Yaqindagina «Oltin to'p» laureati sifatida yana bir marta jahonning eng yaxshi futbolchisi maqomini olgan «Real» klubi va Portugaliya terma jamoasi etakchisi Krishtianu Ronaldu Yaponiya safari oldidan sovrin ta'sischisi - France Football nashriga katta intervyu berdi. Musohaba davomida muxbirlar undan birinchi va to'rtinchi «Oltin to'p» o'rtasidagi farq xususida so'rashdi, futbolchining o'zi esa barcha do'stlarini Madeyradagi shaxsiy muzeyiga taklif qildi va  alohida va'da ham berdi: «Ke-yingi yili «Oltin to'p» masalasida Lionel Messi bilan tenglashaman». Dunyo bo'yicha eng yaxshi bo'lish - Qiziq, «Oltin to'p» haqida birinchi marta qachon eshitganingizni eslay olasizmi? - O, uzoq bolaligimda. Xotiramda muhrlanib qolgani shuki, hamma sov-rin kimga nasib etishini kuchli hayajon bilan kutardi. O'zimga kelsak,  portugaliyalik sifatida 2000 yilgi sovrinni yaxshi eslab qolganman. Chunki u hamyurtim Luish Figuga berilgandi. - Shundan atigi 4 yil o'tib, sizning familiyangiz ham da'vogarlar ro'yxatida ko'zga tashlandi. - Ha, bu «Manchester Yunayted»dagi debyut mavsumimga to'g'ri kelgandi. O'shanda aynan nechanchi o'rinni band etganimni unutib bo'lganman, ammo shu-shu elit ro'yxatdan uzluksiz joy olib kelyapman. Umuman, da'vogarlar qatoriga tushish men uchun qo'shimcha motivatsiya hisoblanadi. Zero, shunday taqdirda real nomzodlardan biri ekanligimni anglayman. - Umuman, yoshlik chog'i «Oltin to'p»ni yutish haqida orzu qilganmisiz? - Ha. Doimo boshqalarga o'xshamasligimni bilgan va shunga yarasha, dunyoda eng yaxshi futbolchi bo'la olishimga ishonganman. Shuning barobarida barchasi yolg'iz o'zimga bog'liq emasligini ham tushunardim. Xullas, «Oltin to'p»­ni loaqal bir marta qo'lga olishdan umidvor edim, endi esa naq 4tasi sohibiman... - Boshqalarga o'xshamasligingizni bilgan ekansiz, xo'sh, aynan nimalarda o'zgacha edingiz? - Birinchidan, maydonda boshqalar uddalolmaydigan ishlarni bajara olardim. Nisbatan kuchli edim, to'pga yaxshi zarba berardim va aksariyat bolalardan ko'proq gol urardim. Oddiy aytganda, yoshlik davrimdayoq boshqalardan yaxshiroq o'ynay olishimga ishonch hosil qilganman. Muhimi, buni isbotlash imkoniyatini uzoq kutmadim - katta futbolga ancha erta qadam tashladim. Yosh jihatidan katta futbolchilar davrasida o'ynay boshlaganimdayoq chin professionalga aylanib, shu orqali o'zim va oilamga farovon hayotni ta'minlay olishimga shubham qolmagandi. Yupatuvchi ko'z yoshlar - Aytingchi, siz yutgan birinchi «Oltin to'p» va joriy yilgi to'rtinchi sovrin o'rtasida qanday farq bor? - Har bir ishda birinchisi alohida his-tuyg'ularni uyg'otadi. Yashirmayman, 2008 yili sovrinni qo'lga olar ekanman, cheksiz baxtiyorlikni tuygandim. Go'yo-ki, «Oltin to'p» men va oilam uchun orzularning chegarasi edi. Xullas, 23 yoshli yigit uchun unutilmas lahzalar... Bugun esa hissiyotlar sal boshqacha. Futbolga  hayotiy kasb o'laroq qaray boshlaganimga ancha bo'ldi. Bu yo'lda ko'p narsalarni qurbon qilishimga