Xabaringiz bor, albatta,  milliy jamoamizning JCh-2018 uchinchi saralash bosqichidagi raqiblaridan biri - Suriya termasi guruh peshqadami forslar bilan tengma-teng o'ynab, ulardan ochko tortib oldi. Suriyaliklar shu bilan «A» guruhidagi umumiy holat, ya'ni «intriga» saqlanib qolishini ta'minlashdi. Tabiiyki, Eron termasining 2 ochko yo'qotgani bizdagi umid ham pasaymasligiga zamin yaratdi. Ochig'ini aytganda, notinchlik hukm surayotgan yurt futbolchilarining bu natijalari - chinakam jasorat. Demakki, hozirdan baralla aytish mumkin, bahorda jamoamizni Suriya termasiga qarshi o'tajak jiddiy sinov kutib turibdi. Shuni inobatga olib, raqib jamoa safida o'ynashni xohlagan futbolchilardan biri - asli Rossiyada tug'ilgan, ammo hech bir terma libosini kiyish baxtiga muyassar bo'lmagan Basel Abdulfattohning nadomatli hikoyalarini e'tiboringizga havola qilyapmiz. Chunonchi, bu achinarli taqdir tinch va farovon diyorda yashayotgan, lekin havasga arzigulik sharoitlar qadrini hali to'la-to'kis tushunib etmayotgan ayrim yoshlarimiz uchun ulkan saboq bo'lishi kerak... Tanishuv  - Otam aynan Suriyada tug'ilgan. U 1980 yili o'qish uchun Peterburgga kelib, shu erda onam bilan tanishib qolgan, — deya so'z ochadi Basel o'z tarixidan. — Katta opam, men va ukam Rossiyada tug'ilganmiz. Umuman olganda, o'zimni rus, deb hisoblayman, Rossiya esa - jonajon vatanim. Og'ir o'tgan 1990 yillarda oilamiz bilan Suriyaga jo'nab ketdik. Lekin u erda butunlay qolish xayolimizga ham kelmagandi. Keyinroq, 13-14 yoshli chog'imda Suriyaga yana bir marta bordim. Ammo uzoq muddatga emas. Shuning uchun bu mamlakat haqidagi xotiralarim unchalik batafsil emas... Albatta, hozirgi Suriyaning o'sha paytdagisidan keskin farqlanishini yaxshi bilaman. «Zenit»dagi yoshlik Basel uchun futboldagi hayot «Kirovets» nomli maktabda boshlangan. U 12 yoshigacha mazkur bilim dargohida,  o'zidan katta bolalar to'garagida futbol saboqlarini oladi. Keyin esa yigitchani «Smena» maktabi (hozirgi «Zenit» akademiyasi)ga taklif qilishadi. «Maktabni tamomlaganimdan so'ng qarshimda ikki yo'l turardi: futbol yoki o'qish? - so'zida davom etadi Abdulfattoh. — Boz ustiga, o'shanda oyog'im qattiq jarohatlangan va uzoq vaqtdan buyon futbol o'ynay olmayotgandim. Tuzalganimdan so'ng «Rubin» ko'rigiga bordim. Klubdagilar harakatlarimni kuzatib, asosiy tarkib darajasigacha o'sishim mumkinligini aytishdi. Bilasizki, o'sha paytlar Qurbon Berdiev Qozonda ajoyib muhitni shakllantirgandi. Demoqchimanki, Qozon klubida yoshlar har doim o'zlarini ko'rsatish imkoniga ega bo'lishardi. Xullas, taqdirimni «Rubin» bilan bog'lashga tayyorlanayotganimda, ya'ni Yangi yil bayrami arafasida birdan «Zenit»ga taklif qilib qolishdi. Shu tariqa bir yillik shartnoma asosida Anatoliy Davidov qo'l ostidagi yoshlar jamoasi safiga qo'shildim. Shunday qilib, Basel «Zenit» o'rinbosarlari tarkibida 2,5 mavsum to'p surib, bu vaqt oralig'ida 69ta o'yinda ishtirok etadi. «Jamoamiz chindan ham, ajoyib edi. Buni «Zenit»ning bizdan boshqa birorta o'rinbosarlar jamoasi Rossiya yoshlar ligasida g'olib chiqolmaganidan ham bilsa bo'ladi, — deb eslaydi Basel. — Bu jamoada hozir «Krasnodar» sharafini himoya qilayotgan Sergey Petrov, «Kuban»dagi Mixail Smirnov, «Ural»dagi Zabolotniy, «Amkar»dagi Komolov va Gigolaev bilan birga to'p surardik. Yana bir jamoadoshimiz Maksim Kanunnikov «Rubin»da sezilarli yutuqlarga erishdi. Galish esa «Sokol»da o'ynayapti... «Dinamo»dagi Anton Sosnin bilan 12 yildan buyon qalin do'stmiz. Sosnin o'sha paytlardayoq hammadan ajralib turardi - iqtidorli yigit edi. Ikkimiz maydon markazida birga o'ynardik, ko'pchilik duetimiz kelajagi porloq ekanligiga ishonardi. Shaxsiy fikrimcha, Antonning iqtidori etarlicha baholanmayapti. Ajabmaski, u kun kelib, Rossiya terma jamoasi safida jahon chempionatida ham to'p sursa...». Afsuski, «Zenit»ning o'sha «oltin avlodi»dan hech kim asosiy tarkibga jalb qilinmadi. «Birgina Ionov shunday baxtga muyassar bo'ldi, - deydi futbolchi. - Ammo Alekseyni bungacha ham asosiy tarkibga jalb qilib turishardi». Endi  Abdulfattohning o'ziga qaytsak, u «Zenit» o'yiniga to'laqonli qo'shilib ketolmagach, Nalchikda, Yuriy Krasnojan ko'rigida qatnashadi. Davomi "INterFUTBOL" gazetasida.
— deya xabar beradi uff.uz nashri.