«Dinamo»ning yana Oliy Ligaga qaytishi bilan yakunlangan 2016 yilgi mavsumdan so'ng, klub rasmiy sayti o'z an'anasiga binoan muxlislar o'rtasidagi so'rovnomaga ko'ra, jamoaning bu yilgi eng yaxshi futbolchisini aniqladi.
Klub rasmiy saytida o'tkazilgan, «Dinamo» jamoasining 2016 yilgi mavsumdagi eng yaxshi futbolchisi kim?» so'rovnomasida eng ko'p ovoz jamoa to'purari Amirjon Safarovga nasib etdi. Joriy mavsumda 23 ta gol urishga erishgan 21 yoshli samarqandlik hujumchiga umumiy ovozlarning 43.6% foizi, ya'ni 673 ta ovoz berilgan.
Muxlislar nazdiga ko'ra, bu borada ikkinchi o'rin tezkor yarimhimoyachi Jonibek Ko'chimovga nasib etgan. Joriy yilda klubning eng yaxshi assistenti bo'lgan 18 yoshli futbolchi 206 ovoz (13.4%) olgan.
So'rovnoma yakunlariga ko'ra, 3-o'rinda Omadjon Tayloqov qayd etildi. Jamoada standart vaziyatlari ustasi bo'lgan 25 yoshli yarimhimoyachi 141 ta (9.1%) ovoz olgan.
Shuningdek, Jasur Azimov 104 (6.7%), Bunyod Isroilov 94 (6.1%), Alisher Xoliqov 76 (4.9%), Mixail Naumov 75 (4.9%), Akmal Bozorov 74 (4.8%), Aleksey Nikolaev 55 (3.6%), Viktor Klishin 45 (2.9%) singari futbolchilar ham so'rovnomada ovoz olishgan. So'rovnomada umumiy 1543 ta ovoz berilgan.
Eslatib o'tamiz, 2007 yildan buyon klub matbuot xizmati tomonidan so'rovnoma orqali aniqlanib kelinayotgan «Dinamo»ning «mavsumdagi eng yaxshi futbolchisi» nomiga quyidagi futbolchilar loyiq ko'rilgan:
2007 yil – Farhod Tojiev
2008 yil – Ilyos Qurbonov
2009 yil – Bahodir Nasimov
2010 yil – Ilhom Yunusov
2011 yil – [Devid Oniya]
2012 yil – Ivan Nagaev
2013 yil – Andrey Melnichuk
2014 yil – Andrey Melnichuk.
2015 yil – Kamoliddin Murzoev.
2016 yil – Amirjon Safarov.
«Dinamo» klubi matbuot xizmati.
— deya xabar beradi uff.uz nashri.