Ma'lumki, Angliyaning «Manchester Yunayted» klubini oz emas, ko'p emas, naq 26 yil bosh­qargan ser Aleks Fergyuson murabbiylik faoliyati davomida ko'plab sovrinlarga ega chiqdi, bir qancha iste'dodli yoshlarni kashf qildi, futbolga «Fergi-taym» atamasini olib kirdi. Ammo bu insonning bizga noma'lum qirralari ham etarlicha. FourFourTwo internet portali «buyuk va dahshatli Fergi» hayotidagi mana shunday lahzalar haqida hikoya qildi. Pol Makgratga qarshi Viv Anderson («Manchester Yunayted» himoyachisi, 1987-1991 yillar): - Aleks bilan munosabatlar juda murakkab bo'lishini tushunishim uchun unchalik ko'p vaqt ketmagan. Fergi jamoani qabul qilib olganidan so'ng mavsumga tayyorgarlik asnosida «Xartlpul» bilan o'rtoqlik o'yini o'tkazdik. Bu voqea yomg'irli avgustda sodir bo'lgandi. Biz birinchi bo'limdan so'ng 0:5 hisobida yutqazayotgandik. Tanaffusda jamoamiz joylashgan kiyinish xonasi xuddi jang maydoniga o'xshab qoldi. Liboslar solingan sumkalar havoda «sayr qilib» yurar, devorga mixlanmagan har bir narsa xona bo'ylab uchishi mumkin edi. Bunisi ham etmagandek, u istalgan jamoadoshimning oldiga borib shunday baqirardiki, peshonasidagi tomirlar bo'rtib, yaqqol ko'rinib turardi: «O'zingni «Yunayted» o'yinchisiman deb yuribsanmi? Sen - lattasan!». Shu tariqa, u Pol Makgratga qichqira ketdi. Fergi bilan Polning yuzi orasida bir necha millimetrgina masofa bor edi, xolos. Makgrat esa o'zining irlandcha shevasida unga sekin javob qaytardi: «qichqirishning hojati yo'q, axir shundoq ro'parangizda turibman-ku». Hammamiz qo'rquvdan titrab, ichimizda shunday o'ylardik: «Yo'q! Pol, jimgina o'tirsangchi!». Albatta, Aleks yanayam balandroq ovozda qichqira ketdi. O'yin esa 0:6 hisobidagi mag'lubiyatimiz bilan tugadi. Kelasi yozdayoq Makgrat boshqa klubga sotib yuborildi. O'ylashimcha, bunga uning o'rinsiz gap qaytargani sabab bo'lgan. Ishdagi tezkorlik Li Sharp («Manchester Yunayted» vingeri, 1988-1996 yillar): - O'shanda 16 yoshli bola edim, «Torki» havaskorlar klubida to'p surardim. «MYu» skautlaridan biri meni Aleks Fergyusonga tavsiya qilibdi: «Bu erda bir yigitcha bor. Uning o'yinini albatta, ko'rishingiz kerak». Fergi shu zahotiyoq yoniga yordamchisi Archi Noksni olib, juma kungi o'yinimizni kuzatibdi. Shanba kuni esa mening Manchesterga ko'chib o'tishim aniq bo'lib ulgurgan edi. Eng qizig'i, men bundan tungi soat 2larda xabar topdim. Chunki xuddi shu vaqtda «Torki» murabbiyi va klub kotibi eshigimni taqillatib, men bilan «Yunayted» qiziqayotganini aytishdi. Shunday qilib, 17 yoshga to'lganimda, «MYu»ga ko'chib o'tdim va darhol asosiy tarkibda maydonga tusha boshladim. Antiqa muxbir Endi Mitten (muxlislar klubi muharriri): - 1991 yili 16 yoshligimda Aleks Fergyusonga xat yozib, u bilan uchrashmoqchi ekanimni, aniqrog'i, intervyu olish niyatim borligini bildirdim. Klubning rasmiy qog'ozida menga etib kelgan maktubda esa murabbiyning ijobiy javobi aks etgandi. Shundan so'ng kasseta solinadigan kattakon magnitofonimni qo'ltiqlagancha jamoa joylashgan mehmonxonaga etib bordim. Fergyuson meni ko'rib, ichagi uzilgudek kula boshladi. Chunki u qarshisida tajribali jurnalist paydo bo'lishini kutgandi. Bu ham etmagandek, shogirdlarini ham yoniga chaqirdi: «Bu yoqqa kelinglar, mana bu muxbirni ko'ringlar». Lekin uning kulgusi samimiy, beg'ubor edi. Shu tariqa, deyarli bir soat men bilan suhbatlashib, barcha savollarimga to'liq javob qaytardi. Nihoyatda band odamning shuncha vaqtini olganim, intervyuni qanday yakunlaganimni eslasam, haligacha uyatdan qizarib ketaman. O'shanda g'irt tentak bo'lgan ekanman... Davomi iff.uz saytida.
— deya xabar beradi uff.uz nashri.