Tunov kuni Mirjalol Qosimovning «Alaniya» tarkibida Evropa Chempionlar Ligasi doirasida «Liverpul»ga qarshi kechgan o'yinda qanday to'p surganini qayta ko'rib qoldik. Internet qatlarida saqlanib turgan 20 yillik videotasvirning sifati u qadar yaxshi emas va bu tabiiy hol. Ammo shu xira kadrlar-da ancha-muncha yorqin xotiralarni uyg'otib yuborar ekan. Ha, Mirjalol Qosimov endilikda futbol o'ynamaydi, butsasini mixga ilganiga 10 yildan oshdi. Shuningdek, ayni payt murabbiylik ishidan ham chetda, ammo bu sohadagi faoliyati hali ancha davom etishiga ishonamiz. Shunchaki, hozir uning uchun biroz tanaffus yuzaga kelgan va ishdan xoli holda hordiq chiqarmoqda. Biz aynan shu tanaffusdan foydalanib, O'zbekiston terma jamoasi sobiq bosh murabbiyini eksklyuziv suhbatga tortdik. Zero, Mirjalol Qo'shoqovich anchadan buyon matbuotda chiqish qilmay qo'ydi. O'ylaymizki, uning mavsum yakunlari xususidagi xulosalari ko'pchilikni qiziqtiradi. OLIY LIGA BO'YIChA - Mirjalol aka, mana, O'zbekiston chempionatining nav­batdagi mavsumi ham yakuniga etdi. Siz bu safar oliy liga o'yinlarini ilk bora chetdan, ya'ni muxlis sifatida to'liq kuzatib bordingiz. Harqalay, oldin hech  bunday bo'lmagandi. Xo'sh, taassurotlar qanday? - Yaxshi. Qiziqarli o'yinlar soni ko'paydi, ancha-munchasini stadionda bevosita tomosha qilishga ham  vaqt topdim. Ha, aytganingizdek, o'yinni muxlis rolida kuzatish boshqacha-da, baribir. Mana, joriy yil chempio­natda kutilmagan natijalar ko'p uchradi. G'oliblik uchun asosan 2ta jamoa o'rtasida kurash kechganiyu, yakunda «Lokomotiv»ning nihoyat, 5 yillik urinishlardan so'ng oltin medalni  qo'lga kiritgani barchaga ma'lum. O'z o'rnida, «temiryo'lchilar»ni ulkan zafar bilan tabriklayman. Sabr-toqat bilan olib borilgan ish har doim samara keltiradi va «Loko» misolida bu yana bir bora o'z isbotini topdi. «Temiryo'lchilar» chempionlik uchun kurash boshlagan payt men «Bunyod­kor»da ishlardim. O'shanda «Loko»ning urinish-harakatlari etarli bo'lmagandi, chunki «Bunyodkor» va «Paxtakor» klublari kuchliroq edilar. Nihoyat, bu jamoa ham oltin medalga ega chiqdi. Alohida ta'kidlash kerak, uning ushbu g'alabasi zamirida uzoq yillik mehnat yotibdi. - Biroq «Lokomotiv» uchun bu yilgi mavsum ham oson kechgani yo'q. Ayniqsa, ikkinchi davrada jamoaning ishlari ortga ketib, hattoki, chempionlik taxtiga ko'tarilishi biroz shubha ostida qolgandi. Sizningcha, jamoaning orada barqarorlikni ushlab turolmaganiga sabab nima? - Asosiy sabab - Chempionlar Ligasi. Har qanday jamoa 3ta musobaqada birdek kurash olib borishda ma'lum qiyinchiliklarga uchraydi. Boz ustiga, bu yil Chempionlar Ligasida klublarimizdan faqat «Lokomotiv» nimchorak finalga o'tdi, uning chempio­natdagi asosiy raqiblari esa guruhdayoq kurashni to'xtatdilar. Menimcha, ayni shu holat oliy liga bahslarida boshqa jamoalarga ma'lum darajada ustunlik