Birlashgan Arab Amirliklarining Abu Dabi shahrida Osiyo qit'asida  boksni rivojlantirishga mas'ul tashkilot - Osiyo boks konfederatsiyasi Ijroiya qo'mitasining yig'ilishi bo'lib o'tmoqda.
Ushbu muhim tadbir kun tartibidan Osiyo boks konfederatsiyasi rahbar lavozimlariga nomzodlarni saylash, Ijroiya qo'mitasiga yangi a'zolarni tayinlash, tashkilotning 2015-2016 yillardagi faoliyati, 2017 yilgi sport mavsumida qit'a miqyosidagi musobaqalarni tashkil qilish, moliyaviy masalalarni ko'rib chiqish kabi qator mavzular o'rin oldi.
O'zbekiston boks federatsiyasi matbuot xizmatidan SPORTS.uz axborot portaliga xabar qilishlaricha, O'zbekiston boks federatsiyasi vitse-prezidenti Sherzod Tashmatov Osiyo boks konfederatsiyasi vitse-prezidenti etib saylandi va Ijroiya qo'mitasi a'zoligiga ham qabul qilindi.
Osiyo boks konfederatsiyasi Ijroqo'mi yig'ilishida ishtirok etgan rahbar xodimlar 19-20 dekabr kunlari Shveytsariyaning Lozanna shahrida bo'ladigan Xalqaro havaskor bokschilar assotsiatsiyasi - AIBA Ijroiya qo'mitasi yig'ilishida ham ishtirok etadi.
AIBA tadbiri doirasida boks bo'yicha Olimpiya chempioni  Hasanboy Do'smatovga  ham 2016 yil yakunlariga ko'ra, "Eng yaxshi bokschi" sovrini bilan taqdirlanishi kutilmoqda. Yaqinda, Xalqaro havaskor bokschilar assotsiatsiyasi  Twitter ijtimoiy tarmog'i orqali yilning eng yaxshi bokschisini aniqlash maqsadida so'rovnoma e'lon qilgan edi. Unda Hasanboy Do'smatov  Olimpiya o'yinlari g'oliblari  - kubalik Robeysi Ramires va qozog'istonlik  Doniyor Eleussinovni katta farq bilan ortda qoldirgan edi.
SPORTS.uz axborot portali butun sport jamoatchiligi nomidan Sherzod Tashmatovga xalqaro miqyosdagi faoliyatida ham muvaffaqiyat tilaydi.
Ushbu materialdan qisman yoki to'liq foydalanganda SPORTS.uz axborot portalining nomi aniq ko'rsatilishi hamda havola (link) berilishi shart!
— deya xabar beradi uff.uz nashri.