Boks bo'yicha Olimpiya o'yinlari g'olibi Hasanboy Do'smatov va boks murabbiyi Ravshan Xo'jaevga nufuzli "Oltin Mangust" xalqaro mukofoti topshirildi.
 
O'zbekiston boks federatsiyasi matbuot xizmatidan xabar berishlaricha, Hasanboy Do'smatov va Ravshan Xo'jaev nufuzli xalqaro mukofot taqdimoti tashkil etilgan Odessa shahridagi gala-kontsertda ishtirok etib, o'z mukofotlarini qabul qilib oldi.
 
"Oltin Mangust" - xalqaro mukofoti jahon maydonlarida yuksak natijalarga erishgan sportchilarni sharaflash, sport an'analarini mustahkamlash, sog'lom turmush tarzi va sport rivoji hissa qo'shgan murabbiylar, faxriylarni e'zozlash maqsadida tasis etilgan.
 
Ushbu mukofotga 2009 yili asos solingan. 2012 yildan buyon mukofot xalqaro miqyosda beriladi.
 
Hasanboy Do'smatov 2016 yilgi mavsumda juda ko'plab yutuqlarga erishdi. Iste'dodli sportchimiz Rio Olimpiadasida faoliyatidagi eng katta yutuq - Olimpiya o'yinlari chempioni degan sharafli nomga sazovor bo'ldi.Bundan tashqari, Hasanboy Do'smatov Olimpiya o'yinlarida eng kuchli texnika egasiga beriladigan Vel Barker kubogi bilan ham taqdirlangan edi.
 
Albatta, Hasanboy Do'smatovning muvaffaqiyatlari zamirida uning murabbiyi Ravshan Xo'jaevning ham katta xizmatlari bor.
 
Har ikki yurtdoshimizga xalqaro mukofot muborak bo'lsin!
— deya xabar beradi uff.uz nashri.