O'tgan mavsum yakunlariga ko'ra oliy ligadagi o'rnini saqlab qolgan Toshkentning «Obod» jamoasi 26-milliy chempionat bahslariga yangi bosh murabbiy qo'l ostida tayyorgarlikni boshladi. O'z vaqtida «Osiyoning eng yaxshi murabbiyi» deb topilgan Rauf Inileev «Obod» jamoasi bosh murabbiyi sifatida ishga kirishdi. Rauf Talgatovich bundan avval Qozog'iston 1-ligasi vakili hisoblangan «Maqtaraal» klubida faoliyat olib borgandi. Lekin biroz sog'lig'idagi muammolar sabab ma'lum muddat futboldan yiroqda bo'ldi. O'tgan davr mobaynida zaxira kuchi to'plab olgan tajribali mutaxassis yana sevimli ishini davom ettiradi. «Obod» klubi rahbariyati Rauf Inileev bilan bir yillik shartnoma imzolagan. Agar hammasi ijobiy davom etsa, ikki tomonlama kelishuvga binoan shartnoma muddati uzaytiriladi. Biz O'FFda o'tgan oliy liga o'yinlariga qur'a tashlash marosimidan so'ng Rauf Inileevni suhbatga tortdik. - Rauf Talgatovich, avvalo qur'aga munosabatingizni bilmoqchi edik. Ko'nglingiz to'ldimi? - Bilasizmi, qur'a bu nisbiy tushuncha hisoblanadi. Bu bizning xohish-istagimizga bog'liq jarayon emas. Har qanday holatda ham 15ta jamoaning bari bilan ertami-kech o'ynashimiz kerak. Qur'a avtomatik tarzda bo'ladigan jarayon. Umuman olganda, biz uchun qur'a yomon kelmadi. Chempionatni Namanganda boshlashimizni yoqimli. Sababi, «Navbahor»ning o'z maydonidagi o'yinlariga minglab muxlislar tashrif buyurishadi. Boz ustiga mavsumning ochilish o'yini, muxlislar futbolni ancha sog'inib qolishgan bo'ladi. Tabiiyki, bundan muhitda futbol o'ynash kishiga o'zgacha zavq bag'ishlaydi. Ikkala jamoa ham bosim ostida bo'ladi. Ikkinchi turda yana vodiy jamoasi bilan to'qnash kelamiz. Bu safar o'tgan mavsum oliy ligada qolish uchun «Obod» bilan kurash olib borgan «Qo'qon-1912» jamoasini o'z maydonimizda qabul qilamiz. O'z muxlislarimiz ko'z o'ngidagi ilk uchrashuvda g'alaba qozonishimiz lozim. Uchinchi turda bizni ilk jiddiy sinov qarshi oladi. «Buxoro» jamoasiga qarshi to'p tepamiz. Bu yil buxorolik futbolchilar juda yorqin o'yin namoyish etishdi. So'nggi 2-3 yil ichida «Buxoro» sovrinli o'rinlar uchun kurash olib boradigan klublar safiga qo'shildi. Bu jamoa o'z oldiga yuqori maqsadlarni qo'ygan. «Buxoro» bilan o'yin oson bo'lmasligi aniq. Buxoroda futbolni juda ham yaxshi ko'rishadi. Fikrimni jamoaning uy stadioniga keladigan muxlislar soni ham tasliqlab turibdi. O'tgan mavsumda eng ko'p muxlisni aynan «Buxoro» yig'a oldi. - Darvoqe, muxlislar tashrifi haqida. Qur'a tashlash marosimida muxlislarni stadionga qaytarish masalasi ko'tarildi. Bu mavzuda fikringiz qanday? - Futbol muxlislar uchun o'ynaladi. Shunday ekan, muxlislarning stadionlarga tashrifi juda ham muhim omil hisoblanadi. «Obod» «Jar» stadionida raqiblarini qabul qiladi. O'ylashimcha, Toshkentdagi eng qulay stadionlardan biri. Mo''jazgina bu stadionda futbol tomosha qilish ham zavqli. O'tgan mavsum «Obod» ishtirokidagi o'yinlarga nisbatan olganda ko'proq muxlis tashrif buyurdi. Ayrim jamoalar havas bilan qarasa ham bo'ladi. «Obod» muxlislar tashrifi bo'yicha ancha yil oldin tashkil etilgan jamoalarni ortda qoldira oldi. Bu juda yoqimli holat. - «Obod» bilan muzokaralar qanday davom etdi? - Shu yilning yozida menga «Obod» klubi rahbariyati taklif bilan chiqqandi. O'shanda men rad javobni bergandim. Bunga bir nechta sabablar bor edi. Birinchi galda sog'lig'imdagi muammolar bezovta qilayotgandi. Qolaversa, mavsumning o'rtasida jamoani qabul qilib olishdan qiyini yo'q. Shularni tushuntirib, klub rahbariyatiga yil so'nggi o'z qarorimni bildiishimni aytgandim. Yaqinda klub prezidenti telefon qilib, meni «Obod»da kutishayotganini aytdi. Va'daga vafo qilib, bir yillik shartnoma imzoladim. - O'sha taklif bilan chiqishgan paytdan boshlab «Obod» jamoasining o'yinlarini kuzatib bordingizmi? Davomi Interfutbol.uz saytida.
— deya xabar beradi uff.uz nashri.