Mamlakatimizda aholi, ayniqsa, yoshlarning sport bilan muntazam shug'ullanishi uchun keng imkoniyatlar yaratilayotgani, zamonaviy sport majmualari, bolalar va o'smirlar sport maktablari foydalanishga topshirilayotgani, ayniqsa, qizlar o'rtasida sportni rivojlantirishga qaratilayotgan e'tibor samarasida xalqaro miqyosdagi nufuzli musobaqalarda muntazam g'olib va sovrindorlar qatoridan joy olib, Vatanimiz sharafini dunyoga tanitayotgan sportchi qizlarimiz safi tobora kengayib bormoqda.
 Bugun mamlakatimizning barcha hududlarida zamonaviy bolalar sporti inshootlari barpo etilmoqda. Xalqaro andozalar darajasida jihozlangan markaz va sektsiyalar, sport komplekslari faoliyat ko'rsatmoqda. Ayniqsa, qizlarning jismoniy tarbiya va sport bilan muntazam shug'ullanishi uchun barcha sharoitlar muhayyo.
Tennis bo'yicha O'zbekiston milliy terma jamoasi a'zosi Sabina Sharipova ana shunday imkoniyatlardan unimli foydalanib, mamlakatimiz dovrug'ini dunyoga tanitayotgan iste'dodli yoshlardan. Sportchilar oilasida dunyoga kelgan bu qiz oiladagi sog'lom turmush tarzi, sportga bo'lgan e'tibor tufayli sakkiz yoshida ilk bora qo'liga raketka olib, tennis to'garagiga bordi.
to'garakda birinchi murabbiyi Galina Suprunovadan tennisning ilk  sirlarini o'rgangan jajji qizaloq mazkur sport turi bilan jiddiy shug'ullanib, nufuzli turnirlarda Vatanimiz sharafini munosib himoya qilishni o'z oldiga maqsad qildi.
Sabina mamlakatimizda ko'plab sport turlari kabi tennisni yanada ommalashtirish maqsadida O'zbekiston Respublikasining Birinchi Prezidenti Islom Karimovning 2008 yil 29 apreldagi qarori bilan tashkil etilgan Respublika olimpiya zaxiralari tennis maktabining ilk qaldirg'ochlaridan. U mazkur maktabda yuqori malakali o'qituvchi va murabbiylardan saboq oldi, tajriba va mahoratini muntazam oshirib bordi. 2013 yili Respublika olimpiya zaxiralari kollejini tamomlab, O'zbekiston davlat jismoniy tarbiya inistitutiga o'qishga kirdi.
Sabina shahar va respublika miqyosidagi musobaqalarda g'oliblikni qo'lga kiritdi va o'n to'rt yoshida O'zbekiston terma jamoasiga qabul qilindi.
Xalqaro tennis federatsiyasi (ITF)ning o'n olti yoshgacha bo'lgan tennischi qizlar reytingida 12-pog'onagacha ko'tarildi. “Katta dubulg'a” turkumiga kiruvchi “Australian open” turnirining o'smirlar o'rtasidagi bahslarida chorak finalga qadar etib bordi. O'n besh yoshida poytaxtimizda Xalqaro xotin-qizlar tennis uyushmasi (WTA) tasnifiga kiruvchi “Toshkent open” turnirida ilk bora ishtirok etdi.
Sabina tez orada turli nufuzli musobaqalarda o'z iqtidorini namoyon etdi. Tennischimiz xalqaro maydondagi ilk sovriniga 2010 yili Malayziyaning Kuchin shahrida o'tgan turnirda qo'lga kiritdi. 2012 yili Andijonda o'tgan nufuzli musobaqada shohsupaga ko'tarildi.
2013 yilda Qarshida Xalqaro tennis federatsiyasi musobaqalar taqvimidan joy olgan ikki nufuzli turnirda zafar quchgan Sabina o'sha yili Qozog'istondagi musobaqada g'alaba qozondi. 2015 yili yana bir bor Qarshi shahri mezbonlik qilgan musobaqada birinchi bo'ldi.
– Xalqimizning ishonchi, murabbiylarimning maslahati va qo'llab-quvvatlashi har qanday yirik musobaqada menga kuch bag'ishlaydi. Kelgusida bundan-da yuqori natijalarga erishib, Vatanimiz sharafini dunyoda yanada yuksaltirishga bor kuchim va mahoratimni ishga solaman. Bu kabi ulkan maqsadimizni amalga oshirish uchun biz yoshlarda barcha shart-sharoitlar mavjud, – deydi Sabina.
Joriy yilgi sport mavsumi ham iste'dodli sportchimiz uchun muvaffaqiyatli o'tmoqda. S.Sharipova 2016 yili ITF tomonidan Andijonda, Hindistonda, Xitoyda o'tgan musobaqalarda bosh sovrinni qo'lga kiritdi.
– Mamlakatimizda qizlarni sport bilan muntazam shug'ullanishlari uchun yaratib berilayotgan sharoitlar yurtimizning minglab yoshlari kabi qizimning ham salomatligini mustahkamlashda, tafakkuri, dunyoqarashi, hayot tarzini to'g'ri shakllantirishda muhim omil bo'lmoqda, – deydi Sabinaning onasi Dinara Sharipova. – Qizim, xalqaro musobaqalarda g'alaba qozonganida faxrlanib ketaman, ko'zlarimda quvonch yoshlari qalqiydi. Sport uning iqtidorini kashf etdi, uni yurtimiz va xalqaro miqyosda tanitdi. Biz etolmagan orzularimizga bugun farzandlarimiz erishmoqda.
Ayni kunlarda mamlakatimiz xotin-qizlar terma jamoasi birinchi raketkasi o'z mahoratini oshirish ustida tinimsiz izlanish olib bormoqda. Ishonamizki, xalqimizning ishonchiga sazovor bo'lgan sportchimiz kelgusida tennis olamining yangi-yangi cho'qqilarini zabt etishi shubhasiz.
— deya xabar beradi uff.uz nashri.