Ma'lumki, biz futbol sohasidagi aksariyat natijalarga e'tibor qaratar ekanmiz, «MDHdagi eng yaxshi ko'rsatkich», «MDHning eng kuchli futbolchisi» kabi jumlalarga to'qnash kelamiz. Istaymizmi-yo'qmi, o'zimizning futbolchilar erishayotgan yutuqlarni taqqoslash uchun ham ko'proq qo'shni davlatlardagi natijalarga diqqat qaratamiz. Endi bir tasavvur qilib ko'raylik: agar MDHning ayni paytdagi eng kuchli futbolchilaridan terma jamoa tuzilsa, u qanday ko'rinish hosil qilardi? Quyida shu savolga javob olasiz... Darvozabon Igor Akinfeev Igor o'tgan shanbada faoliyatidagi 253-«quruq» o'yinini o'tkazib, bu borada sobiq ittifoqning faxri sanalgan Rinat Dasaevdan o'zib ketdi va yaqqol rekordchiga aylandi. Eng muhimi, Akinfeev ikki marta og'ir jarohat olganiga qaramay, yana top-darajaga, ya'ni yuqori saviyaga chiqa oldi. Uning ajoyib seyvlari tufayli «harbiylar» etti yillik tanaffusdan so'ng yana chempionlik shohupasiga ko'tarilishdi. Bundan olti yil avval esa Igor evrokuboklardagi «quruq» o'yinlar borasida sobiq ittifoq va Rossiya rekordini o'rnatgandi. Himoyachilar Mario Fernandes Rossiya premer-ligasi tarixidagi eng foydali legionerlardan biri oxirigacha harakat qilishni, tez-tez hujumga qo'shilishni yaxshi ko'radi. Albatta, uning rus tilini bilmasligi mazkur ramziy terma jamoada biroz pand berishi turgan gap. Ammo Mario o'zgalarning ko'rsatmasisiz ham o'ng qanot himoyasida nimalar qilishi lozimligini yaxshi biladi. Boz ustiga, u kerakli vaqtlarda tayanch yarim himoyachilariga ham yordam berishi mumkin. Ochig'ini aytganda, uning hisobidagi gollar soni ko'p emas (TsSKAdagi to'rt yarim mavsumda ikkita gol). Biroq Fernandes o'zi gol urmasada, jamoadoshlarini qulay vaziyatga olib chiqishda ustasi farang. Yaroslav Rakitskiy Mircha Lucheskuning sevimli futbolchilaridan biri yozda «Shaxtyor» asosiy tarkibidagi o'rnini yo'qotib qo'yishiga oz qoldi. Chunonchi, jamoaning yangi ustozi Fonseka Rakitskiyni zaxira o'rindig'iga o'tqazib qo'ydi. Lekin klub EChLdan chiqib ketgach, Rakitskiy tarkibga qaytdi va eng qizig'i, «Shaxtyor» shundan beri hali yutqazmadi. Yaroslavning chap oyog'i uzoq masofalarga aniq to'p oshirishda, kuchli zarbalar berishda juda qo'l keladi. Fred doping mojarosiga aralashib qolgan paytlari aynan Rakitskiy jamoa hujumlarini tashkil etib turdi. Braziliyalik tarkibga qaytganidan so'ng esa u ko'proq himoyaviy harakatlarda o'zini ko'rsatmoqda. Vasiliy Berezutskiy TsSKA himoyachisi nafaqat Rossiya, balki Evropa chempionati va ChLda ham g'oyat muhim gollarni uradi. Vasiliyning asosiy yutuqlaridan biri shuki, uning asablari po'latdek mustahkam bo'lib, kerakli paytda Serxio Ramosga aylanadi va shu holatda ham o'zining sovuqqonligini saqlab qoladi. Shuningdek, Berezutskiy sheriklarini ruhlantirish bilan birga, dunyodagi eng kuchli markaziy himoyachilardan biri hamdir. Ehtimol, uning tezligi pastdir, ammo juda aqlli futbolchiligi aniq. Vitaliy Denisov «Lokomotiv»ning o'zbekistonlik himoyachisida jismoniy kuch va yuqori aqliy salohiyat xislatlari mujassam. Vitaliy - to'pni raqibdan olib qo'yish (7-o'rin) va hujumlarni to'xtatish (2-o'rin) bo'yicha RFPLdagi eng yaxshi futbolchilardan biri. To'g'ri, Denisov ba'zida pozitsion xatolarga yo'l qo'yadi, ammo birinchidan, bu xatolar tobora kamayib boryapti, ikkinchidan, futbolchi bu kamchilikni mehnatsevarligi bilan bemalol «yopib» yuboryapti. Uning hujumlarga qo'shilishi - «Lokomotiv» uchun judayam muhim omil. Shuningdek, Vitaliy samarali uzatmalari va yon chiziqdan to'pni uzoqqa uloqtirib berishi bilan ham dovruq taratgan. Yarim himoyachilar Denis Glushakov Bizningcha, Glushakov haqidagi eng yaxshi fikrni kuni kecha Massimo Karrera aytdi: «U xuddi Jerrardga o'xshaydi. Ya'ni, Denis himoya va hujum chiziqlarini bog'labgina qolmay, o'zi ham gol urishni uddalaydi». Umuman, hozirgi paytda Denis har qanday klub safida o'zini ko'rsata oladi. Lekin shunisi qiziqki, u haligacha biror-bir sovrinni qo'lga kiritmagan. Ehtimol, bu safar uning omadi kelar?! Chunki Glushakov birinchi davraning o'zida o'tgan mavsumdagi jami gollaricha to'p kiritdi. Odil Ahmedov «Krasnodar»ning etakchi futbolchilaridan biri Valeriy Nepomnyashiy tufayli «Paxtakor» tarkibidan mustahkam o'rin olgandi. Oradan besh yil o'tgach, u Roberto Karlos va Eto~Olar qatori «Anji»da porladi. Shu yilning iyun oyida «Krasnodar» muxlislari iqtidorli yarim himoyachini jamoadagi eng kuchli futbolchilardan biri sifatida tan olishdi (Odil so'rovnomada Smolovdan ozgina kamroq ovoz to'plaganini bilasiz). Zero Ahmedov o'tgan mavsumda «Krasnodar» uchun uchta gol urib, yana shunchasiga hammualliflik qilgan edi. Davomi iff.uz saytida.
— deya xabar beradi uff.uz nashri.