Yurtimizda faoliyat yuritayotgan “championat.asia” sayti uch yildan beri oliy liga klublari bosh murabbiylari va sardorlari o'rtasida yilning eng yaxshilarini aniqlash maqsadida "Do'ppi" tanlovini o'tkazib kelmoqda. Bugun 2016 yil yakunlari bo'yicha o'tkazilgan tanlov yakunlari e'lon qilindi. Unga ko'ra “Lokomotiv” jamoasida faoliyat yuritayotgan Mirko Yelichich eng yaxshi murabbiy nominatsiyasida g'oliblikni qo'lga kiritdi. O'zbekistonning eng yaxshi futbolchisi nomiga “Krasnodar” klubi va terma jamoamiz yarim himoyachisi Odil Ahmedov loyiq ko'rilgan bo'lsa “Loko” hujumchisi Timurxo'ja Abduholiqov oliy liganing eng yaxshi futbolchisi deb topildi.
“Do'ppi” tanlovida jamoamiz bosh murabbiyi Ilhom Mo'minjonov va jamoa sardori Dilshod Jabborovlar ham o'z ovozlari bilan ishtirok etishdi. Muxlislarimizni vakillarimizni kimlarga ovoz berishgani qiziqtirishi tabiiy hol. Mo'minjonov O'zbekistonning eng yaxshi futbolchisi nominatsiyasida Odil Ahmedov, Vitaliy Denisov, Sardor Rashidovlarga ovoz berdi. Oliy liganing eng yaxshi futbolchisi nominatsiyasida bosh murabbiyimiz Timurxo'ja Abduxoliqov, Jaloliddin Masharipov, Eldor Shomurodovlar nomozdini ko'rsatgan bo'lsa murabbiylar o'rtasidagi so'rovda Ro'ziqul Berdiev, Sergey Lushan, Jamshid Saidovlarga ovoz bergan.
Dilshod Jabborov esa O'zbekistonning eng yaxshi futbolchisi so'rovida Odil Ahmedov, Vitaliy Denisov, Aleksandr Geynrixlarga ovoz berdi. Oliy liga futbolchilari orasidan esa Eldor Shomurodov, Timurxo'ja Abduxoliqov, Jaloliddin Masharipovlar nomzodini ko'rsatgan bo'lsa murabbiylardan Mirko Yelichich, Ro'ziqul Berdiev va Jasur Abduraimovlarni qayd etgan.
— deya xabar beradi uff.uz nashri.