Besh kun davomida Toshkentdagi “Universal” sport saroyida bo'lib o'tgan erkin, yunon-rum va ayollar kurashi bo'yicha O'zbekiston chempionati kecha o'z poyoniga etdi va barcha vazn toifalarida g'olib va sovrindorlar nomi ma'lum bo'ldi. Biz saytimiz orqali yunon-rum kurashining to'rt vazn toifasida qayd etilgan natijalar hususida xabar berib o'tgandik.
Aytish kerakki 66, 75, 85, 130 kg. vazn toifalarida ham kurash anchagina qizg'in va murosasiz ruhda kechdi. 66 kg. vazn toifasida shohsupaning birinchi pog'onasiga 2016-yilgi jahon chempionatining bronza medali sovrindori, mamlakat kubogi sohibi buxorolik Mirzobek Rahmatov ko'tarildi. U final jangida Nurbek O'ktamovni taslim etishni uddaladi. Ushbu vaznda bronza medallari Toshkentlik ikki sportchi Aram Vardanyan va Abdurashid Berdalievlarga nasib qildi.
75 kg. vazn toifasida hal qiluvchi bellashuv Qoraqalpog'iston Respublikasi vakili Jalgas Berdimuratov va farg'onalik Diyor Sharipovlar o'rtasida kechdi. Bellashuvda Osiyo chempionatining bronza medali sovrindori va O'zbekiston kubogi sohibi Jalgas Berdimuratov zafar quchib O'zbekiston chempioni unvoniga sazovor bo'ldi. Toshkentlik Baxtiyor Isoqov va samarqandlik Jahongir Ziyoevlar bronza medallari bilan cheklanishdi.
2016 yilgi Osiyo chempionatining kumush medali sovrindori buxorolik Muhammadali Shamsiddinov 85 kg. vaznga ega polvonlar o'rtasida mamlakatimizda tengsiz deb topilib, shohsupaning eng yuqorisiga ko'tarildi. U finalda andijonlik raqibi Nurbek Hoshimbekovni mag'lubiyatga uchratdi. Buxoro yakkakurash maktabi tarbiyalanuvchisi Rustam Sultonov va qashqadaryolik Ermatbek Shermatovlar esa bronza medallari bilan taqdirlanishdi.
O'ta og'ir vaznli polvonlar bahsida (130 kg.) Rio-2016 Olimpiya o'yinlari ishtirokchisi Mo'minjon Abdullaev finalda toshkentlik Azamat Bahodirzodani taslim etib O'zbekiston chempionligini tantana qildi. Poytaxtning yana bir vakili Timur O'rimboev va buxorolik Umid Nurovlar bronza medaliga loyiq ko'rilishdi.
17 dekabr kuni ayollar kurashi bo'yicha bellashuvlar bo'lib o'tdi. E'tiborlisi sakkiz vazn toifasining oltitasida qoraqalpog'istonlik, yana ikkitasida xorazmlik qizlar g'oliblikni qo'lga kiritishdi. Demak barcha vazn toifalarda o'tkazilgan bahslar yakuniga ko'ra xorazmlik Asalxon va Nodira Sobirovalar, shuningdek Qoraqalpog'iston Respublikasi vakillari Shahodat Jullibaeva, Sevara Eshmuratova, Asem Seydametova, Nabira Esenbaeva, Nilufar Gadoeva va Lalaxan O'rinboevalar oltin medallarini qo'lga kiritib, O'zbekiston chempioni nomiga sazovor bo'lishdi.
Va nihoyat 18-19 dekabr kunlari endi erkin kurash bo'yicha bellashuvlar bo'lib o'tdi. 2016-yilgi O'zbekiston chempionati bahslariga yakun yasab bergan mazkur bellashuvlar ham ko'pchilikda qiziqish uyg'otgandi. Biz ham o'z navbatida barcha vazn toifalarida qayd etilgan texnik natijalar bilan tanishtirib o'tamiz.
57 kg: 1 – G'ulomjon Abdullaev (Xorazm), 2 – Jahongir Turobov (Buxoro)  
3 – Nasibullo Qurbonov (Toshkent vil.) va Zokir Mansurov (Toshkent vil.)
61 kg: 1 – Abbos Rahmonov (ROZK), 2 – Temur Usmonoxunov (Andijon)  
3 – Muhammadsidiq Jo'raev (Buxoro) va Shaxboz Yodgorov (Toshkent).
65 kg: 1 – Muhammadkarim Usmonov (Sirdaryo), 2 – Sirojiddin Xasanov (Buxoro),
3 – Azimjon Nazarov (Navoiy) va Ma'ruf Nurillaev (Buxoro).  
70 kg: 1 – Mirzo Xayitov (Buxoro), 2 – Shohrux Sapaev (Andijon),  
3 – Aziz Qalandarov (Xorazm) va Azamat Ashurov (Buxoro).  
74 kg: 1– Dayibek Otarbaev (Qoraqalpog'iston), 2 – Sanjar Masharipov (Xorazm),
3 – Muhammadali Muxtorov (Samarkand) va Sohib Iskandarov (Buxoro).  
86 kg: 1 – Ilfat Radjapov (Toshkent vil.), 2 – Aziz Soliev (Buxoro),  
3 – Nodir Egamberdiev (Surxondaryo) va Temur Abdusattorov (Farg'ona).
97 kg: 1 – Bahodir Arslonov (Navoiy), 2 – Suhrob Mukarramov (Buxoro),  
3 – Nodir Xonto'raev (Jizzax) va Abdurasul Vahobov (Toshkent vil.)  
125 kg: 1 – Xasanboy Rahimov (Navoiy), 2 – Sardor Xolmatov (Toshkent vil.)
3– Asilbek Abduraimov (Samarqand) va Rustam Jalolov (Tashkent vil.)
O'zbekiston Milliy olimpiya qo'mitasi
matbuot xizmati
— deya xabar beradi uff.uz nashri.