Final uchrashuvi yakuniga etkach, odatdagidek matbuot anjumani bo'lib o'tdi. Matbuot anjumanining dastlabki qismida jamoamiz murabbiyi Ro'ziqul Berdiev ishtirok etdi. Uchrashuv haqidagi fikrlarini bildirish bilan birga, jurnalistlarning savollariga ham javob berdi.
-O'zlaringiz guvoh bo'ldilaringiz “Lokomotiv” jamoasi bizga nisbatan tajribaliroq va mahoratliroq chiqdi. O'ylaymanki ular buning evaziga g'alabaga erishdi. Bu g'alaba bilan “Lokomotiv” jamoasini tabriklayman. Bugungi uchrashuvda ko'plab yosh futbolchilarimizga imkon berdik. Men ularni ayblashdan yiroqman, aksincha futbolchilarimizga bugungi o'yinlari uchun tashakkur bildiraman.
Afsuski o'yin boshidagi qo'pol xatomiz orqali darvozamizdan to'p olib chiqdik. Bu kutilmagan tezkor gol o'yinga tuzgan rejalarimizni buzib yubordi. Ikkinchi bo'limda yaxshi o'ynadik, ammo bu hisobda aks etmadi. To'g'ri, bunday uchrashuvda o'yinchilarda hayajon ham bo'ladi. Balki, bu ham futbolchilarimizga salbiy ta'sirini o'tkazgandir.
Biz jamoamizni ruhan ham bugungi o'yinga tayyorlagan edik. Ammo “Lokomotiv” jamoasida harakat qiladigan futbolchilar biznikilarga qaraganda bunday uchrashuvlarni ko'p ko'rgan. Yigitlarimizda katta ma'suliyat tufayli ham ba'zi vaziyatlarda shoshilish sezildi. Keyingi rejalarimiz haqida gapiradigan bo'lsam, 5-6 dekabr kunalari Toshkentda tibbiy ko'rikdan o'tamiz va 20 dekabrdan yana yig'iniimizni boshlaymiz. Biz hozircha OChL pley-offda kim bilan o'ynashimiz noma'lum. Ammo yanvar oxiri va fevral oyi boshida o'yinlar bo'lishi mumkin. Biz shu vaqtga jamoamizni tayyorlashimiz kerak bo'ladi, bunga harakat qilamiz.
Bugungi uchrashuvda Krasichni maydonga tushirmaganimizga asosiy sabab, uning jarohati tufayli bo'ldi. U bizga o'yinga to'liq tayyormasligini aytganidan so'ng, shunday qarorga keldik.
Jamoa oldiga nega chempionlik maqsadi qo'yilmaydi? Chempionlik uchun kurashishga tarkib har tomondan kuchli bo'lishi kerak. Afsuski, bizda bunday imkoniyat yo'q. Biz o'ta kuchli futbolchilarni safimizga qo'shib olish uchun imkoniyatimiz chegaralangan. Shuning uchun futbol akademiyamizda etishib chiqqan futbolchilarimizga tayanishga majburmiz. Bu qaysidir ma'noda o'zini oqlayapti, bu kelajakda o'z mevasini berishiga ham ishonaman. Jamoamizning hozirgi tarkibi bilan qo'lga kiritayotgan natijalarimizni o'zlaringiz ko'rib turibsizlar. Bu  natija ham aslida yomon natija emas.

— deya xabar beradi uff.uz nashri.