Futbolchilik faoliyati davomida Chexiya, Sloveniya hamda Xitoy mamlakatlarida to'p surishga ulgurgan Aziz Ibragimov hozirda "Buxoro" klubi sharafini himoya qilmoqda. Ko'hna shaharliklarning "Navbahor"ga qarshi o'yini(0:1)dan so'ng ushbu futbolchi bilan bog'lanib, intervyu oldik.
- "Navbahor"ga qarshi o'yinda "Buxoro"ga nima etishmadi?
- Omadimiz chopmadi, ko'plab imkoniyatlarni ko'kka sovurdik. "Navbahor" esa bitta golli vaziyatdan unumli foydalanib, uch ochkolik bo'ldi.
- Futbolga qay tarzda kirib kelganingiz haqida gapirib bersangiz...
- 8-9 yoshligimdan millionlar o'yiniga oshno tutinganman. Futbolga kirib kelishimga mahalladoshimiz Shomurod aka sababchi bo'lganlar. U kishi o'g'illari bilan meni "Paxtakor" klubiga olib borgandilar. U erda esa bizni Asqar Tolibjonov qabul qilgandilar. Qolaversa, futbolchi sifatida kamol topishimda ota-onamning ham hissalari beqiyos.
- So'nggi paytlarda MTJga jalb etilmayotganingizni qanday izohlaysiz?
- Har bir murabbiy termaga o'z uslubiga mos tushadigan o'yinchilarni chaqiradi. Balki o'yinim jamoa ustozining taktikasiga to'g'ri kelmas. Yaxshisi, bu savol bilan murabbiyga murojaat etilsa, to'g'riroq bo'lardi.
- Sizningcha, milliy termamiz hozirgi tarkibi bilan 2018 yilgi JCh yo'llanmasini qo'lga kirita oladimi?
- Bu - butun O'zbekiston xalqining orzusi. Futbol muxlisi borki, terma jamoaga o'zgacha ishtiyoq bilan ishqibozlik qiladi. Bosh jamoamizning hozirgi tarkibi, o'zbek futboli tarixidagi eng kuchli tarkiblardan biridir. Nasib qilsa, albatta, Rossiyada o'tadigan mundialda qatnashamiz.
- MTJ tarkibidagi yorqin va noxush voqealar yodingizdami?
- Eng yoqimli xotira - Singapurga qarshi safar bahsida 7:3 hisobida zafar quchgandik. Ikkinchi bo'limda maydonga tushib, gol urganman. Janubiy Koreyada o'tkazilgan Iroqqa qarshi o'rtoqlik uchrashuvining dastlabki daqiqalarida qizil kartochka olganimni esa afsus bilan yodga olaman.
Davomi InterFUTBOL gazetasi blogida.
— deya xabar beradi uff.uz nashri.