Oliy liga debyutanti - «Obod» chempionat yakunlanishiga bir tur qolgan paytda kuchlilar safida qolish imkoniyatlarini ancha yaxshilab oldi. Ja'far Irismetov shogirdlari 29-turda «Andijon» bilan bahsda durang (0:0) qayd etishdi. Bu esa ikki jamoa o'rtasida uch ochkolik farq saqlanib qolishini ta'minladi. «Obod» so'nggi turda «Paxtakor» mehmoni bo'ladi. Bu uchrashuvda «sherlar»ga imkoniyat boy berilsa ham debyutant oxirgi pog'onaga tushmaydi. «Burgutlar» so'nggi turda «Navbahor»dan ustun kelgan taqdirlarida ham o'zaro o'yinlar natijasiga ko'ra, «Obod»­dan yuqorida bo'la olmaydilar. Ma'lumot uchun, oliy ligada 15-o'rinni egallagan jamoa, quyi divizionda 2-pog'onani egallagan klub («Norin») bilan bahs olib boradi. Biz «Andijon»ga qarshi kechgan o'yindan so'ng «Obod» bosh murabbiyi Ja'far Irismetovdan intervyu oldik. E'tirof etish joizki, sobiq hujumchi jamoani ikkinchi davrada, o'ta qiyin vaziyatda qabul qilib olgandi. - Avvalo, barcha muxlislarimizga rahmat aytmoqchiman, - deya so'z boshladi murabbiy. - Bizdan kutilgan o'yinni namoyish etdik, deb o'ylayman. Lekin birinchi bo'limdagi qizil kartochka rejalarimizni o'zgartirib yubordi. Tan olaman, «Andijon»dan biroz boshqacha o'yin kutgandim. Eng muhimi, kerakli ochkoni qo'lga kiritdik. Dastlabki 45 daqiqalikda maydonda bir kishi kam bo'lib qolsakda, niyatimizga etdik. Bu esa, jamoamizda ichki muhit yaxshi ekanligini ko'rsatib turibdi. Aks holda, natijaga erisholmasdik. - Jamoa to'purari Shohruz Norxonov o'zidan yaxshi taassurot qoldirayotgandi. Lekin uni zaxiraga oldingiz. Buning sababi nimada? - U oyog'ida muammo borligi uchun almashtirishimizni so'radi. Shu bois Shohruzning o'rniga boshqa hujumchi tushirdik. Bugun maydonda nima bo'lganini barcha ko'rdi. Shundan kelib chiqib, jamoam ko'rsatgan o'yindan qoniqish hosil qildim. - Bu uchrashuvga o'zgacha tayyorgarlik ko'rdinglarmi yoki odatdagidekmi? - Biz har bir bahsga alohida taraddud ko'ramiz. Qaysi jamoaga qarshi maydonga tushishimizning ahamiyati yo'q. - Chetlatish haqida nima deysiz? Jamoa sardorini oqlamasangiz kerak? - Uchrashuvdan oldin futbolchilarni aynan shu masalada ogohlantirgandim. Ehtiyot bo'lib harakat qilish kerakligini tushuntirgandik. Mayli, bunday holatlar zamonaviy futbolda uchrab turadi. Eng muhimi, «Andijon» bilan o'yinda yaxshi jamoa shakllanganini ko'rdim. - Ikkala vaziyatda ham sariq kartochka to'g'ri ko'rsatildimi? - Biror narsa deyish qiyin. Lekin ikkinchi holatda ogohlantirish berilmasa bo'lardi. Hakam futbolchimizni mug'ombirlik ishlatganlikda ayblab, sariq kartochka ko'rsatdi. Vaziyat darvozadan ancha uzoqda edi. Qolaversa, Doniyor jarima zarbasi belgilanishini ham so'ramadi. - Ja'far aka, so'nggi turda «Paxtakor»ga qarshi maydonga tushasizlar. 30-turda deyarli bosimsiz o'ynaysizlar. Shu jihatdan olib qaraganda, ijobiy natijaga umid bormi? - Albatta. Biz har bir o'yinga g'alabani ko'zlab maydonga tushamiz. - Jamoaning bu yilgi chempionatdagi ishtiroki, o'zingizning murabbiylikdagi debyutingiz haqida nima deya olasiz? - Birinchi mavsum bo'lgani uchun omadli deb hisoblayman. Boz ustiga, jamoani qiyin vaziyatda qabul qilib olgandim. Klub rahbariyati oldimizga qo'ygan vazifani imkon qadar bajarishga intildik. Qilingan mashaqqatli mehnatimiz samarasi ko'rindi, deb o'ylayman. Yigitlar «Andijon»ga qarshi bahsda borlarini berib o'ynashdi. Agar tarkiblar teng bo'lganida, g'alaba qozonishimizga shubham yo'q edi. Davomi interfutbol.uz saytida.
— deya xabar beradi uff.uz nashri.