O'zbekistonlik FIFA referisi Vladislav Tseytlin 45 yoshni qarshi olishi munosabati bilan xalqaro turnirlardagi hakamlik faoliyatini yakunlaydi. Ma'lumki, FIFA hakamligida yosh chegarasi 45gacha qilib belgilab qo'yilgan. Shuning uchun, endilikda Vladislav Tseytlin OFK va FIFA istruktorligi faoliyatini boshlaydi. Ushbu munosabat bilan Osiyo Futbol Konfederatsiyasi o'zbekistonlik hakamga uzoq yillar davomida hakam sifatida ko'rsatgan xizmatlari uchun minnatdorchilik bildirish va bo'lajak instruktor sifatida uni tanishtirish maqsadida 2017 yilning 19 yanvar sanasida Kuala-Lumpurga taklif etdi. “Vladislav Tseytlin xalqaro musobaqalardagi hakamlik faoliyatini yakunlashiga qaramay, O'zbekiston chempionati va kubok bahslarida hakam sifatidagi faoliyatini davom ettiradi. O'zbekistonda hakamlar uchun yosh chegarasi 48 qilib belgilangan”, - deydi O'zbekiston Futbol Federatsiyasi hakamlar va inspektorlar departamenti boshlig'i Noil Lutfulin. Ta'kidlash kerakki, Tseytlin shu yilning 10 – 19 may hamda 20 – 27 oktyabr kunlari UEFAning hakamlar mahoratini oshirish markazining maxsus dasturi doirasidagi istruktorlik o'quv-kurslarida tahsil olib qaytgan edi.
— deya xabar beradi uff.uz nashri.