Matbuot anjumanining navbatdagi qismida “Lokomotiv” jamoasi bosh murabbiyi Andrey Miklyaev va jamoa hujumchisi Temirxo'ja Abduholiqovlar ishtirok etishdi.
Andrey Miklyaev: - Avvalo tabrik uchun tashakkur bildiraman. Bugungi uchrashuv juda asabiy tarzda o'tdi. Shu orqali bizda ham “Nasaf”da xatolar bo'ldi. Chunki bugungi o'yindagi g'alabaning bahosi juda yuqori edi. Maydonda harakat qilgan o'yinchilarda katta ruhiy bosim ham bo'ldi. Shunga qaramasdan, ya'ni yomon o'ynagan bo'lsak ham, asosiy natijani qo'lga kiritdik. Buning uchun hamma yigitlarimizga minnatdorchilik bildiraman. Natijani qo'lga kiritdik, endi qiyin bo'lsa ham shu yutug'imizni kelasi yil ham ushlashga harakat qilamiz.
Temirxo'ja Abduxoliqov: - Tabrik uchun rahmat. Klubimiz oldiga qo'yilgan vazifalarni to'liq ado etganimizdan xursandman. Bugun maydonda harakat qilgan o'yinchilarimiz katta asabiy bosim ostida o'ynashdi. O'zlaringizga ma'lum, “Nasaf” ham juda kuchli jamoa, bunday jamoa bilan o'ynash oson emas. Bugun chiroyli o'yin namoyish etmagan bo'lsak ham, natijaga erishdik. Tarixda bari-bir qo'lga kiritgan natijalar qoladi.
— deya xabar beradi uff.uz nashri.