Bugun qit'amizdagi klublar miqyosidagi eng nufuzli musobaqa sanaladigan Osiyo Chempionlar Ligasi 2017 mavsumi uchun qur'a tashlash marosimi bo'lib o'tdi.

Qur'a natijalariga ko'ra, mamlakatimizning amaldagi chempioni – Toshkentning “Lokomotiv” klubi musobaqadaning “A” guruhidan o'rin oldi va "Al Ahli" (BAA), "Al Tavun" (S. Arabistoni) hamda Pley-off 3 g'olibiga qarshi bahs olib borishi oydinlashdi.

“Temiryo'lchilar” jamoasi a'zosi Temurxo'ja Abduxoliqov klub matbuot xizmatiga qur'a borasidagi fikrlarini bildirib o'tdi.

- Qur'a jarayonini kuzatib bordim. O'ylashimcha, bizga oddiy raqiblar ro'para bo'lmadi. Zero bunday nufuzli turnirga jamoalar tasodifan chiqib qolishmaydi.

Lekin guruhdan chiqish uchun barchada birdek imkoniyat bor. Agar biz eng yaxshi o'yinimizni namoyish eta olsak, guruhdan albatta chiqa olamiz.

Ortda qolgan mavsumda jamoamiz chorak finalga qadar etib bordi. Lekin hech bir o'yin oson o'tmadi. Shu boisdan hozirdanoq aytish mumkinki, kelasi yili ham har bir o'yin juda jiddiy tayyorgarlik talab etadi.
Jamoamiz oldiga katta maqsadlar qo'yiladi.

Bu safar o'tgan galgidan ko'ra uzoqroqqa borishni ko'zlayapmiz. Zero natijalar yaxshilansagina jamoada o'sish bo'ladi, - deydi tajribali hujumchi.
— deya xabar beradi uff.uz nashri.