to'g'ri keldi. Shu jihatdan qarasak, to'rtinchi «Oltin to'p» ham alohida qadrga ega. Shu joyda ta'kidlashim o'rinli, jamoasiz - «Real» klubi va Portugaliya termasi yordamisiz uni yutishim aslo mumkin emasdi. - Ikkinchi «Oltin to'p»ni birinchisiga nisbatan olganda, naq 5 yil kutgansiz. Orada taqdirlash marosimida hattoki, ko'z yoshi to'kkandingiz - bu yodingizdami? - Albatta, esimda. Lekin ular ko'rolmaslik yoxud baxillik ko'z yoshlari emasdi... Tan olaman, o'sha vaqt «Oltin to'p»ni atigi bir marta yutgan futbolchi bo'lib qolishni aslo xohlamaganman. Yana meni kim bilandir tenglashtirishlariga sira toqat qilolmasdim. Chunki ko'prog'iga munosib ekanligimni bilardim va ko'prog'ini xohlardim. Umuman, to'kilgan o'sha ko'z yoshlari uzoq yillik mehnat va kurashga nisbatan tasalli edi. - Yana bir yildan so'ng «Oltin to'p»ning uch karra laureatiga aylandingiz. Bunisi endi mehnatingizning tarixiy tan olinishi bo'ldi. Zero, sovrinni 3 marta yutgan afsonalar - Kroyff, Platini va  van Bastenga tenglashdingiz... - Qachonki, buyuk o'yinchilar haqida gapirilsa, shu familiyalar quloqqa chalinadi. Doimo ularning darajalariga eta olishimga ishonganman. Hayotda biror futbolchiga hasad bilan qaramaganman. Har biri o'ziga yarasha, buyuk. Biroq mudom futbol tarixidan joy olishga ko'zim etgan. Bunga o'zimga xos «men» emas, raqamlar va natijalar dalolat. - «Oltin to'p»-2016 birgina sizniki emas, balki Portugaliya termasining  Evro-2016dagi zafari mahsuli ham? - Shak-shubhasiz, shunday. 2016 yil ham shaxsiy, ham jamoaviy tomondan faoliyatimdagi eng yaxshi davr bo'ldi. Axir shaxsiy hisobimda aynan Portugaliya termasi bilan yutilgan sovrin yo'q edi. Boz ustiga, Chempionlar Ligasi taxtiga ham ko'tarildik. Ha, tengi yo'q va unutilmas mavsum... Ushbu g'alabalar o'rtasidagi bitta farq shuki, «Real» 11-marta, terma jamoam esa 1-marta kubok sovrindoriga aylandi. Chempionlar Ligasini kamsitish niyatim yo'q, ammo tan olishim kerak, Portugaliya termasi uchun chempionlik maqomi darhaqiqat, juda muhim edi. Hissiyotlar nuqtai nazaridan Evropa birinchiligi finalidagi g'alabani 2008 yili menga berilgan ilk «Oltin to'p»ga qiyoslash mumkin. Madeyradagi muzey - Sir bo'lmasa, avvalgi 3ta «Oltin to'p»ni nima qildingiz? - Men qo'lga kiritgan barcha individual va jamoaviy sovrinlar Madeyradagi shaxsiy muzeyimda saqlanadi. To'rtinchi «Oltin to'p» ham tez orada ular yonidan joy oladi va tashrif buyuruvchilar uni bemalol tomosha qilishlari mumkin. Bu muzey meni xush ko'ruvchi muxlislar bilan aloqa o'rnatishning bir yo'nalishi. Deylik, ko'pchilik «Oltin to'p»­ni biror marta yaqindan ko'rgan emas. Mening muzeyimda esa birdaniga 4tasi chiroyidan bahra olish imkoni bor. Qolaversa, u erda «Oltin butsa»lar, ChLda yutilgan mukofotlar bor. Agar o'zim futbol ixlosmandi bo'lganimda va Madeyraga borganimda, albatta, Krishtianu Ronaldu muzeyiga kirardim. Zero, u juda zo'r, eksponatlari ta'rifi yo'q taassurotlar bag'ishlaydi. - Demakki, sizningcha, mukofot-sovrinlarni