Klublar o'rtasidagi JCh o'tgan hafta start olgan bo'lsada, ko'pchilik muxlislar bundan bexabar qolishdi. Chunki ularda chinakam qiziqish uyg'otadigan «Real» naq bir haftadan keyin kurashga kirishadi. Dunyoning turli burchaklarida eng kuchli ekanliklarini isbotlagan jamoalar o'rtasidagi musobaqa boshidan oxirigacha anshlag sharoitida o'tishi lozimdek. Futbol olamining yangi hukmdori aynan mana shu jihatga e'tibor qaratib, uni isloh qilish g'oyasini ilgari surdi. Turnirning bugungi holati Klublar o'rtasidagi JCh hozirda bo'lib o'tayotgan musobaqa uchun o'ta jarangdor nom. Jarangdorligi ayb emas, lekin o'z nomini oqlay olmayapti-da. Agar musobaqani terma jamoalar o'rtasidagi JCh bilan taqqoslaydigan bo'lsak, uni klublar o'rtasidagi konfederatsiyalar kubogi de­yish to'g'riroq bo'lardi. Rost-da, o'z qit'alarida g'olib chiqqan klublar va mezbon jamoa o'rtasidagi bahslarni chempionat deb atash to'g'ri kelmaydi-ku. Boz ustiga, hozirgi konfederatsiyalar kubogi turnirida unga qandaydir joziba berib turadigan guruh bosqichi bor. Klublar o'rtasidagi JChda esa hatto «pley-off» ham bir tekis emas: Evropa hamda Janubiy Amerika klublari faqat yarim finaldan boshlab bahsga qo'shilishadi. Vaholanki, muxlislar aynan shu jamoalarning o'yinlariga qiziqadilar. Ochig'ini aytganda, o'tmishga aylangan qit'alararo kubok (EChL va Libertadores kubogining sohiblari o'rtasidagi) bahsi klublar o'rtasidagi JChdan qiziqarliroq. Birinchidan, bor-yo'g'i bitta o'yin o'tkazilishi unga eksklyuziv maqomini beradi. Ikkinchidan, bahsda nisbatan teng kuchli jamoalar bellashadi. Tabiiyki, murosasiz va qiziqarli tarzda o'tadi. Infantino nima qilmoqchi? Hozir FIFA prezidenti klublar o'rtasidagi JChni toq yillarning iyun oylarida o'tkazish xususida bosh qotirmoqda. Konfederatsiyalar kubogini unchalik xush ko'rmaydigan Janni bu yo'lda undan voz kechishga tayyor, klublar o'rtasidagi JCh ishtirokchilari sonini 32taga etkazish niyatida. Tan olaylik, bu o'ta qiziqarli g'oya: «Real», «Bavariya», «Barselona» kabi Evropa grandlari o'ta qisqa turnirda Janubiy Amerikaning nomdor klulari bilan bellashadi, amalda ommaviy sahnalar uchun taklif etiladigan boshqa qit'a vakillari esa kutilmagan syurprizlar bilan muxlislarni mamnun etish imkoniyatiga ega bo'lishadi. Qolaversa, klublar o'rtasidagi JCh bu jamoa­lar uchun ulkan tajriba maktabiga aylanadi. FIFA rahbari mazkur qiziqarli g'oyani iyunning 10-30 kunlari oralig'ida o'tkazishni rejalashtirmoqda. Keling, yangi islohotning jihatlarini ko'rib chiqaylik. Klublar o'rtasidagi JChning hozirgi formati xususiyatlari Ijobiy jihatlari. Fikrimizcha, turnirning bitta ijobiy jihati bor: u nisbatan uzoqqa cho'zilmaydi. Evropa vakili atigi 2ta uchrashuv o'tkazadi. Demak, ichki chempionat davom etayotgan bo'lsa, bitta o'yinni boshqa muddatga ko'chirish kifoya qiladi. «Stsenariy yo'q, aktyorlar kuchli emas, maxsus effektlar 90-yillarga xos. Lekin «film» qisqa, ko'p vaqtni olmaydi - miriqib tomosha qilish mumkin». Salbiy jihatlari:  saviya jihatidan keskin farq qiladigan jamoalar o'rtasidagi bahs qiziqarli kechmaydi. Xuddi «karlik» jamoalarning Evro saralashidagi ishtiroki kabi. Deylik, «Real» klublar o'rtasidagi JChda g'olib chiqib, bosh sovrinni qo'lga kiritdi. Ammo bu zafarning nufuzi EChLdagi g'alaba oldida - dengizdan tomchi! Aslida buning aksi bo'lishi lozim, chunki EChL nima bo'lganda ham qit'a miqyosidagi musobaqa, klublar o'rtasidagi JCh esa butun jahonniki. Shunday ekan, undan butunlay voz kechib, arzirli variant xususida bosh qotirgan ma'qul. Infantinoning taklifi G'oyaning ijobiy tomonlari. Agar ikir-chikirlariga e'tibor bermaydigan bo'lsa, hammasi ajoyib. Dunyoning sara klublari o'rtasidagi yozgi musobaqa. Unda moliyaviy samaradorlikni ham, turnir nufuzini ham ishtirokchilarning yuksak maqomlari belgilab beradi. Ya'ni, Janni Evropa klublarining roziligiga erisha olsa (qolgan konfederatsiyalar badavlat bo'lmaganliklari bois, ularni ko'ndirish qi-yinchilik tug'dirmaydi), homiylar va TV vakillari qurshovida qolishi aniq. Klublar o'rtasidagi JCh shu tariqa etakchi turnir darajasiga ko'tarilishi mumkin. Agar mana shu kelishuvga erishishning iloji bo'lmasa, chempionatning ma'nosi qolmaydi. To'g'ri, «Barselona», «Yuventus» yoki «Real»dek grandlar o'ta qisqa vaqt ichida mo'may daromad va shon-shuhrat keltiradigan blits-turnirga befarq bo'lmasliklariga shubha yo'q. Shunday supermusobaqaning istiqboli yo'lida FIFA hozirda eskirib qolgan konfederatsiyalar kubogidan voz kechsa, bir o'q bilan ikkita quyonni urgan bo'ladi. Davomi Interfutbol.uz saytida.
— deya xabar beradi uff.uz nashri.