Futbol tojdorlari orasida etakchilik qilayotgan Braziliya milliy termasi yangi asrda negadir etakchiga xos o'yinini ko'rsatolmayotgandi. Deylik, jamoa o'z maydonida o'tgan JCh-2014da sharmandali natija qayd etdi, keyin omadsizlik Amerika kubogida ham davomiylik oldi. Shu tariqa dahshatli «pentakampeon»ning nufuzi keskin pasayib ketdi. Lekin braziliyaliklar navbatdagi mundial saralash musobaqasida o'z nomlari va yuksak maqomlariga munosib tarzda qatnashmoqdalar. Xo'sh, ijobiy o'zgarishlarning asosiy omili nima? «Selesao»ni kimlar qayta jonlantirishdi? Braziliya termasiga kim ustozlik qilmoqda? 2014 yilning yozida Luiz Felipe Skolari Braziliya futboli tarixidagi eng sharmandali sahifani «bitdi» va haqli ravishda yuksak lavozimdan ayrildi. Endilikda bundan 35 yil muqaddam aynan Skolari tomonidan kashf qilingan iqtidor sohibi milliy jamoa tarixini qaytadan zarhal harflar bilan yozishga bel bog'lagan. Ha, Skolari bir paytlar ko'p sonli jismoniy tarbiya o'qituvchilari qatori ovloq maktablardan birida futbol jamoasiga ustozlik qilardi. Yosh yigitlar orasida 10-raqamli bolakay Felipaoga juda yoqib qolgandi. Xullas, murabbiy qanchalik qattiqqo'l diktator bo'lmasin, shu bolakayga keng imkoniyat berardi. Bir kuni Skolari boshqaruvidagi «Kashias» jamoasi Rio-Grande-de-Sulda uyushtirilgan turnir doirasida maydonga tushar ekan, murabbiy boshlang'ich tarkibni e'lon qilish jarayonida bolakayga yaqinlashadi: «10-raqam, Tite». Tabiiyki, yigitcha ajablanib, shoshib qoladi. Axir uning ismi Ade edi. Tite ismli bola esa aslida boshqa raqam ostida, boshqa pozitsiyada to'p surardi. Qisqasi, Skolari ularni adashtirib qo'ygandi. Qarangki, Adega yangi taxallus yoqib tushadi va u shu tariqa Tite nomi ostida maydonga tusha boshlaydi. Mahalliy lahjada «Chichi», deya talaffuz qilinadigan Tite nomini olgan bolakay Skolarining sadoqatli shogirdlaridan bo'lib, ustozi hurmatini mudom joyiga qo'yardi. Aslida ularning futbolga nisbatan munosabatlari turlicha - Felipao hisob-kitobni xush ko'radigan pragmatik, Tite esa hujumkor o'yin tarafdoridir. Aytgancha, ularning oilaviy do'stliklari 2011 yilga qadar davom etdi. Braziliya terma jamoasining amaldagi bosh murabbiyi o'sha vaqt «Korintians»ni boshqarayotgan va bu jamoa chempionlik uchun «Flumenense» bilan raqobatlashayotgandi. Hal qiluvchi bahsda «Flu» Skolari rahbarligidagi «Palmeyras»ga qarshi maydonga tushgandi. Ana shu uchrashuv natijasi Tite ta'bini xira qildi. Zero, Felipao o'z jamoasini «Flu»dan engilishga majbur etib, qadrdon tanishini g'oliblik nash'asidan mahrum qilgandi... Titening faoliyatida gollivudcha stsenariylarga tortadigan o'tkir syujetli voqealar yo'q - kasbdoshlaridan deyarli farq qilmaydigan murabbiy futbolchi sifatida Braziliya, Portugaliya va Paragvay maydonlarida to'p suradi, 27 yoshida esa, og'ir jarohatga yo'liqib, naq 7 marta jarrohlar stoliga yotishga majbur bo'ladi. Shundan keyin butsasini mixga ilib, Braziliya futbol piramidasining turli tabaqalarida faoliyat yuritadi. Jumladan, «Korintians» bilan barcha sovrinlarni qo'lga kiritadi. Aniqroq aytsak, Tite jamoasi 2011 yili ichki chempionatda, 2012 yili esa Libertadores kubogi va Klublar o'rtasidagi JChda g'olib chiqadi. Uning shogirdlari qit'alararo turnirning hal qiluvchi bahsida «Chelsi» ustidan 1:0 hisobida ustun kelishgandi. Tite «Selesao»ni qabul qilishdan oldin yana bir yil «Korintians»ni boshqardi. Natijada klubdagi samarali xizmatlari ortidan tan olingan mutaxassislar e'tirofiga erishdi. «Ayni payt Braziliyada Titedek malakali murabbiy yo'q, hisobi. U raqobatbardosh jamoa shakllantirishga usta, futbolchilar ko'ngliga muammosiz yo'l topadi, ilmiy ishlanmalari yaxshi samara berishiga ishonadi»,-degandi San-Pauludagi xususiy murabbiylar maktabi rahbari Eduardo Tega. Mana, ruhshunoslik sohasida yuksak qobiliyati borligini isbotlagan Tite faoliyati davomida Jusiley, Bruno Sezar, Elias va Paulino kabi yulduzlarni kashf etdi. Ish joyida qandaydir mojarolar yuzaga kelishi oldini oldi. Termadagi faoliyatini esa Dunganing ikki yillik boshqaruvi payti ko'zga tashlangan qora ro'yxatni yo'qotish bilan boshladi. Deylik, Neymardan sardorlik bog'ichini qaytarib olishni hujumchini ranjitmagan holda, xamirdan qil sug'urgandek amalga oshirdi: «Neymar hali yosh, sardorlik qilishga ulguradi!» Davomi iff.uz saytida.
— deya xabar beradi uff.uz nashri.