Mavsum yakunlariga ko'ra, «Erudit Sport» gazetasi o'z odatiga binoan, «yil kashfiyoti»ga aylangan futbolchilarni saraladi. E'tiborlisi, ular orasida «Dinamo» futbolchilari ham bor. Joriy mavsumda ham bir qator yosh iqtidorlar porlab chiqishdi. To'g'ri, bu yilda yoshlarimiz Jahon Chempionatiga chiqa olishmadi, lekin futbolimizga yangi nomlar kirib kelishdi.
JASUR YaXShIBOEV
Klubi: «Paxtakor».
Yoshi: 19.
Bahraynda bo'lib o'tgan yoshlar o'rtasidagi Osiyo Chempionati ko'pchiligimizni xursand qildi. Jamoa Jahon Chempionatiga chiqa olmagan bo'lsa-da, futbolchilar ajoyib o'yin ko'rsatishdi. Bu tarkibda Jasur Yaxshiboev alohida ajralib turdi. Uning texnikasi va to'p uzatishlari haqiqiy professional futbolchilarni eslatib yuboradi. Jasur «Paxtakor» a'zosi hisoblanadi va Osiyo Chempionatidan keyin u klubining asosiy tarkibidan ham o'rin olishga intildi. Milliy terma jamoa futbolchilari bilan Janubiy Koreyaga qarshi o'yinga tayyorgarlik doirasida birga shug'ullanishga muvaffaq bo'ldi. Shu ketishda davom etsa, undan ko'p narsa kutsa bo'ladi.
DOSTON IBRAGIMOV
Klubi: «Dinamo».
Yoshi: 19.
Samarqandning «Dinamo» klubi futbolchisi Doston Ibragimov ham Bahrayndagi Osiyo Chempionatida porlab chiqdi. Yarimhimoyachi musobaqada 3 ta golga mualliflik qildi. Uning chap qanotdan uyushtirgan yurishlari ko'pchilikning yodida qolgan. Yaxshiboevdan farqli o'laroq Doston «Dinamo» safida Birinchi Liga o'yinlarida muntazam qatnashib keldi. U klubida ham 3 ta gol, 4 ta golli pas muallifi bo'ldi. «Dinamo» Oliy Ligaga chiqqanini inobatga olsak, Doston yangi mavsumda Oliy Ligada ham o'zini ko'rsatishi mumkin.
ShOHRUZ NORXONOV
Klubi: «Obod»
Yoshi: 23
Ko'pchilik Neymarga o'xshatadigan «Obod» futbolchisi Shohruz Norxonov muxlislarning yoqimtoyiga aylanib ulgurdi. U joriy mavsumda Oliy Ligada 14 ta gol urishga muvaffaq bo'ldi va to'purarlar ro'yxatida uchinchi o'rinni egalladi. Klubdagi o'yinlarini inobatga olib, Samvel Babayan uni milliy terma jamoaga ham chaqirdi. Hujumchi jussasi kichik, lekin kurashuvchan. U jamoasining etakchilaridan biri. Oliy Ligada qolish uchun kurashgan klub safida to'purarlar ro'yxatidan joy olishning o'zi ko'p narsani anglatadi. Futbolchi keyingi mavsumni qaysi klubda boshlashidan qat'iy nazar, Shohruz o'sishda davom etishi shart.
AMIRJON SAFAROV
Klubi: «Dinamo».
Yoshi: 21.
Samarqandning «Dinamo» klubi safida ajoyib mavsumni o'tkazgan Amirjon uchun bu yil katta futboldagi birinchi yil bo'ldi. Birinchi Ligada bo'lsa ham 21 yoshda 23 ta gol urish juda yaxshi natija. U yoshligidan golni his qilishni boshladi va jamoasida etakchilardan biriga aylandi. Uni milliy terma jamoamizning doimiy hujumchilariga raqobatchi sifatida ko'rsatmoqchi emasmiz, lekin goleadorlar kamayib ketgan futbolimizga shunday yoshlar kerak. Uning Oliy Ligada ham shunday ko'p gol urishi kafolatlanmagandir, shunday bo'lsa-da, Amirjon bitta bosqichni ishonchli yakunladi. Jamoasi bilan Birinchi Liga g'olibi bo'ldi. To'purarlar poygasida ikkinchi bo'ldi. Keyingi yil yangi davrga ko'tarilishni niyat qilgan «Dinamo» bilan birga Safarovning ham o'sishini juda xohlardik. Safarov ham Norxonov izidan borsa ajabmas. Har holda Shohruz ham o'tgan mavsum 22 yoshida Birinchi Ligada to'purar bo'lgan, bu yil esa 23 yoshida Oliy Ligada o'zini ko'rsatdi.
BOBUR ABDUHOLIQOV
Klubi: «Nasaf»
Yoshi: 19
Mavsum avvalida «Nasaf»ning Chempionlar Ligasidagi o'yinlarini eslaysiz-a? Hujumda yosh bir futbolchi o'ynagandi. O'shanda bilmagandikki, bu yigit futbolimizda yilning eng yaxshi kashfiyoti bo'ladi deb. U endilikda nafaqat qashqadaryoliklar uchun, balki barcha o'zbekistonlik muxlislar uchun sevimli futbolchiga aylandi. Bahrayndagi yoshlar o'rtasidagi Osiyo Chempionatida ham yaxshi o'ynadi. Yosh bo'lishiga qaramay, professional futbolchilar orasida o'zini yo'qotib qo'ymadi. Ortda qolgan mavsumning eng yaxshi yil kashfiyoti shubhasiz Bobur bo'ldi. Tez orada uni milliy terma jamoada kutamiz. Bobur bunga munosib futbolchiligini ko'rsatishdan to'xtamas, bas.
Manba: «Erudit Sport» gazetasi, erudit-sport.uz, fcdinamo.uz
— deya xabar beradi uff.uz nashri.