2000-YILLAR AVLODIGA MANSUB 10 NAFAR YoRQIN VUNDERKIND. Kechagina kelajak hisoblangan vaqt etib keldi. Mana, yaqinda 2000 yilda tug'ilgan Moyze Kin «Yuventus»dagi debyutini nishonladi. Aytish joiz, u bu borada yagona emas. Ya'ni Robbi va Roy Kinga mutlaqo begona Moyze (ular faqat familiyadosh, xolos)dan oldin ham yangi asrda tug'ilgan bir qator yigitlar katta futbolga qadam tashlashga ulgurgandilar. Lekin «Yuve» ixtiyoridagi vunderkind «A» seriyasi o'yinida maydonga tushgan yangi avlodning birinchi vakili bo'ldi. Marhamat, quyidagi maqola (manba: shampionat.com) vositada yangi avlod to'lqini bilan birrov tanishib chiqishingiz mumkin. Moyze KIN («Yuventus») Prototipi: Mario Balotelli Moyze Kin katta futbolga endi qadam tashlayotgan bo'lsada, uning agenti Mino Rayola o'z mijoziga yangi 3 yillik shartnoma «undirish»­ga urinmoqda. Yigitchaning o'zi anchadan buyon italyan matbuoti «nishoni»da turibdi. Aytgancha, jurnalist­lar unga «yangi Balotelli» sifatida qarashmoqda. Fakt. Moyzening o'zi «bebosh» Marioning iqtidoriga oshufta ekanligini yashirmaydi. Misol uchun, u «Yuventus»ning U-19 toifasidagi jamoasida urgan golini futbolkasiga yozilgan Why always me? iborasini namoyish etish bilan nishonladi. Vensan TILL' («Mets») Prototipi: Miralem Pyanich Yangi asr to'lqini Frantsiya ligasiga 2 oy oldin kirib keldi. «Mets» asosiy tarkibidan joy olgan 16 yoshli yarim himoyachi Vensan Till chakki ko'ringani yo'q. Lyuksemburg milliy termasi bosh murabbiyi Lyuk Xolts ham o'smir yigitni o'z jamoasida sinab ko'rishga ulgurdi va ishonch bilan ta'kidlashicha, sheriklari mashg'ulotlarda uni faqat qo'pollik yordamida to'xtatib qolishgan. Tillni «A» seriyasi yulduzi Miralem Pyanichga o'xshatishadi. Zero, u ham vaqtida Lyuksemburg termasi uchun o'ynagan - to'g'ri, o'smirlar toifasida. Qolaversa, xuddi Vensan kabi katta futbolga aynan «Mets» orqali kirib kelgan. Fakt. Vensan Till - 2000 yildan keyin tug'ilgan futbolchilar orasida kuchli beshlik sirasiga kiruvchi chempionatlarda debyut qilgan birinchi yigit. Karamoko DEMBELE («Seltik») Prototipi: Lionel Messi Karamoko «Seltik»ning U-20 toifasidagi jamoasida ilk marta maydonga tushganidayoq faolligi bilan ajralib turdi. Bunda alohida ajablanadigan tomoni yo'qday, agarda bolakayning atigi 13 yoshda ekanligini hisobga olmasak. Karamoko Dembele - ivuarlik muhojirlar oilasi vakili. Fakt. Yigitchaning turli fintlari videoyozuvi ayni payt ijtimoiy tarmoqlarda ming-minglab marta tomosha qilinmoqda. Jek AYChISON («Seltik») Prototipi: Per-Emerik Obameyang Yosh hujumchi hozircha kattalar darajasidagi barqaror o'yinlari bilan maqtanolmaydi, lekin yoshlar birinchiligida tinmay gol urmoqda. Aychison to'g'ri pozitsiya tanlashi va tezligi hisobiga ta'qibchilarini engilgina ortda qoldiradi. Jek  shotlandiyalik klassik gol uruvchi forvard emas, balki hujumda keng front bo'ylab harakatlanuvchi chaqqon goleadordir. Fakt. Jek Aychison «keltlar» tarixida gol urgan eng yosh futbolchi maqomini olib ulgurdi. Alessandro PLITsTsARI («Milan») Prototipi: Janluiji Donnarumma Top-klublar odatda asosan tajribali va tayyor golkiperlarga ishonch bildirishadi. Biroq «Milan» ixtiyorida hali maktab imtihonlarini topshirishga ham ulgurmagan ikki nafar yigitcha bor. Ayni payt darvoza hududi Janluiji Donnarummaga tegishli, zaxirada esa 16 yoshli Alessandro Plitstsari navbat kutib o'tiribdi. Unga «Milan» akademiyasining yangi javohiridek qarashyapti. Alessandro xuddi Donnarumma kabi ajoyib antropometrik ko'rsatkichlarga ega (bo'yi - 190 sm.) va akrobatik xususiyatlari ham chakki emas. Fakt. Plitstsari  U-17 toifasidagi Evropa chempionatida chakki taassurot qoldirmadi va shuning natijasida «rossonerlar»ning asosiy tarkibiga qo'shildi. Lorentso GONSALES («Manchester Siti») Prototipi: Jerdan Shakiri Shveytsariyalik iqtidor o'tgan yiliyoq «Borussiya» D., «Real» va «Manchester Siti» klublari bazalarida bo'ldi, «Servett»ning asosiy tarkibida debyut qildi va yozda «Siti» bilan shartnoma tuzdi. Gonsales markaziy hujumchi sanalsada, o'ng qanotda ham bemalol harakatlanadi. Uni tez-tez hamyurti Jerdan Shakiriga qiyoslamoqdalar. Chunki Lorentso ham juda baquvvat, oyoqlarida mustahkam turadi va kuchli zarbayu, yuqori tezlikka ega. Fakt. O'smir yigitning kelib chiqishi Lotin Amerikasiga borib taqaladi. Shu bois va tezkorlik xususiyati o'laroq, unga Speedy laqabini berishgan - multiplikatsion sichqoncha Spidiga o'xshashi tufayli. Kallum STAYLS («Byori») Prototipi: Frenk Lempard 16 yoshli yarim himoyachi «Byori» asosiy tarkibida o'tgan mavsum ko'rinish berdi va bu bilan 2000 yili tug'ilganlar orasida Angliya futboli ta'mini totib ko'rgan birinchi yigit bo'ldi. Kallum yuqori tezligi bilan maqtanolmaydi, ammo yaxshigina to'p uzatish madaniyati va o'yinni o'qiy olishi bilan barchasini nazorat ostiga olishi mumkin. Fakt. Stayls hozirda Angliya o'smirlar terma jamoasida etakchi maqomiga ega. Xullas, APLning bir qator klublari e'tiborini o'ziga qaratgani bejiz emas. Keyn UILSON («Vest Bromvich») Prototipi: Eshli Koul «Kamtar», «Iqtidorli», «O'rganishga ishtiyoqmand» — «Vest Bromvich» murabbiylari Keyn Uilsonni shunday iboralar asosida maqtashyapti. Ushbu qanot himoyachisi aql bovar qilmas tezlikka ega va to'pni qoidaga amal qilgan holda olib qolishda benazir. Fakt. «Arsenal» va «Liverpul» kabi klublar Keyn Uilsonga 2 yilcha  oldin e'tibor qarata boshlagandilar. Biroq yigitchaning o'zi ketishga uncha shoshilmayapti. Ya'ni avvalo, «Vest Bromvich»da etarli tajriba hosil qilmoqchi. Davomi Interfutbol.uz saytida.
— deya xabar beradi uff.uz nashri.