Mario Balotelli faoliyati davomida birga ishlagan murabbiylar orasida Brendan Rojersni eng yomoni deb atadi. «Nitstsa» hujumchisi o'z fikrini bir nechta sabablar bilan izohladi: «Gap mashg'ulotlar jarayonida emas, uning ishlari menga yoqardi. Ammo munosabatlarimiz yomon edi, shu bois Ro-jersni yoqtirmaganman». O'z navbatida, Mario eng yaxshi ustozi sifatida Roberto Manchinini ko'rsatib, ushbu mutaxassisdan ko'p jabhada qarzdor ekanini bildirgan. Ajablanarli holat, albatta. Kutilmaganda Brendan ham javob qaytarib, italiyalik forvardning haq ekanini aytdi. «Balotelli mendan xafami, nima ham derdim, u bunga haqli. Italiyalik futbolchining transferi tavakkal edi, buni men emas, rahbariyat xohladi. Mario transfer oynasi yopilishi arafasida kelib qo'shildi va o'ylab ko'rishimga vaqt qolmagandi. Tan olaman, unga tegishlicha munosabatda bo'lolmadim. Maydonda o'yini o'xshamadi, og'ir mavsumni o'tkazdik. «Nitstsa»ga o'tgach, o'z jamoasini topgandek. Uning yutuqlaridan xursandman». Balotelli va Rojers o'zaro munosabatlarga omma oldida zamonaviy tarzda oydinlik kiritish mumkinligini isbotlashdi. Lekin Mario faoliyatidagi eng yomon murabbiyni tanlab, uning nomini matbuot orqali e'lon qilgan ilk futbolchi emas. quyida shunday ishga jur'at topgan boshqa o'yinchilar haqida so'z yuritamiz. Zlatan Ibragimovich: Xosep Gvardiola Shvetsiyalik hujumchi o'zining avtobiografik kitobida qisqa, ammo o'ta jiddiy gapirdi: «Gvardiola - men bilan birga ishlagan murabbiylar orasida eng yomoni. U - qo'rqoq». Pep bunday ayblovlar bobida Ibraning doimiy tanqidlariga uchragan Ko Adrianse hamda Zlatanni «Ayaks» mashg'ulotlaridan chetlatgan Ronald Kumandan «ilg'orlik» qildi. Marko Materatstsi: Rafael Benites Og'ir fe'l-atvorga ega italyan va so'nggi yillarning omadsiz murabbiylaridan biriga aylangan ispaniyalik mutaxassisning uchrashuvi Materatstsining faoliyati yakunlangan paytga to'g'ri keldi. O'shanda Marko «Inter» bilan EChLda g'olib chiqqan, uning Joze Mourino bilan xayr­lashish chog'ida ko'z yoshlarini tiya olmagani qayd etilgan videoyozuv tarqalgandi. Benites esa ishni portugaliyalik hamkasbining klub bazasidagi suratini olib tashlashdan boshladi. Markoning shkafida ham Jozening rasmiga ko'zi tushgach, uni yo'qotishni so'radi. O'z navbatida, Rafa tanlagan taktika bo'yicha Materatstsiga joy topilmadi. Italiyalik futbolchi esa, bunga javoban jamoaviy muhitdan zarracha xavotirlanmasligini bildirdi. Benitesning iste'fosidan keyin esa ishga astoydil kirishdi. «U - qo'rqoq, klubda alohida shaxslarni ko'rgani ko'zi yo'q», dedi Marko 2013 yilning qishida. Ispaniyalik murabbiy «Chelsi»ga o'tganidan keyin esa «Benites London jamoasi tarixidagi eng yomon shaxsga aylanadi», degandi. Rafaning «Napoli»dagi o'rnini Mauritsio Sarri egallagach, buni ham nazardan chetda qoldirmadi: «Neapolliklardagi o'sishdan aslo ajablanmadim, chunki endi ularda murabbiy boshladi». Materatstsining ispanni yomon murabbiy deb atamaganiga sabab, Benitesni umuman murabbiy deb hisoblamaydi, chog'i. Sisino: Klaudio Raneri Braziliyalik futbolchi o'z intervyularining birida «Lester» bilan Angliyada chempionlikni nishonlagan mutaxassisni yomonladi. Ular «Roma»da birga ishlashgandi. Hattoki, «tulkilar»ning APL g'olibiga aylanishgani ham Sisinoni zarracha ajablantirmadi: «Raneri to'g'ri shug'ullantirishni bilmaydi. «Roma»da uning qo'l ostida to'p surganimda, doimo qiyinchiliklarga duch kelardim. Klaudio - faoliyatimdagi eng yomon murabbiy. O'z ishida aniq tizimga amal qilmaydi, braziliyaliklarni ko'rgani ko'zi yo'q. Angliyadagi muvaffaqiyatiga kelsak, bu - shunchaki, omad. Unga yirikroq klubni topshiring, hech nimaga erisholmasligi aniq». Eslatib o'tamiz, «Roma»ni Raneri boshqarayotgan kezlari Sisino Italiya vitse-chempioniga aylandi, birinchi o'rin Mourinoning «Inter»iga boy berilgandi. Ueyn Runi: Fabio Kapello Kutilmagan tanlov, boz ustiga, Ueyn o'z fikrini izohlamadi. «Sven-Yoran Eriksson va Roy Xojson bilan ishlashdan zavq olganman, biroq bizni Fabio Kapello shug'ullantirganda, aslo rohatlanmadim. Undan ko'p narsa kutgandim. Italiyalik mutaxassis faoliyatimdagi eng yomon murabbiy sanaladi». Kapello esa bunga o'ziga xos tarzda javob qaytardi: «Runi, aftidan, inglizchani tushunmaydi. Chunki u faqat ser Aleks Fergyusondan shotland tilida ko'rsatmalar olgan». Ian Evatt: Pol Ins «MYu» va «Liverpul» yarim himoyachisining murabbiylik faoliyati qanday kechgani hamma ishqibozlarga ham ma'lum emas, qandaydir muvaffaqiyatga erishgani rost. Lekin Ins qo'l ostidagi «Blekpul»da o'ynagan Ian Evattning bu boradagi fikri o'zgacha. U birinchi navbatda, his-hayajoniga erk berdi: «Polning iste'foga chiqqanidan xursandman. Unga bu haqda matnli ma'lumot orqali xabar berishgan. Ins ayni munosabatga loyiq. Vaqtida meni ham xuddi shunday holga solgandi». Leandro Almeyda: Oleg Bloxin Faoliyatining to'rt yilini Kievning «Dinamo»siga bag'ishlagan himoyachi Braziliyaga qaytgach, ijtimoiy tarmoqlar orqali sobiq ustozining manziliga ayblovlarni yog'dirib tashladi. «Tvitter»dagi chiqishlarda asosan Oleg Bloxin va uning yordamchisi Aleksey Mixaylichenkoni rus tilida tanqid qilgan. Ko'p o'tmay, ushbu xabar o'chirilgan bo'lsada, mazkur voqea tarixga kirdi: «Oleg Bloxin - Ukrainadagi eng yomon murabbiy, u «Dinamo»ni boshqarishga munosib emas. Oleg va Aleksey klub prezidenti Igor Surkisni uyaltirib qo'­yishlari aniq». Davomi interfutbol.uz saytida.
— deya xabar beradi uff.uz nashri.