O'quvchilarimizning xabarlari bordir, yaqinda FIFA rasmiy saytida kelasi yil mazkur tashkilot bayrog'i ostida o'tkaziladigan futbol, futzal va plyaj futboli turnirlari doirasidagi uchrashuvlarni bosh­qarib boradigan hakamlar hamda ularning yordamchilari ro'yxati e'lon qilindi. Unga ko'ra, 2017 yili o'zbekistonlik naq 25 nafar hakam xalqaro bahslarga jalb etilishi mumkin. Ushbu ro'yxatga tajribali mutaxassislarimizdan biri, ancha yillardan buyon yurtimiz hamda xorijda tashkil etilayotgan qator musobaqalarda bosh hakamlarga assistentlik qilib kelayotgan laynsmen Ma'mur Saidqosimov ham kiritilgan. Biz fursatdan foydalanib, aniqrog'i, referilar va ularning yordamchilarini  FIFA turnirlariga jalb  etish jarayoni, hakamlar faoliyatining nozik jihatlari haqida batafsil ma'lumot olish ilinjida ushbu laynsmenni suhbatga chorladik. — Ma'mur Mahkamovich, avvalo, yakunlangan mavsumga qisqacha to'xtalsangiz.  Joriy yil davomida qanday turnirlarda ishladingiz, qaysi davlatlarda bo'ldingiz?  — Bu yil asosan O'zbekiston milliy chempionati oliy liga bahslarida ishladim. Shuning barobarida hamyurt hamkabslarim bilan birga Osiyo Chempionlar Ligasi va OFK kubogi doirasidagi qator uchrashuvlarda ham  qatnashdim. Deylik, OChL guruh bosqichidan o'rin olgan 2ta o'yinda ishladim. E'tiborlisi, ularning har ikkisi Janubiy Koreya maydonlarida bo'lib o'tdi. Shuningdek, Avstraliyada o'tkazilgan 1|8 final  uchrashuvida ham xuddi Janubiy Koreyada bo'lgani kabi Ilgiz Tantanshevga yordam berdim. Bahraynda tashkil etilgan OFK kubogi o'yinida esa Aziz Asimovga  assistentlik qildim.  Bundan tashqari, oktyabr oyida Sherzod Qosimov brigadasi bilan Janubi-sharqiy Osiyo futbol federatsiyasi tomonidan terma jamoalar o'rtasida uyushtirilgan Suzuki Cup xalqaro turniri saralash bosqichi uchrashuvlarini boshqarish uchun Kambodjaga borib keldik. — Yaqinda FIFA rasmiy saytida kelasi yil shu tashkilot bayrog'i ostida tashkil etiladigan musobaqalar doirasidagi o'yinlarda ish olib boradigan hakamlar ro'yxati e'lon qilindi. Unda siz ham o'rin olgansiz. Imkoni bo'lsa, mazkur ro'yxatga tushish shartlari va tartibi haqida gapirib bersangiz.  — Xalqaro musobaqalarni boshqaradigan hakamlarni saralash jarayo­ni uzluksiz ravishda davom etadi.  Boshqacha aytganda, FIFA va uning mintaqaviy tashkilotlari, xususan, OFK har yili mamlakat futbol federatsiyalaridan milliy birinchilik musobaqalarida muntazam ishtirok etadigan, xalqaro uchrashuvlarni boshqarish layoqatiga ega, jismoniy ko'rsatkichlari a'lo bo'lgan, ingliz tili hamda futbol qoidalarini mukammal biladigan, shunga o'xshash bosh­qa talablarga javob beradigan iqtidorli hakamlarni tavsiya etishni so'raydi. Yurtimizda mazkur tashkilotga tavsiya etiladigan nomzodlar ro'yxati O'FF Hakamlar hay'ati tomonidan tuziladi. Nomzodlar o'z navbatida, mamlakat futbol federatsiyasi hamda FIFA tomonidan tashkillashtiriladigan o'quv-mashg'ulot seminarlarida ishtirok etib, tegishli yo'nalishlar bo'yicha  test topshiradilar, obdon sinovdan o'tadilar. Ana shu imtihonlarda yaxshi baho olgan hakamgina yakuniy ro'yxatga kiritiladi.  Shu o'rinda  OFKning mazkur yo'nalishdagi oxirgi tadbiri  joriy yilning 26-30 noyabr kunlari BAAning Dubay shahrida bo'lib o'tganini aytishim joiz. — Keyingi yillarda FIFA tomonidan futbol qoidalariga bir qator o'zgartirishlar kiritildi. Xususan, hakamlar brigadasi bahs­li vaziyatlarni videokameralarga yozilgan lavhalar yordamida hal etish imkoniyatiga ega bo'ldi... — Haqiqatan ham, FIFA tarkibida faoliyat yurituvchi va futbol qoidalarini nazorat qiladigan  IFAB  tashkiloti joriy yilning mart oyida o'yin qoidalariga bog'liq bir qator o'zgartirishlarni tasdiqladi. Masalan, mazkur tashkilot qaroriga muvofiq, referilar 2 yil davomida ayrim xalqaro turnirlarda tajriba tariqasida  videoassistentlardan foydalanadigan bo'ldilar. Jumladan, kuni kecha Tokioda start olgan Klublar o'rtasidagi jahon chempionatida ham ushbu yangilik  qo'llanilyapti. Aytgancha, Yaponiyadagi turnirga hamyurtimiz Ravshan Ermatov ham jalb etilgan. Videolavhalardan  gol va o'yindan tashqari holat bo'lgan yoki bo'lmaganini aniqlash, shuningdek, futbolchini maydondan chetlatish hamda penalti belgilash kabi bahsli vaziyatlarga oydinlik kiritish maqsadidagina foydalanish mumkin, xolos. O'z navbatida, yana bir gap - IFAB qaroriga ko'ra, aslida futbol qoidalariga bog'liq o'zgarishlar joriy yilning 1 iyunidan kuchga kirgan. Biroq bu paytda O'zbekistonda ichki musobaqalar, xususan, milliy chempionatimiz bahslari boshlanib ulgurgandi. Shu bois, bizda yangi qoidalar 2017 yilning 1 yanvaridan qo'llaniladi. O'zgartirishlar asosan qo'shimcha bo'limlarda to'rtinchi futbolchini almashtirish, jarima maydonida qoidani buzgan futbolchiga nisbatan birdaniga 3ta jazo - penalti, chetlatish va diskvalifikatsiya qo'llash holatini engillashtirishdan iborat. Davomi iff.uz saytida.
— deya xabar beradi uff.uz nashri.