uyda saqlashdan ko'ra, keng ommaga havola etgan ma'qul... - Ha. Axir bu seni qo'llab-quvvatlaydigan, g'alabali va mag'lubiyatli kunlarda birdek sevuvchi odamlar uchun haqiqiy sovg'a sanaladi. Doimiy tarzda ularning ishonchlarini oqlashim shart. Misol uchun, Maykl Jordan yuqori saviyani saqlab turish uchun yildan-yilga o'yin uslubini o'zgartirganidan yaxshi xabardorman. O'zingizni ehtiyot Qiling! - Nima, Jordandan o'rnak olishni istaysizmi? - Bunda noodatiy tomoni yo'q. Har qanday inson yillar o'tishi bilan nimanidir yo'qotadi, shuning barobarida qaysidir jihatda kuchayadi. Xullas, doimo yaxshi jismoniy holatda bo'lishga urinaman. Ya'ni faqat bugungi kun bilan yashash menga xos emas. Deylik, mudom keyingi mavsum haqida ham o'ylayman. Misol uchun, barcha o'yinlarda emas, faqat eng muhimlarida maydonga tushishim mumkin. Sog'lom fikrlash, effektli shug'ullanish, mavsumlar oralig'ida individual dastur asosida ishlash muhim. Yana o'z kuchingni mavsum oxirigacha teng chamalashing katta ahamiyatga ega. Axir futbol sprint emas, balki marafondir. - Chindan ham, o'zingizni avaylashga urinasizmi? - Nima qilishim kerak? Tushuning, garchi hamon kuchga to'la bo'lsamda, 31 yoshga to'ldim. O'yinlardan so'ng avvalgidek tezda tiklanmayotganim sezilyapti, ayniqsa, har uchinchi kuni maydonga tushishga to'g'ri kelganida. Hattoki, yoshlik payti ham doimo yuqori saviyada o'ynash mumkin emas. Bilamanki, salomatligim xususida qayg'urish bilan faoliyatim davomiyligini uzaytirishim mumkin. Shuningdek, maydonda pozitsiyamni o'zgartirishim ham hech gap emas. - Butsalaringizni qachon mixga ilasiz - «Oltin to'p»ni boshqa qo'lga kiritolmaslikni tushunganingizdami? - Yo'q, maydonga «Oltin to'p» uchungina tushmayman. Muhimi - o'ynash, hattoki, yomg'ir yoki sovuqqa qaramay, shug'ullanish. Bordiyu, o'ynash va shug'ullanish ishtiyoqi so'nsa, darhol barchasiga nuqta qo'ygan ma'qul. Hayotda barchasining ibtido va intihosi bor, futbolda ham. Bilaman, vaqti kelib, mavsum davomida 50ta gol urolmasligim, «Oltin to'p»ni yutolmasligim va hattoki, da'vogarlar qatoriga ham kirolmasligim mumkin. Ehtimol, 2-3 yildan keyin shunday bo'lar... Ammo umid shuki, bu vaqt keyinroq keladi. - Bu safar xalqaro hakamlar hay'ati so'rovida 2-o'rinni egallagan Lionel Messini 400tadan ortiq ochkoga ortda qoldirdingiz. Shunday engillik bilan g'alaba qozonishni o'ylaganmidingiz? - Ochig'ini aytsam, ha. Leo xuddi klubdoshim Garet Beyl, «Atletiko» vakili Antuan Grizmann yoki Portugaliya termasining ba'zi futbolchilari kabi juda yaxshi o'ynadi. G'alabaga ishonganmidim? Ishongandim, ammo oxiriga qadar yuqori saviyada qolishga urindim, negaki, tanlash o'zgalar ixtiyorida. «Oltin to'p» - bu statistika bo'yicha beriladigan «Oltin butsa» emas-ku. O'z navbatida, mening foydamga ovoz bergan jurnalistlarga minnatdorchilik bildiraman. Bu to'g'ri tanlov bo'ldi! Davomi bor. Davomi "InterFUTBOL" nashrida.
— deya xabar beradi uff.uz nashri.