berdi. Shuningdek, «Lokomotiv» futbolchilari mudom O'zbekiston terma jamoasi yig'inlariga ham chaqirildilarki, bu ham klubning o'yinlariga ta'sir etishi turgan gap. Xullas, «Loko»ning ishlari biroz ortga ketishida o'ziga xos omillar bor edi. Darvoqe, shu holat ortidan chempionlik kurashida «intriga» yuzaga kelgandek ko'rindi. Agar «Bunyodkor» kutilmagan ochko yo'qotishlarga yuz tutmaganida, umumiy vaziyat mutlaqo boshqacha bo'lishi ham mumkin edi. Ehtimolki, biz oxirgi turda chempionlik jangini kuzatardik.. Ammo «qaldirg'ochlar» ham o'z navbatida, «Andijon» va «Navbahor»ga qarshi bahslarda qimmatli ochkolarni boy berishdi va «Lokomotiv»ga qo'shimcha engillik yaratishdi. - Oliy ligani kuzatib borgan mutaxassis sifatida o'zingizga eng ma'qul tushgan o'yinni ko'rsata olasizmi? - Bittagina o'yinnimi? - Yo'q, ko'proq bo'lsa ham, mayli. - Shaxsan menga «Lokomotiv» - «Obod» uchrashuvi juda yoqdi. Biri chempionlik uchun kurashayotgandi, ikkinchisi esa ligada qolish uchun. Ikki raqibga ham ochko juda zarurligi boismi, maydonda shiddatli kurash bordi. O'zi favorit va autsayder o'rtasidagi to'qnashuvda ko'pincha shunday keskinlik ufurib turadi. Yana «Buxoro» va «Lokomo­tiv»ning o'zaro o'yinini ham alohida ajratib ko'rsatishim mumkin. To'g'ri, Buxoroda kechgan bu uchrashuvni televizor orqali ko'rdim, ammo maydonda qiziqarli futbol namoyish etildiki, xuddiki, barchasini stadionda kuzatgandek bo'ldim. Aynan shunday o'yinlar oliy liga mazmuni va saviyasini oshirishi aniq. YaNGI ISh HAQIDA - Mirjalol aka, har doim ish bilan band bo'lishga o'rgangan kishisiz. Birdan ma'lum vaqt bo'sh qolish qanday ta'sir qildi? - Har bir narsaning o'z hikmati bor, deyishadi. Bu gap bejiz paydo bo'lgan emas. Harakat qilsangiz, har narsadan plyus tomonini topish mumkin. O'z misolimda aytsam, yaxshigina dam oldim, shu bahona sog'ligimni tikladim, oilam davrasida bo'ldim. Bilasiz, futbolchilik faoliyatimni yakunlaganimdan keyin darhol murabbiylik ishini boshlab yuborgandim. Bu sohaning nechog'li og'irligi ko'pchilikka ma'lum. Deylik, mudom bosim ostida yurasiz. Boz ustiga, meni eski jarohatlar ham ancha qiynab qo'ygandi. Axir 20 yil futbol o'ynagandan keyin turli holatlar bo'ladi. Misol uchun, bir-ikki kundan keyin  maydonga tushish zarurati tug'ilgan paytlar ancha-muncha jarohatga qarab o'tirmasdik. Endi imkoniyatdan foydalanib, o'sha jarohatlarni ham davolatdim, ya'ni salomatligimga e'tibor qaratdim. Qolaversa, oldin oilam bilan birga bo'lish uchun ishdan vaqt orttirolmasdim. Hattoki, ba'zan bayram kunlari ham yaqinlarim oldiga kelolmaganman. Endi esa farzandlarim va nevaralarim yonidaman, biroz jonlariga ham tegdim, shekilli (kuladi). - Agar xohlasangiz, sizga har doim ish topilsa kerak. Deylik, yaqinda ham internetda qaysidir klubdan taklif olganingiz haqida xabar berildi... Davomi iff.uz saytida.
— deya xabar beradi uff.uz nashri.