Moskvadagi RMA biznes maktabi talabalariga ma'ruza o'qish maqsadida bu gal «Arsenal» klubining taraqqiyot va hamkorlik departamenti rahbari Adrian Peratsini tashrif buyurdi. London jamoasida atigi yarim yildan buyon ishlayotgan bo'lsada, uning vujudidan «to'pchilar» falsafasi ufurib turadi. Peratsini faoliyatini 13 yil muqaddam Italiyada - «Atalanta»ning marketing bo'yicha menejeri sifatida boshlagandi. So'ngra ishini «Latsio»da davom ettirdi. «Arsenal»ga o'tish oldidan esa MBAning London bo'limidagi yuqori lavozimlardan birida ish olib bordi, keyingi bir yilni marketing olamining yirik vakillaridan biri bo'lgan IMG kompaniyasida vitse-prezident lavozimida o'tkazdi. - Rossiya safariga otlanar ekanman, «Arsenal»ning yurtimizdagi mavqei bilan qiziqdim, - deya suhbatga kirishdi Peratsini. - Ochig'i, natija meni hayratga soldi: «MYu» va «Chelsi»dek jamoalarning muxlislari juda ko'p bo'lgan mamlakatda «Arsenal» ishtirokidagi uchrashuvlar translyatsiyasi ko'p tomoshabinlar auditoriyasini to'plagan. Bunga ishonish qiyin, lekin bu - fakt. «Arsenal» - olamshumul brend. Biz Facebookda 37 mln., «Tvitter»da 8 mln. nafar mijozga egamiz. Klubning rasmiy saytiga har oy 4 mln. muxlis murojaat qiladi. Shunday ulkan e'tiborga munosib bo'lmog'imiz shart. Bor kuchimiz, imkoniyatlarimiz ayni maqsadga yo'naltirilgan. Ijtimoiy tarmoqlar or­qali maxsus aktsiyalar uyushtiramiz, jumladan, hamkor kompaniyalar ishtirokida. Xalqaro turnirlar uyushtirish, klub afsonalari ishtirokidagi tadbirlar ham bizning zimmamizda. Masalan, Rober Pires murabbiylar shtabiga o'tishdan avval Hindistonning «Goa» klubida to'p surdi. U erdagilar Roberni yaxshi bilganlari bois, Mumbaydagi tadbir o'ta muvaffaqiyatli o'tdi. Ruma hamkorligida hindistonlik muxlislar bilan dastlabki rasmiy uchrashuvni tashkillab, «Tottenxem»ga qarshi derbi bahsini ulkan ekranda namoyish etdik. Bu ishqibozlar hech qachon Londonda bo'lishmagan, balki umuman kelishmas. Lekin ular «Arsenal»ning chinakam muxlislari. Bu - juda ajoyib! Nvankvo Kanu esa Afrikada «to'pchilar»ni barchaga tanitmoqda. Iyul oyida Avstraliyaga safar uyushtirishni rejalashtirganmiz, chiptalar esa allaqachon sotib bo'lingan. Jamoa ulkan muxlislar auditoriyasiga ega. 1,5 mln.dan ko'proq muxlis «Arsenal»ning «raqamli fan-klubi»ga a'zo bo'lishgan. 250000 nafar fuqaro fan-klubning to'laqonli a'zolari hisoblanishadi. Ular orsidagi eng baxtli va omadlilari yillik abonementlarga ega bo'lishadi. Ya'ni, a'zolikning «oltin» darajasi 37000 muxlisga, «kumush» darajasi (quyi yaruslarga chipta olish imkoniyati) 30000, «qizil» darajasi 124000 muxlisga nasib etdi. Yana chaqaloqdan tortib, 16 yoshli o'smirlardan tashkil topgan 36000 muxlis uchun ham alohida imtiyozlar belgilangan: abonement sohibiga aylanish uchun ishqibozlar o'rtacha 12 yil navbatda turishadi. Umuman olganda, stadion bizning eng katta boyligimiz. Tabiiyki, 60000 kishiga mo'ljallangan inshoot barcha tomoshabinlarni o'z bag'riga sig'dira olmaydi. Shu sababli abonement olish uchun 20000dan ko'proq muxlis doimo nav­batda turishadi. Albatta, «Xayberi»dan «Emireyts»­ga ko'chib o'tish bizga ham, muxlislarga ham oson bo'lmadi. Bu davr taqozosi - uzluksiz taraqqiyot tufayli bunyod etilgan arena «Arsenal»ga doimiy yuksak saviyani hadya etdi. Biznes bobida ham, maydondagi natijalar borasida ham jamoa etakchilar qatorida bormoqda. Biz hech qachon qo'lga kiritilgan yutuqlar bilan cheklanib qolmaymiz. «Emireyts» doimo Angliyaning eng yaxshi stadioni bo'lib qolishi kerak. Shu sababli har yili yuksak maqomni boy berib qo'ymaslik, talablarga javob berish maqsadida 2-3,5 mln. funt sarflanadi. Albatta, shunga yarasha daromad ham olinadi. 2014|2015 yillar mavsumi yakuniga ko'ra, «Arsenal» uy uchrashuvlarida pul ishlash borasida Evropaning barcha jamoalaridan o'zib ketdi. Uning daromadi 132 mln. evroga etdi. Bu ko'rsatkich «Real»da 130, «Barselona»da 117, «MYu»da 114 mln.ni tashkil etgan. Agarda «Xayberi» bilan taqqoslaydigan bo'lsak, «Emireyts»dagi o'sish yaqqol namoyon bo'ladi. Daromad dastlabki mavsumdayoq 44 mln.dan 91 mln.ga ko'tarilgandi. Biroq biz bu yo'nalishda imkoniyatlardan to'liq foydalanib bo'ldik. Atributika savdosini yanada kengaytirishning iloji yo'q. Telehuquqlar borasida ham vaziyat shunday. Bu masalalar ko'p jihatdan klubga bog'liq emas. To'g'ri, maydonda qayd etiladigan natijalarni hisobga olmaganda, albatta. Aytgancha, APLning mavqei shunchalik shiddat bilan o'sib bormoqda-ki, bundan 10 yil avval klub TV huquqlaridan 44 mln. funt daromad olgan bo'lsa, hozirda ushbu ko'rsatkich 125 mln.ga etdi! Davomi "InterFUTBOL" nashrida.
— deya xabar beradi uff.uz nashri.