumanining dastlabki qismida “Nasaf” jamoasi bosh murabbiyi Ro'ziqul Berdiev hamda jamoa darvozaboni Eldorbek Suyunovlar ishtirok etishdi. “Final o'yini o'zlaringiz bilasiz, bir o'yindan iborat. Shuning uchun har ikkala jamoa ham faqat g'alaba uchun maydonga tushadi. Ertaga muxlislar jamoalarning faqat g'alaba uchun emas, balki mazmunli va chiroyli o'yiniga guvoh bo'lishlariga shubha qilmasa ham bo'ladi. Har ikkala jamoa ham bunga qodir. Albatta biz amaldagi kubok sohibimiz, shuning uchun ertaga bo'ladigan o'yinda bu kubokni o'zimizda saqlab qolish uchun harakat qilamiz. Barcha futbolchilarimiz bu o'yinga tayyor”, – dedi Berdiev. Eldorbek Suyunov: Ertaga faqat g'alaba uchun maydonga tushamiz. Chunki, yil boshida maqsad qilgan edik, minimum o'tgan yilgi natijani takrorlash uchun. Bunga bizda imkoniyat bor, ertaga shu maqsadni amalga oshirish uchun maydonga tushamiz. Ro'ziqul Berdiev: Final uchrashuvlari keyingi paytda poytaxtda emas, boshqa shaharlarda o'tkazilayotgani hammaga ma'qul kelmoqda. Mana o'zlaringizga ma'lum, o'tgan yili Jizzax shahridagi final ajoyib muhitda o'tdi. Stadion muxlislarga to'lib toshdi. Endi bu yil final uchrashuvi Samarqand shahrida o'tkazilayotgani yanada ajoyib bo'ldi. Bu qaror to'g'ri qabul qilingan deb, o'ylayman. Ertaga ham bu erda final ajoyib tarzda o'tishiga shubha qilmasa ham bo'ladi. Chunki, Samarqand ahli ham futbolni juda sevishadi. “Jamoamizning Samarqand shahrida muxlislarini ko'pligi bizni xursand qiladi. Chunki, biz yon qo'shnilarmiz. Shuningdek jamoamizning mamlakatimizning boshqa joylarida, ayniqsa vodiyda ham ko'pligi, bizning kuchimizga kuch qo'shadi. Jamoamizda hech qanday yo'qotishlar yo'q. Boya aytib o'tdim, hamma futbolchilarimiz o'yinga tayyor turishibdi. Ular o'zlarini har tomonlama ko'rsatishga tayyor turishibdi. Jamoamiz hozir har qanday raqib bilan o'ynashga tayyor. Yigitlarimiz ruhiy va boshqa tomondan ham bu finalga tayyor turishibdi. “Lokomotiv” jamoasida juda kuchli va katta mahoratga ega futbolchilari bor, bekorga ular bu yil chempion bo'lishgani yo'q. Ular bunga loyiq edilar va mavsum davomida shunga mos o'yin namoyish etishdi. Ammo bu final, finalda jamoalar teng imkoniyatga ega bo'lishadi. Biz “Lokomotiv” jamoasini juda yaxshi o'rganib chiqdik, ertaga finalga mos o'yin tashkil qilamiz degan, umiddaman. “Nasaf” jamoasi hech qachon bir o'yinchiga bog'lanib qolgan jamoa emas. Bunday o'ylaydiganlar adashadi. Oldin ham, hozir ham shunday. Bizda 20 nafarga yaqin mahoartli o'yinchilar bor, ularning har biridan xavfli o'yin kutish mumkin”, – deya qo'shimcha qildi Berdiev. 
— deya xabar beradi uff.uz nashri.