Hammasi o'tgan hafta oxirlarida boshlandi. Avvaliga Odil Ahmedov ishtirokida o'tkazilishi rejalashtirilgan matbuot anjumani qoldirildi.
Keyin esa «Krasnodar» uni Xitoy klublaridan biriga sotayotgani haqida xabar urchidi. Bunga qo'shimcha holatda Odil shoshilinch ravishda Krasnodarga jo'nab ketgach, darhaqiqat, klubini o'zgartirishi mumkinligi oydinlashdi. Chunki Ahmedov 3-4 kungina oldin ta'til uchun O'zbekistonga kelgan va ma'lum muddat shu erda qolishi kutilayotgandi. Biroq tezda Krasnodarga qaytdimi, bunga zalvorli sabab bor. Albatta, bunday payt turli savollar tug'ilishi turgan gap. Balki ushbu maqolani o'qiyotgan paytingizgacha Odil Ahmedovning Xitoy jamoasiga o'tish yoki o'tmasligi hal bo'lib ulgurar... Ammo voqealarning oxirgi rivojiga qarasak, uning Osiyoga qaytishi ehtimoli yo'q emas. Buni inkor etish noo'rin. Xullas, Odil Ahmedov bugun bo'lmasa, ertaga Rossiya chempionatidan ketadi, shekilli, baribir. Hamyurtimizning qit'ada qay darajada taniqli ekanligini inobatga olsak, futbolga hech ikkilanmay katta-katta mablag' tikayotgan Xitoy yoki arab klublaridan birortasi unga yaxshigina maosh taklif etishi ham tayin. Aslini olganda, bu ish ancha oldin ro'y berishi ham mumkin edi. Esingizdami, Ahmedov 2011 yili «Anji»ga o'tishi oldidan arab klublari unga rosa «sovchi» qo'yishgan va juda manfaatli takliflarni ilgari surishgani aytilgandi. Ya'ni nafaqat o'zi, balki butun oilasiga yaxshi sharoitlar va'da qilishgan. Biroq Odil Osiyoning etakchi klublarida yulduz bo'lgandan ko'ra, Rossiya chempionatida, boz ustiga, ijara asosida o'ynashni ma'qul ko'rgandi. U kimligini o'sha erda isbotladi. Bir qarashda, Odilning faoliyati ertakka o'xshaydi. Faqat bu ertak haqiqati shuki, hamyurtimiz erishgan barcha yutuqlar zamirida katta mehnat yotibdi. Vaholanki, uning oldida osongina pul topish imkoniyati tug'ilgandi. Hozir Ahmedovga Xitoydan qanday taklif tushganini aniq aytolmaymiz. Chunki bu borada rasmiy xabar chiqqanicha yo'q. Biroq shuni ayta olamizki, agar chorlov bo'lsa, uni rad etish ancha qiyin. Chunki Xitoy futbol olamiga qay darajada ulkan mablag' bilan kirib kelganini yaxshi bilamiz. Evropada butun boshli grand klublarni «yamlamay yutib yuborayotganlar» uchun bir futbolchini sotib olish hech narsa emas. «Krasnodar» rahbariyati Odil uchun bemalol etarlicha so'rashi mumkin, xitoyliklar berishadi, albatta. Chunki u Osiyo­da qay darajada kuchli o'yinchi ekanligini isbotlab ulgurgan. Xususan, Xitoy terma jamoasiga qarshi kechgan oxirgi o'yinda ham. Biroq bu o'rinda faqat bir savol qoladi - Odilning o'zi bunday taklifga qanday qaraydi? Balki rozi bo'lar, ehtimol ko'nmas. Ammo har qanday holatda ham, uni ayblashga haqli emasmiz. Chunki Odil o'z potentsialini ochish uchun qo'lidan kelgan barcha ishlarni amalga oshirdi. O'z vaqtida arablar va'da qilgan mo'maygina puldan voz kechdi va Rossiyaning izg'irinida kimligini isbotladi. Endi u ham asta faxriylik yoshiga yaqinlashmoqda. Har holda, 29 va 19 yosh o'rtasida katta farq bor. Shu ma'noda aytsak, balki Osiyoga qaytish fursati etgandir. Bu o'rinda bizni birgina holat qiziqtiradi - ehtimoli bor transfer O'zbekiston milliy jamoasiga qay darajada ta'sir qilishi mumkin? Davomi Interfutbol.uz saytida.
— deya xabar beradi uff.uz nashri.