Ispaniya terma jamoasi sobiq bosh murabbiyi Visente del Boske FIFA.com saytiga bergan intervyusida yilning eng yaxshi futbolchisi va murabbiyi maqomiga da'vogarlar xususida fikr bildirdi. U shuningdek, o'z mamlakatida ayollar futbolining jadal rivojlanayotganidan g'oyat mamnun ekanligini alohida e'tirof etdi. - Aytingchi, shaxsan siz so'nggi yillarda eng yaxshi futbolchi uchun ovoz berish jarayonida qaysi mezonlarga tayanib ish ko'rgansiz? - Men uchun futbolchilarning qanday sport formasida bo'lishlari, erishgan natijalari muhim emas. Xullas, doimo faqat o'zim yoqtirgan futbolchilarga ovoz berganman. Shunday yondashuvga amal qilsang, tanlov muammo tug'dirmaydi. - Tushunarli. Endi aytingchi, bu borada bir to'xtamga kelishda, deylik, ikki munosib nomzoddan birini tanlashda biror marta qiyinchilikka duch kelganmisiz? - Qaytaraman, bu masalada unchalik uzoq bosh qotirmaganman. Bordiyu, da'vogarlar orasida men yoqtirgan futbolchilar bir nafardan ko'p bo'lsa, shunchaki, ko'nglimga yaqinini tanlaganman. To'g'ri, Ispaniya termasi Evropa va jahon chempionatlarida g'olib chiqqan yillari tanlash murakkablashib qolgandi. Har holda, qatorasiga 3ta yirik musobaqada zafar quchish oson emas. O'shanda biz uchun ispaniyalik futbolchining g'olib chiqishi adolatlidek tuyulgandi. Biroq ularga bosh sovrinni qo'lga kiritish nasib etmadi. Shunga qaramay, eng yaxshi futbolchi maqomi Ispaniya vakiliga berilishi kerak, deb hisoblaganman. O'sha davrda oltin avlod shakllangani uchun emas, balki jamoamiz erishgan muvaffaqiyatlar sabab. Axir futbol jamoaviy sport turi-ku. - Bu yilgi 23 nafar nomzod orasida Ispaniyadan ikki vakil bor edi - Andres Inesta va Serxio Ramos. Bu ispan futboli uchun oz emasmi? - Albatta, yana 1-2 futbolchi, masalan, Buskets va Pike ham ro'yxatdan joy olishga munosib edilar. Zero, bu o'yinchilar ispan futbolida yorqin iz qoldirishdi. - Sizningcha, bu yilgi tanlov favoriti kim? - Ayni holatda Messi va Ronaldu bilan tenglashadigan futbolchi yo'q. O'ylashimcha, g'olibni aniqlashga mas'ul shaxslar o'zlari kiyib yurgan futbolkalarga qaragan holda, ovoz berishadi. Shaxsan men uchun ularning ikkisi ham tengsiz. - Xo'sh, murabbiylardan kimga ovoz berardingiz? - G'oliblik ispaniyalik mutaxassisga nasib etsa, mamnun bo'lardim. Ammo Simeone nomzodiga yon bosmaslikning iloji yo'q. Menimcha, bu mutaxassisning so'nggi yillardagi faoliyati o'ta hayratlanarli. Mana, Diego «Atletiko»ga qayta hayot baxsh etib, uni jangovar jamoaga aylantirdi. O'z uslubi bilan yaqqol ajralib turadigan «Atletiko» endilikda har qanday kuchli raqibga munosib qarshilik ko'rsata oladi. Boshqa nomzodlarni ranjitish niyatidan yiroqman, lekin eng yaxshi maqomiga Diegodan munosibrog'i yo'q. - Yilning eng yaxshi murabbiyi bo'lishga da'vogarlar orasida Enrike va Zidan ham bor. Siz ikkisi bilan ham «Real»da hamkorlik qilgansiz. O'sha payt ularning kelajakda murabbiylik qilish salohiyatlari  sezilganmidi? Davomi Interfutbol.uz saytida.
— deya xabar beradi uff.uz nashri.