Osiyo Chempionlar Ligasi-2016 doirasidagi final o'yinlari (19-26 noyabr) yakunlanganiga 3 hafta bo'lmay turib, keyingi mavsum uchun qur'a tashlandi. Bunday tezkorlik faqat OFKga xos. Tezkorlik yaxshi, faqat shunisi borki, ayni payt navbatdagi musobaqaning guruh bosqichida o'ynaydigan naq 10ta jamoa nomi aniq emas! Lekin hozir bu haqda gaplashmaymiz, aksincha, OChL-2017 sari yo'lga tushadigan 3ta klubimizning qisqa muddat ichida ehtimoliy va aniq bo'lib ulgurgan raqiblari bilan qachon, qanday o'ynagani  xususida ma'lumot beramiz. Umuman olganda, OFK tomonidan 15-marta tashkillashtirilayotgan ushbu turnirda asosan eski tanishlar yana bir karra uchrashishadi. Xususan, bizning vakillar ham bo'lajak  raqiblari bilan oldingi yillarda 10 marta to'qnash kelishgan. Deylik, oxirgi mavsumda bunday o'yinlar 2 marta kuzatildi. To'g'ri, alohida inobatga olish kerak, «Bunyodkor» va «Nasaf» jamoalaridan eski tanishlar bilan yana uchrashish uchun avvalo, saralash raundlaridan OMON o'tish talab etiladi. «A» guruhi: «Al-Ahli» (BAA), «Lokomotiv» (O'zbekiston), «Al-Tovun» (Saudiya Arabistoni), «Istiqlol» T. (Eron) yoki «Al-Sadd» (Qatar) «Lokomotiv» OChLda 2013 yili debyut qilganidan buyon, jami 18ta o'yin o'tkazdi va oxirgi mavsum nihoyat, chorak finalga chiqdi. Umumiy statistikasi: 4ta g'alaba, 7ta durang, 7ta mag'lubiyat. «Temiryo'lchilar» bo'lajak raqiblaridan biri - «Al-Sadd» bilan bevosita tanishlar. To'g'ri, Qatarning ushbu jamoasi guruh raundiga qo'shilish yo'lida hali Eronda Tehronning «Istiqlol» klubini engishi kerak. Darvoqe, «Loko» Osiyo arenalaridagi eng yirik mag'lubiyatini aynan Doxa klubidan qabul qilib olgandi. Esingizdadir, «temiryo'lchilar» 2015 yilgi mavsumda avvaliga safarda 2:6 hisobida yutqazishgan, keyin Toshkentda bu jamoani chinakamiga «mehmon» qilib, «qarz»ni ortig'i bilan qaytarishgandi - 5:0. 2015 yil 17 mart. Doxa. «Jassim bin Hamad» stadioni. 3825 tomoshabin. Guruh bosqichi. «Al-Sadd» - «Lokomotiv» - 6:2. Hakam: Benjamin Uilyams (Avstraliya). Gollar: Xalfan Ibrohim (27-pen., 50), Hassan al Haydos (34), Nodir Belxaj (40), Abdulkarim Hassan (63), Grafite (66) - Damir Koyashevich (56), J.Hasanov (77-pen.). 2015 yil 8 aprel. Toshkent. «Lokomotiv» stadioni. 3852 tomoshabin. Guruh bosqichi. «Lokomotiv» - «Al-Sadd» - 5:0. Hakam: Kim Dong Jin (J.Koreya). Gollar: Marat Bikmaev (7, 14), Sanjar Shoahmedov (55), Damir Koyashevich (79), Ruslan Koryan (90Q1). «B» guruhi: «Istiqlol» H. (Eron), «Al-Jazira» (BAA), «Lahviya» (Qatar), «Al-Fotih» (Saudiya Arabistoni) yoki «Nasaf»(O'zbekiston) |«Al-Hidd» (Bahrayn) Qarshining «Nasaf» klubi OChLda 2012 yili ko'rinish bera boshlagandi. Jamoa shundan buyon turnir doirasidagi 19ta o'yinda ishtirok etdi. Umumiy statistikasi: 3ta g'alaba, 5ta durang, 11ta mag'lubiyat. Qarshiliklar ehtimoli bor guruhdoshlari orasida Abu-Dabining «Al-Jazira»siga qarshi o'ynab ko'rishgan. Eslang, BAA klubi yurtimizga kelganida qor qoplangan maydonga oid muammolar tufayli o'yin bir kun keyinga surilgan va unda vakillarimiz mag'lub bo'lishgandi. 2012 yil 7 mart. Qarshi. «Nasaf» stadioni. 13000 tomoshabin. Guruh bos­qichi. «Nasaf» - «Al-Jazira» - 2:4. Hakam: Choy Myung Yong (J.Koreya). Gollar: Fozil Musaev (2), Sami Rabiy (18-avt.) - Juma Abdulloh (39), Abdulloh Muso (68), Bare (75), Rikardo Oliveyra (88). 2012 yil 2 may. Abu-Dabi. «Muhammad Bin Zayd» stadioni. 820 tomoshabin. Guruh bosqichi. «Al-Jazira» - «Nasaf» - 4:1. Hakam: Peter Grin (Avstraliya). Gollar: Bare (6), Rikardo Oliveyra (14-pen., 33, 42-pen.) - Ilhom Shomurodov (69). «C» guruhi: «Al-Ahli» (Saudiya Arabistoni), «Zob-Ohan» (Eron), «Al Ayn» (BAA), «Al-Jaish» (Qatar) yoki «Bun­yodkor»(O'zbekiston) Davomi iff.uz saytida.
— deya xabar beradi uff.uz nashri.