Xabaringiz bor sports.uz internet-portali siz Aziz futbol ishqibozlariga mavsum boshidan buyon O'zbekistonda to'p surayotgan futbolchilar hayoti va faoliyatini kengroq yoritishga mo'ljallangan “Yashil maydon” loyihasini havola etib kelmoqda.
Loyihamizning bu safargi mehmoni futbol bo'yicha O'zbekiston milliy terma jamoasi a'zosi va Toshkentning “Bunyodkor” klubi futbolchisi Eldor Shomurodov bo'ldi. E'tiboringizga iqtidorli futbolchi bilan uyushtirilgan qiziqarli suhbatni havola etamiz.
- Loyihamizda ishtirok etayotganingizdan judayam hursandmiz. Avvalambor, futbolga kirib kelishingiz haqida ikki og'iz gapirib bersangiz.
- To'g'risi, yoshligim futbol bilan o'zaro chambarchas bog'liq desam aslo mubolag'a bo'lmaydi. Boisi, oilamizga futbol begona emas edi. Dadamning o'zi mamlakat birinchi ligasida “Sho'rchi Lochin” jamoasi sharafini himoya qilgan. Biroq, jarohat tufayli katta futbolni erta tark etishga majbur bo'lgan. Amakim Ilhom Shomurodovni esa barcha futbol ishqibiozlari yaxshi tanishsa kerak. Yuqorida tilga olgan insonlar sabab men ham katta futbolga qadam qo'ydim va shu darajaga etib keldim.
- Amakingiz Ilhom Shomurodov faoliyatingizda qanday o'rin tutadi?
- Shu darajaga etib kelishimda Ilhom akamning hizmatlari va o'gitlari beqiyos. Sababi, u inson doimo menga o'zining qimmatli maslahatlarini berib boradi. Kamchiliklarimni aytib, ularni bartaraf etishga yordam beradi. Futbolchilik faoliyatimdagi ko'p bilimlarni aynan shu insondan o'rganganman va hozirgacha ham bilmaganlarimni so'rab murojaat qilaman.
- “Bunyodkor”dek jamoa sizga taklif bilan chiqqanda, qalbingizdan qanday hissiyotlar o'tgan?
- Albatta, “Bunyodkor”dek klubdan taklif bo'lgani juda ham quvontirgan. Biroq, dastlab bunday jamoada o'z o'rnimga ega bo'lishim va o'z o'yinimni topishim haqida ko'proq o'ylaganman. Shukurki mana hammasi ijobiy yakun topdi.
- Yangi Zelandiyada o'tkazilgan U20 o'rtasidagi jahon chempionati haqida ham to'xtalib o'tsangiz.
- Ochig'i buni so'z bilan ifodalay olmayman. Hammasi o'zgacha bo'lgan. Buni faqat o'sha musobaqada ishtirok etganlargina his qila oladi deb o'ylayman. Ushbu musobaqada kuchli 8ta terma jamoa qatoridan joy olganimiz esa futbolimiz uchun yaxshi natija deb o'ylayman.
- Shu paytgacha urgan eng chiroyli golingiz?
- Qiyin savol (kuladi). Menimcha hozirgacha chiroyli gol urganman deya olmayman. Shunday bo'lsa-da bu mavsumda “Nasaf” darvozasiga urgan golimni nisbatan chiroyliroq deb bilaman.
- O'zingizni 20 yildan so'ng qanday tasavvur qilasiz?
- To'g'risi bu haqda o'ylab ko'rmaganman. Hozir bor e'tiborim futbolga qaratilgan. Biroq, 20 yildan so'ng ham futbolda qolishni istardim.
- Zamonaviy futbolda natija muhim, muxlislarga esa hujumkor o'yin yoqadi. Siz qay birini tanlardingiz?
- Birinchi navbatda albatta natija. Chunki, futbolda chiroyli o'yin emas, natija tarixda qoladi. Menimcha har qanday g'alaba muxlislar uchun birdek yoqimli.
- “Bunyodkor” jamoasining so'nggi yillarda OChLdagi muvaffaqiyatsizliklariga nima sabab bo'ldi deb hisoblaysiz?
- E'tibor bersangiz, “Bunyodkor”ning tarkibi asosan yoshlardan iborat. Ularning ko'pchiligiga esa xalqaro tajriba, hususan OChLdagi tajriba etishmadi. Shu sababli ham  “qaldirg'ochlar” ushbu turnirda o'tgan mavsumlarda biroz muvaffaqiyatsiz ishtirok etishdi. O'ylaymanki jamoamiz kelgusi mavsumlarda o'z mavqeyi darajasida ishtirok etadi.
- Tasavvur qiling, agar qo'lingizda sehrli o'chirgichingiz bo'lganda, siz hayotingizning qaysi davrini yoki qaysi xatolaringizni o'chirib yuborgan bo'lardingiz?
