“Lokomotiv” jamoasi 2016 yilgi mavsumni juda ko'tarinki ruhda o'tkazdi va yakunda o'zi ishtirok etgan 3 ta musobaqaning 2 tasida zafar quchdi. Oliy liga va mamlakat kubogida “Temiryo'lchilar” chempionlikka erishgan bo'lsa, Osiyo Chempionlar Ligasida chorak finalga qadar etib borildi.

Jamoaning bunday muvaffaqiyatli mavsum o'tkazishida esa tarkibda ahil va ajoyib futbolchilarning to'plangani ayni muddao bo'ldi. Mavsum sarhisobini qilar ekanmiz, qaysi futbolchi nechta uchrashuvda maydonga tushgani va necha daqiqa o'ynagani haqida ma'lumotlarni e'tiboringizga havola etishga qaror qildik. Shu o'rinda ta'kidlash joizki, “Lokomotiv” 2016 yilgi mavsumda 47 ta rasmiy uchrashuv o'tkazdi. 3 ta musobaqa doirasida o'tgan ushbu o'yinlarda eng ko'p maydonga tushgan ikki futbolchi – jamoamiz sardori Temur Kapadze va to'purari Temurxo'ja Abduxoliqov bo'ldi. Har ikki o'yinchi 46 martadan maydonga tushishdi, ya'ni 29 tadan Oliy liga o'yinlarida, 7 martadan kubok bahslarida, 10 martadan OChLda. O'yinlar davomida maydonda eng ko'p daqiqa harakat qilgan futbolchi esa Abduxoliqov bo'ldi. U jami 3631 daqiqa o'ynash imkoniyatiga ega bo'ldi. Kapadzeda esa bu ko'rsatkich – 3518 daqiqani tashkil etmoqda. Qiziq jihati shundaki, mohir yarim himoyachi Sanjar Shoahmedov Oliy liga doirasida barcha 30 ta uchrashuvda maydonga tushgan yagona o'yinchi bo'ldi. U jami musobaqalarda 44 marta o'ynadi. Murabbiylar Shoahmedovga OChL doirasidagi barcha o'yinlarda o'ynash imkonini berishgan bo'lsa, kubok bellashuvlarida u 4 marta maydonga tushirildi. Shuningdek, Kaxi Maxaradze va Sardor Mirzaev 43 tadan o'yinda, Marat Bikmaev, Salim Mustafoev hamda Oleg Zoteev mavsum davomida 40 tadan uchrashuvda o'yin amaliyotiga ega bo'lishdi.
— deya xabar beradi uff.uz nashri.