O'tgan hafta futbolimizda muhim ahamiyatga molik ikki uchrashuvi bo'lib o'tdi - biri oliy ligaga o'tish o'yini, ikkinchisi esa O'zbekiston kubogi finali. «Navbahor» va «Norin» o'rtasida kechgan bahs haqida «InterFutbol»ning avvalgi sonida gaplashganmiz. O'zidan u qadar yorqin xotiralar qoldirmagan o'sha uchrashuvni, tablosi yo'q hakamlaru, qorli maydondagi oq to'pni yana bir bor eslashni istamaymiz. Yaxshisi, e'tiborni O'zbekiston kubogi finaliga qaratganimiz ma'qul. Zero bu uchrashuv qanday ajiotaj ostida o'tganini hammamiz yaxshi bilamiz. Buning uchun Samarqand ahliga ulkan rahmat! Endi mana shu o'yin timsolida o'zbek futbolidagi muxlislik masalasini ko'rib chiqsak... TRIBUNALAR TO'LGANDA... Samarqandda o'tkazilgan o'yinning eng yaxshi tomoni - muxlislik bo'ldi. «Lokomotiv» va «Nasaf» juda zo'r o'ynab yuborishdi, deyishdan yiroqmiz, ammo ishqibozlikka har qancha qoyil qolsa arziydi. Aynan ular uchun ham o'zbek futbolini tomosha qilging keladi. Bunday bahsni o'tkazib yuborgan kishi o'zini kechirmasligi turgan gap. Agar ashaddiy muxlis bo'lsa, albatta. Kubok finalida biz istagan hamma narsa ro'y berdi, yaxshi muhit, to'lib-toshgan tribuna va haqiqiy bayram kayfiyati. Ishoning, buning bahosi o'ylaganimizdan ko'ra ancha yuqori. Nima uchun? Chunki «Lokomotiv»-«Nasaf» bahsi haftaning o'rtasida, qoq tushda, hamma ish bilan band bo'ladigan vaqtda o'tkazildi. Lekin shunda ham muxlislar stadionga keldilar. Millionlar o'yini hamisha joy va makon tanlaydi. Samarqandda esa futbolni qanchalik yaxshi ko'rishlaridan xabardormiz. Kubok finalini tomosha qilish asnosida bir haqiqat o'z isbotini topdi: xalq futbolni chindan sevsa, PFL yo'l qo'ygan kamchiliklar, o'yinning noqulay vaqtga belgilanishi ham tomoshabinlarning stadionga kelishlariga to'sqinlik qilolmas ekan. NOQULAY VAQT Aslini olganda, hatto futboli o'ta rivojlangan o'lkalarda ham ish vaqtida o'tkaziladigan o'yinlarga muxlis ko'p kelmaydi. Chunki bu vaqtda qizg'in mehnat jarayoni hukm suradi. Bu esa tashkilotchilarga ma'qul emas, axir bunaqada ularning bozori kasod bo'ladi. Shu bois ham o'yinlar dam olish kunlari yoki ish vaqtidan tashqari muddatga qo'yiladi. Evropa Chempionlar Ligasi bahslarining kechki vaqtda o'tkazilishining sababi ham shunda. Ular haftaning seshanba yoki chorshanbasida, kunning qoq o'rtasida o'yin o'tkazishni hech qachon ma'qullashmaydi. «Pulni havoga sovurish», deganda ular aynan shu narsani tushunadilar. Axir qo'shiqchi ham kontsertiga odam tushmasa ashula aytmaydi-ku. Evropada futbol shou-biznes darajasiga chiqib bo'lgan, muxlisi yo'q stadionda to'p surishning qizig'i yo'q. O'zbekiston kubogi finalini tomosha qilarkansiz, stadionga tushgan muxlislarni ko'rib haqli savol tug'iladi: Samarqandda bekorchilar ko'pmi? Albatta, unday emas. Bu viloyatda futbolning ashaddiy ishqibozlari bor. Ular millionlar o'yini jozibasidan bahra olish uchun albatta vaqt topishadi. Garchi buning uchun muhim ishlaridan voz kechishga to'g'ri kelsa ham. Futbol aynan shunday fidoyi muxlislar tufayli ham tarovatini yo'qotmaydi. Davomi iff.uz saytida.
— deya xabar beradi uff.uz nashri.