- Hech bir holatni o'chirmagan bo'lardim. Boisi, barcha kamchilik va xatolar mening shu darajaga etib kelishimga hizmat qilgan desam adashmagan bo'laman. Shuning uchun ham barchasini o'z o'rnida qoldirgan bo'lardim.
- Murabbiyingiz Sergey Lushchanning qaysi hislatlarini hurmat qilasiz?
- Sergey Lushchan bilan dastlab yoshlar terma jamoasida birga ishlaganmiz. Mana endi “Bunyodkor”da ham birga faoliyat olib boryapmiz. Sergey Ivanovichni birinchi navbatda inson sifatida qattiq hurmat qilaman. Qolaversa, uning yoshlarga ko'proq etibor qaratishi va ularga katta ishonch bilan qarashi meni quvontiradi. U o'ziga hos murabbiy. Bir so'z bilan aytganda Sergey Lushchan mehribon va talabchan ustoz.
- Jamoadagi eng yaqin do'stingiz?
- Bu borada men ayni bir jamoadoshimni ajratib ko'rsatmagan bo'lardim. Sababi, jamoamiz judayam ahil. Barchasini o'zimga yaqin insonlar deb bilaman.
- Ayni damda “Bunyodkor”da deyarli bir avlod vakillari to'p surishmoqda. Tengdoshlar bilan o'ynash osonmi yoki qiyin?
- Bu juda ajoyib. Chunki, anchadan buyon birga to'p surib kelamiz va barchamiz deyarli bir-birimizni yaxshi bilamiz. Shu sababli ham tengdoshlar bilan to'p surish ancha qulay.
- Insonni nima o'zgartirishi mumkin?
- Menima bu birinchi navbatda uning o'ziga bog'liq. O'zgaradigan odam har qanday holatda ham o'zgarishi mumkin.
- Eldor Shomurodov uchun Oliy ligadagi eng noqulay himoyachi va darvozabon?
- Ayni bir darvozabon yoki himoyachini ko'rsatib o'tishni istamayman. Chunki, barcha raqibga birdek hurmat bilan maydonga tushaman. Raqibni mensimaslik esa yomon oqibatlarga olib kelishi mumkin. Unga nisbatan qo'rquvning paydo bo'lishiga ham qarshiman. Boisi, agar futbolchi maydonda qo'rqib harakat qilsa, kutilmaganda xatoga yo'l qo'yishi mumkin.
- Inson nimaganir erishishi uchun nimadandir voz kechishi kerak. Eldor Shomurodov nimalardan voz kechgan?
- To'g'risi uzoq vaqt oilamdan yiroqda bo'lishimga to'g'ri kelgan. 5-sinfdan boshlab Qashqadaryodagi futbol akademiyasida o'qishni boshlagan kunimdan to shu kungacha uzoq vaqt oilamdan yiroqdaman.
- Yulduzlik kasaliga chalinishdan qo'rqasizmi?
- Albatta, bu nohush holatga tushib qolmaslikni istayman. Yuqorida aytganimdek, bu ham insonning o'ziga bog'liq.
- Golni qanday nishonlashni avvaldan rejalashtirasizmi yoki bu o'sha paytning o'zida sodir bo'ladimi?
- Bu narsaga oldindan tayyorgarlik ko'rmayman. Gol urganimdan so'ng qalbimda qanday hissiyotlar paydo bo'lsa shuni ifodalashga harakat qilaman.
- Sizningcha gol urish qiyinmi yoki golli uzatma berish?
- Ikkalasi ham birdek mashaqqatli. Biroq, gol urish qiyinroq deb o'ylayman.
- Omadga ishonasizmi?
- Albatta.
- Xorijdan takliflar bo'lganmi?
- Yo'q. Menga bu haqda aytishmagan.
- Milliy terma jamoa a'zosi sifatida JCh-2018 ga chiqish imkoniyatlarimizni qanday baholaysiz?
- Hali hammasi oldinda. Mundialga chiqish uchun imkoniyatlarimiz etarlicha deb o'ylaman.
Blits savollar:
    Qaysi jamoaga muxlislik qilasiz?
    “Chelsi”.
    Yoqtirgan raqamingiz?
    11.
    Qaysi rangni yoqtirasiz?
    Oq va ko'k ranglarni yaxshi ko'raman.
    Kitob yoki gazeta?
    Ko'proq kitob o'qiyman.
    Ko'p ishlatadigan so'zingiz?
    Bilmadim degan so'zni ko'proq ishlatsam kerak. Yanayam bilmadim (kuladi).
    Sevimli taomingiz?
    Osh.
    Siz yoqtirmaydigan so'z.
    Menimcha kayfiyat yo'qligida har qanday so'z yoqmasa kerak.
    O'zingizni televizor orqali ko'rish qiziqarlimi?
    Albatta.
- Mazmunli va maroqli suhbatingiz uchun katta rahmat, sports.uz internet-portali kelajakdagi faoliyatingizga omad tilab qoladi. Baxtiyor TOShTEMIROV suhbatlashdi
— deya xabar beradi uff.uz nashri.