Joriy mavsum Toshkentning «Lokomotiv» klubi uchun kutilganidan ham omadli keldi. Jamoa ham chempionlik, ham kubokni qo'lga kiritib, «oltin dubl»ga erishdi. Shu tariqa «temiryo'lchilar» bir mavsumda har ikki sovrinni qo'lga kiritgan beshinchi jamoaga aylanishdi. Mirko Yelichich va Andrey Miklyaev shogirdlari OChLning chorak finaliga qadar etib borib, bo'lajak vitse-chempion «Al-Ayn»ga ikki o'yin natijasiga ko'ra imkoniyatni boy berishdi. Umuman olganda, «Loko» qit'a musobaqasida ham yomon taassurot qoldirmadi. Jamoa kelasi yili Osiyoning eng nufuzli musobaqasini to'g'ridan-to'g'ri guruh bosqichidan boshlaydi. Biz «Nasaf»ga qarshi kechgan kubok finalidan so'ng «Lokomotiv» himoyachisi Bobur Yo'ldoshevdan intervyu oldik. E'tiborga molik jihati, iste'dodli futbolchi 2010 yildan beri «Lokomotiv» sharafini himoya qilib kelyapti. U boshqa klublarda o'ynamagan. - Bobur, avvalo, O'zbekiston kubogi qo'lga kiritilgani bilan tabriklayman. Suhbatimiz boshida final haqidagi fikrlaringiz bilan o'rtoqlashsangiz. - Tabrik uchun rahmat. Hal qiluvchi bahs juda qiziqarli kechdi. «Nasaf» ham yorqin taassurot qoldirdi. Raqib jamoa futbolchilari oxirigacha kurashishdi. Lekin biz uchrashuv boshida tezkor gol urib, g'alaba qozonishga muvaffaq bo'ldik. Shundan so'ng ham darvozani ishg'ol qilish uchun ko'plab vaziyatlar yaratganimizga qaramay, ulardan unumli foydalana olmadik. Asosiysi, kubokni qo'lga kiritganimizdan xursandmiz. - Tezkor gol «Lokomotiv»ning ishini engillashtirdimi? - Bunday demagan bo'lardim. Shunchaki, hisobni ochganimizdan so'ng xotirjamroq harakat qildik. - O'yinga qanday taktika tanlangandi? - Hujumkorlikka urg'u berdik. Murabbiylar ilk daqiqalardan ustunlikni o'z tomonimizga og'dirib olishimiz lozimligini uqtirishgandi va buning uddasidan chiqdik. - «Nasaf» bilan bu yil uch marotaba to'qnash keldinglar. Mana shu o'yinlardan qaysi biri eng qiyini bo'ldi? - Hammasi ham murakkab kechdi. Lekin ular orasida eng shiddatlisi Toshkentda o'tkazildi. Chempionlik masalasini uzil-kesil hal qilgan o'sha o'yinda biz 3:2 hisobida g'alaba qozongandik. Dramatik ko'rinish olgan uchrashuvdan so'ng muxlislarimiz uylariga juda yaxshi kayfiyatda qaytishgandi. - Kubok finalining Samar- qandda o'tkazilganiga munosabatingiz qanday? - Albatta, ijobiy. Har doim ham muxlislar bilan to'lgan stadionda o'yin o'tkazavermaysiz. Qolaversa, futbol bayramlarining viloyatlarga taqdim etilishini qo'llab-quvvatlayman. Kubok finalini tomosha qilish uchun minglab muxlislar kelishdi, ayrimlar arenaga kira olmay, tashqarida qolib ketishdi. Tribunalar muxlislar bilan to'lsa, futbol jozibasi ortaveradi. Bu esa o'yinchilarga qo'shimcha kuch bag'ishlaydi. Finallarni viloyatlarda o'tkazish an'anasi davom etishi tarafdoriman. - Adashmasam, bu siz qo'lga kiritgan ikkinchi kubok bo'ldi, shundaymi? - Ha, ilk bor 2014 yili «Lokomotiv» safida ushbu sovringa ega chiqqandim. Lekin bu galgisi o'zgacha taassurot qoldirdi. «Oltin dubl» baribir, boshqacha bo'lar ekan. - Maydonning holati yaxshi edimi? - Bemalol futbol o'ynasa bo'ladi. Buning uchun Samarqand viloyati futbol federatsiyasi hamda «Dinamo» klubi rahbariyatiga minnatdorchilik bildiraman. Barcha sharoitlarni yaratib berishdi. Maydon qordan butunlay tozalandi. Kuzning so'nggi kunida o'yin o'tkazdik, sovuq ob-havo sharoiti hukm surgan paytlarda chimning holati yaxshi bo'lmaydi. Shunga qaramay, tashkilotchilar keng ko'lamdagi ishni amalga oshirishdi. - Bu yil «Lokomotiv» uchun juda omadli keldi. Taassurotlar bir olam bo'lsa kerak? - Xuddi shunday. «Lokomotiv» klubi rahbariyati, murabbiylar, futbolchilar va jamoamiz muxlislari bu onlarni uzoq kutishgan edi. Nihoyat, orzular ro'yobga chiqdi, maqsadimizga erishdik. O'zbekistonning eng kuchli jamoasiga aylandik. - Mavsum oson kechmagani aniq. Ayting-chi, qaysi bahslar chempionlik yo'lidagi eng qiyini bo'ldi? Davomi iff.uz saytida
— deya xabar beradi uff.uz nashri.