ROSSIYaDA OMADLARI YuRIShMAGAN APL VAKILLARI. «MYu»ning sobiq vingeri Obertanning «Anji» va vaqtida «kanonirlar» safida to'p surgan Aleks Songning «Rubin» safiga qo'shilishlari katta shov-shuv ko'targan bo'lsada, ikkisi ham maydonda aytarli ko'zga tashlanganicha yo'q. Shunga alohida nazar tashlagan Vanity Fair blogi APLdan kelib, matbuotda «to'polon» boshlanishiga sababchi bo'lishgan, ammo o'yinlardagi ishtiroklari bunga sira mos tushmagan boshqa futbolchilarni alohida fotojamlanmaga «qamadi». Devid Bentli (Angliya) Evropadagi klublari: «Arsenal», «Blekbern», «Tottenxem», «Vest Xem» Rossiyadagi klubi va statistikasi: «Rostov», 7ta o'yin «Arsenal» tarbiyalanuvchisi vaqtida katta iqtidor sifatida ta'riflangan va navbati bilan Angliyaning turli yosh toifasidagi terma jamoalariga jalb etilgan. Xavbek Mark Xyuz boshqaruvidagi «Blekbern»da to'laqonli «ochilgandi» - «MYu»ga qarshi o'yindagi «xet-trik», jamoaning mavsum-2006|2007dagi eng yaxshi futbolchisi maqomi. Devid standart vaziyatlar ijrosi, chiroyli va aniq zarba hamda zargarona to'p uzatish sifati bo'yicha o'z adashi - Bekxem bilan bemalol raqobatlashardi. «Tottenxem» bularning barchasini 18 mln. evroga baholadi, biroq Bentli «taqachilar» safida Lennon bilan raqobatlasholmay, «pana»ga o'tdi. «Rostov»da esa Rossiya chempionatidagi birinchi ingliz sifatida to'p surgan futbolchi asosiy maqsadi o'yin amaliyotiga ega bo'lish ekanligini yashirmadi, ammo navbatdagi jarohatga yo'liqqach, jimgina ortiga qaytib ketdi. Royston Drente (Gollandiya) Evropadagi klublari: «Feyenoord», «Real», «Everton» Rossiyadagi klubi va statistikasi: «Alaniya», 6ta o'yin, 3ta gol «Real»ga erta o'tish gollandiyalik iqtidor zarariga ishladi. Umuman, u «Alaniya» bilan shartnoma tuzayotgan payt 8 oydan buyon o'ynamayotgan va butsasini mixga ilishni ham o'ylayotgandi. Shu vaqtda selektsionerlar asli surinamlik yigitni Vladikavkaz tomon uchishga ko'ndirishdi. Biroq bundan zarracha naf chiqqani yo'q. Drente Rossiyada «Mordoviya» darvozasiga yo'llagan 3ta goli bilan esda qoldi, xolos. Boz ustiga, «Alaniya» quyi divizionga tushib ketdi. Davomi Interfutbol.uz saytida.
— deya xabar beradi uff.uz nashri.