Ma'lumki, bu yil o'z tarixida birinchi marta oliy liga bahslarida ishtirok etgan Toshkentning «Obod» klubi finish marrasiga turnir jadvalining 14-pog'onasida etib keldi va kuchlilar safida qolish vazifasi uddasidan chiqdi. E'tiborlisi, jamoa hujumchisi Shohruz Norxonov 14ta gol bilan to'purarlar poygasida «Lokomotiv» a'zosi Temurxo'ja Abduxoliqov va «Metallurg» vakili Zohid Abdullaevdan keyin 3-yaxshi natijani qayd etdi. Xullas, iste'dodli futbolchi mavsumning bosh kashfiyotlaridan biri bo'ldi. O'ylaymizki, Shohruzning chempionat yakunlari va jamoa oldiga qo'yilayotgan yangi vazifalar xususidagi fikrlari ko'pchilikni befarq qoldirmaydi. Shularni hisobga olib, «Obod»ni rostakamiga obod qilgan goleadorni maxsus suhbatga chorladik. — Shohruz, fikringizcha, 2016 yilgi mavsumning qaysi davri «Obod» uchun nisbatan qiyin kechdi? — Oliy liganing so'nggi 3-4ta turidan o'rin olgan o'yinlar, xususan, «Andijon», «Olmaliq» va «Paxtakor» klublariga qarshi uchrashuvlarni kuchli bosim ostida o'tkazdik, desam adashmayman. Negaki, aynan shu bellashuvlar natijalariga ko'ra, birinchi ligaga tushib ketadigan va elitada qoladigan jamoalar taqdiri hal etildi. O'sha payt bu borada biz bilan raqobatlashib turgan «Andijon» bilan Toshkentda durang o'ynaganimiz juda qo'l keldi. Sababi, shu durang tufayli andijonliklar bilan o'zaro o'yinlardagi ustunlikni saqlab qolishga erishdik (Andijondagi uchrashuvda «Obod» 1:0 hisobida g'alaba qozongandi). Bordiyu, o'sha o'yinda «Andijon» 3 ochko olish uddasidan chiqqanida, jamoamiz qiyin ahvolda qolardi. Ya'ni vodiyliklar so'nggi turdan oldin turnir jadvalida bizdan o'zib ketishardi... — «Obod» mavsum davomida naq 18 marta mag'lubiyatga uchradi. Ulardan eng alamlisi sifatida qaysi birini ko'rsatasiz? — Hech ikkilanmay javob beraman: o'z maydonimizda «Sho'rtan»ga yut­qazganimiz kuchli og'riq uyg'otdi. Chunonchi, tengma-teng kurash ostida kechgan o'sha o'yinda 2:1 hisobida oldinga chiqib olgandik. Ammo raqiblar uchrashuvning ikkinchi yarmida jamoamiz darvozasini 2 marta nishonga olib, g'alabani ilib ketishdi. Yashirishning hojati yo'q: imkoniyatni boy berganimiz alam qilgan bo'lsa-da, raqibning irodasi va tajribasiga qoyil qolgandik. — Shuning barobarida jamoangiz bir qator uchrashuvlarda yaxshigina taassurot uyg'otdi. Xo'sh, mavsumdagi eng yorqin o'yin...? — Aslida futbolchilarimiz har bir tur bahsida bor kuch-g'ayratlarini ishga solib, mazmunli o'yin ko'rsatishga harakat qildilar. To'g'ri, harakatlarimiz ba'zida o'xshadi, gohida sira qovushmadi. Shaxsan men «Lokomotiv»­ga qarshi o'yinimizni mavsum davomida kuzatilgan eng yorqini o'rnida ko'rsataman. O'shanda bo'lajak chempionga har tomonlama munosib qarshilik qila oldik, deb o'ylayman. Raqib maydonida bo'lib o'tgan va 1:1 hisobi qayd etilgan o'yinda hattoki, g'alaba qozonishimiz ham hech gap emasdi. Nima bo'lishidan qat'iy nazar, musobaqa peshqadami bilan mehmonda durang o'ynaganimizning o'ziyoq muxlisu mutaxassislar tomonidan katta natija sifatida qabul qilindi. — Aytingchi, mavsum yakunida klub rahbariyati jamoaning qayd etgan natijasi va ko'rsatgan o'yinlari sifatidan qoniqdimi? — Menimcha, qoniqish hissi yo'q emas. Sababi, suhbatimiz avvalida aytganimdek, agar voqealar rivoji sal boshqacha rivojlanganida, jamoamiz birinchi ligaga tushib ketishi ham mumkin edi axir. Umuman olganda, oliy liga debyutanti uchun chakki o'ynamadik, menimcha. Harqalay, yangi ishtirokchining ilk mavsumda kuchlilar safida qolishining o'zi katta gap. — Shundayku-ya, ammo «Obod» chempionatda bundan yaxshiroq natijaga erishishi mumkin edi. Bu fikrga qo'shilasizmi? — Ha. Teng kurashlar ostida kechgan, ammo omad etishmasligi yoki boshqa bir sabab bilan foydamizga hal bo'lmagan ba'zi o'yinlarda g'alaba qozonganimizda, bemalol yuqori o'nlikdan joy olardik. Ammo bunday maqsad va vazifalar jamoa oldiga keyingi mavsumda qo'­yilsa, maqsadga muvofiq bo'ladi. Zero, mana, yigitlarimiz oliy liga muhitiga moslashib, ma'lum darajada tajriba to'plashdi va shu asnoda ularda dadillik oshdi. Demoqchimanki, yakunlangan mavsumning ba'zi pallalarida bizga aynan tajriba va dadillik etishmadi. — Klub rahbariyati tomonidan jamoa a'zolariga yaratib berilayotgan shart-sharoitlar haqida nima deya olasiz? — Jamoa rahbarlaridan xursand­miz. Zero, ular professional klub darajasidagi sharoitlarni muhayyo qilishgan. Ya'ni nolishga asos yo'q. Xususan, mavsum avvalida berilgan va'dalar ortig'i bilan bajarildi. Eng asosiysi, rahbariyat jamoaga mavsumning oxirgi damlarigacha ishonib, futbolchilarni har tomonlama qo'llab-quvvatlab turdi. Aynan shu ishonch va ko'mak bizga qo'shimcha kuch va dalda berdiki, yakunda ko'zlangan maqsadga erishdik. Agar aksi bo'lganida, «Obod» ligada qolish vazifasini bajarolmasdi. Xullas, rahbariyatning to'g'ri yondashuvi natija ko'rsatishimizda muhim omil bo'lib xizmat qildi. — Endigi rejalar qanday? Jamoaning o'quv-mashg'ulot yig'inlarini qachon va qaerda boshlashi ma'lummi? Davomi iff.uz saytida
— deya xabar beradi uff.uz nashri.