Qadrli futbol muxlislari, “Lokomotiv” futbol klubining aziz ishqibozlari! Mana siz-u bizga juda ko'plab quvonchli onlar, ajoyib g'alabalar va zavqli lahzalar taqdim etgan 2016 yil ham sekin-asta nihoyalab, o'z o'rnini yangi – 2017 yilga bo'shatib berishga hozirlanmoqda. Ortda qolayotgan mazkur yil siz bilan bizning xotiramizda eng omadli davrlardan biri sifatida muxrlanib qolishiga shubxam yo'q! Zero 2016 yilda “Lokomotiv” futbol klubi o'z oldiga qo'ygan deyarli barcha vazifani a'lo darajada uddalay oldi. Jamoamiz o'z tarixida ilk bor (uzoq kutilgan)O'zbekiston chempioni degan unvonga ega chiqdi. Qolaversa, “Lokomotiv” O'zbekiston kubogida ham zafar quchishga muvaffaq bo'ldi. Osiyo Chempionlar Ligasida esa jamoamiz guruh bosqichidan muvaffaqiyatli tarzda chiqib, chorak finalga qadar etib borishni uddaladi. Bir mavsumda 2 ta sovrin qo'lga kiritilganini yaxshi natija deya baholash mumkin, nazarimda. Lekin siz – aziz ishqibozlarimiz jamoamizdan faqat va faqat g'alabalar kutishingizni juda yaxshi bilamiz. Shu boisdan yangi kelayotgan 2017 yilda ham jamoamiz ishqibozlarini ulkan yutuq va zafarlar bilan xushnud etishni maqsad qilyapmiz. Jamoamiz sekin-astalik bilan o'z infratuzilmasini yaxshilab bormoqda. Yildan-yilga natijalarimiz ham yanada yaxshiroq ko'rinish olmoqda. Bu tempni keyingi yillarda ham saqlab qolishga va “Lokomotiv” brendining yanada ommalashishiga harakat qilamiz. Umid qilamanki, 2017 yilda yanada ulkan zafarlar siz-u bizga yor bo'ladi! Shu o'rinda butun O'zbekiston xalqini, futbolimiz jamoatchiligi vakillari va ko'p sonli “Millionlar o'yini”ning ashaddiy ishqibozlarini Yangi Yil bayrami bilan chin dildan muborakbod etaman va barchangizga yangi yilda sihat-salomatlik, baxt-omad va oilangizga qut-baraka tilayman!.. To'labek Akramov “Lokomotiv” PFK bosh direktor o'rinbosari
— deya xabar beradi uff.uz nashri.